Македонија
Обвинителството нема да покрене постапка за продажбата на МРП-вакцините

Надлежен јавен обвинител од Основното јавно обвинителство Скопје донесе резолуција дека нема место за јавно–обвинителска интервенција во предметот оформен по допрен глас во врска со увозот, дистрибуцијата и употребата на МРП-вакцината во периодот од крајот на 2018 до почетокот на 2019 година, бидејќи овој настан не ги исполнува елементите на кривичното дело.
Во предметот се испитуваа евентуални неправилности околу увозот, рокот на употреба и евентуално предизвикани штетни последици од вакцините. Дополнително за истиот настан кривична пријава поднесе и Здружението на граѓани за заштита на човековите права „Здравје со игла не влегува“ од Кичево.
По оформувањето на кривичниот предмет, надлежниот јавен обвинител издаде наредба – да се извршат проверки во правното лице „Македонија лек“, увозник и дистрибутер на вакцината МРП, во смисла кога бил направен увозот на оваа вакцина, која количина била увезена, од кого и од каде била истата увезена, до кога бил рокот на употреба на увезените вакцини, дали етикетите на пакувањата од вакцините биле дополнително залепени, а доколку било така, од кои лица биле залепени и кои биле причините за тоа или, пак, вакцините биле доставени со залепени етикети, како и на други околности за набавка и дистрибуција на предметните вакцини.
„Проверки беа направени и во Агенција за лекови и медицински помагала – МАЛМЕД, во поглед на извршениот увоз и дистрибуција на вакцината МРП. Притоа се испитуваше дали оваа Агенција извршила контрола врз увозот, дистрибуцијата и употребата на предметните вакцини, доколку бил извршен таков надзор, што било констатирано, дали биле констатирани евентуални неправилности во однос на ‘рокот на важност’ на вакцините, дали било констатирано кога се залепени етикетите на вакцините, а доколку евентуално биле дополнително залепени, кој го направил тоа и од кои причини, дали е дозволено евентуално такво дејствие од страна на увозникот на лекот, дали овие вакцини биле употребени, дали имало констатирано штетни последици од вакцините кај одделни пациенти, дали вакцини со евентуално дополнително залепени етикети може да бидат пуштени во промет, дали овие вакцини биле пуштени во употреба во здравствените домови, како и други релевантни околности.
Едновремено, со наредбата беше побарано да се извршат проверки и во Министерството за здравство како ресорно министерство, како и да се обезбеди релевантната писмена документација, којашто се однесува на увозот, дистрибуцијата и употребата, како и евентуалната замена на етикетите со рок на важност на вакцините, а документацијата за извршен надзор и евентуално констатирани неправилности и евентуални штетени последици од нив врз здравјето на пациентите да се обезбеди во оригинал или заверен препис за да може да се употреби како доказ во кривичната постапка.Дополнително надлежен јавен обвинител нареди да се обезбедат како материјален доказ и предметните вакцини и да се чуваат под соодветни услови, за да не дојде до нивно контаминирање, а заради целите на кривичната постапка“, се наведува во соопштението.
Основното јавно обвинителство Скопје се обратило и до Центарот за испитување и контрола на лекови со барање за податоци дали лекот е штетен по здравјето на луѓето и дали истиот може да биде употребуван кај пациентите, односно пуштен во промет со лекови. На ваквото барање било одговорено дека Центарот за испитување и контрола на лекови може да врши проценка на податоците само контактно надворешно во споредбена анализа со одобрениот примерок и дека овој центар нема техничка можност за да спроведе лабораториско испитување на примерокот со цел утврдување на квалитетот.
„Со цел да се спроведе потребната лабораториска анализа, Основното јавно обвинителство Скопје преку Агенцијата за лекови и медицински помагала и Центарот за испитување и контрола на лекови, предметните вакцини кои беа обезбедени како доказ, како и целокупната материјална документација потребна за изработка на вештачењето ја проследи до Институтот Пол Ерлих од Ланген, Германија.Постапувајќи по наредбата за вештачење на ОЈО Скопје, Центарот за испитување на лекови достави извештај за проценка на пакување од 25.09.2019 година во кој е наведено дека лекот Priorix од производител GlaxoSmithKline Biologicals S.A-Ринсенсарт, Белгија, со рок на употреба 05/2019, примен од ‘Македонијалек’ ДОО Скопје на 3.04.2018 година содржи неточни податоци на дополнителната налепница на македонски јазик, залепена на надворешното пакување, меѓутоа од наведеното несовпаѓање не може да се констатира дали конкретниот лек е штетен.
Дополнително, со добиените резултати од испитувањето од Институтот Пол Ерлих од Ланген, Германија, се потврдува фармацевтскиот квалитет на лекот и констатирано е дека испитуваниот примерок на препаратот Priorix прашок и вехикулум за раствор за инјектирање во однос на испитаните параметри одговарал на барањата на спецификација на квалитет на производителот.
Со оглед на тоа што по извршената стручна проценка и добиените резултати беше констатирано само надворешно несовпаѓање на податоците на налепницата кое не влијаело на квалитетот на лекот, надлежниот јавен обвинител одлучи дека пријавениот настан не ги исполнува елементите на кривичното дело производство и пуштање во промет штетни средства за лекување од член 212 од Кривичниот законик, ниту на кое било друго кривично дело за кое гонењето се презема по службена должност. Основното јавно обвинителство Скопје го извести Министерството за внатрешни работи и Здружението на граѓани за заштита на човековите права ‘Здравје со игла не влегува’ дека нема да преземе понатамошно кривично гонење за овој настан“, се додава во соопштението на Обвинителството.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Лабудовиќ најави ревизија на сите спорни урбанистички планови, нови катни гаражи, чиста и безбедна општина со енергетски ефикасни фасади

Во преполната сала на Музејот на Современа уметност, вчера се одржа промотивната Конвенција на Движењето ЗНАМ – За наша Македонија, на која беа претставени кандидатот за градоначалник на Општина Центар, Мирослав Лабудовиќ, и советничката листа.
„На Центар му треба предводник кој ќе биде вистински претставник на граѓаните. Доволно млад и енергичен, доволно стручен и посветен татко на општината. На Центар му треба човек кој ќе воведе ред, ќе создаде урбан развој наместо хаос, ќе го исчисти, ќе го направи безбеден и ќе се бори за секоја негова педа. На Центар му треба вистински центарец. На Центар му треба Мирослав Лабудовиќ,“ беше пораката што силно одекна на Конвенцијата.
Во своето обраќање, Лабудовиќ се обврза дека нема да биде градоначалник кој работи само пред избори, туку човек што ќе им служи на граѓаните секој ден од својот мандат. Тој најави ревизија на сите спорни урбанистички планови, нови катни гаражи во Буњаковец, Капиштец и кај новата Железничка станица, чиста и безбедна општина со енергетски ефикасни фасади, како и изградба на Центар Хаб – мултифункционален младински и културно-технолошки центар.
„Секогаш пред очи ќе ја имам главната цел – моите сограѓани. Ќе работиме секојдневно за да го подобриме нивниот живот и Центар да му го вратиме на граѓанинот,“ истакна Лабудовиќ.
Носителот на советничката листа, Мишко Барзов, додаде дека со визија, системски решенија и чесна работа, советниците на ЗНАМ ќе изградат поуредена, почиста и побезбедна општина, додека лидерот на Движењето ЗНАМ, Максим Димитриевски, порача: „Не смееме да дозволиме Центар да остане во погрешни раце. Време е за промена, време е за вистински човек кој и знае и може. Тој човек е нашиот Миро.“
Движењето ЗНАМ на овие избори настапува самостојно со советнички листи во 53 општини и во градот Скопје, со кандидати за градоначалници во Куманово и Центар.
Македонија
Гичев: ДПМНЕ ги изневери граѓаните, време е за нова позитивна енергија и прогрес во Свети Николе

„Поминаа четири години откако ДПМНЕ е на власт, а освен празни ветувања, не добивме ништо. Четири години без ниту еден капитален проект, освен чадорите и кафезот во срцето на градскиот парк, кои ќе бидат дислоцирани веднаш по моето доаѓање, во првата недела“, порача од трибината во Свети Николе кандидатот за градоначалник на СДСМ, Дејан Гичев.
Тој ја побара поддршката од граѓаните и вети дека повторно ќе го врати сјајот на градот.
„Време е за промени. Време е за прогрес. Поминаа четири години без привлекување инвестиции. Наместо развој, добивме стагнација, наместо отчетност, добивме молк, и наместо подобар живот, добивме повисоки сметки и пониски стандарди. Ветуваа многу, а не направија ништо. Проектот за базен, кој беше целосно подготвен, беше сопрен без никакво објаснување од раководството предводено од ВМРО-ДПМНЕ,“ рече Гичев.
Уверува дека со напорна работа ќе ја реализира својата визија и програма, со конкретни проекти за подобра иднина.
„Со правилно урбанистичко планирање и грижа за хигиената, Свети Николе ќе го направиме чист, урбан и модерен град за живот. Тоа ќе биде обврска на секој од нас. Ќе работиме на обновување, модернизирање и вложување во спортските објекти, како и на поддршка на спортските клубови, со што ќе го оживееме спортот во нашиот град. Партнерството, координацијата и соработката со невладиниот и граѓанскиот сектор ќе овозможат подобра работа во решавањето на конкретните проблеми на граѓаните“, порача Гичев.
Тој кажа дека ВМРО-ДПМНЕ ја имале можноста, но ја прокоцкале, градот стагнирал изминативе четири години, а жителите не добиле ништо од ветеното.
„Ние ќе донесеме вистинска поддршка за земјоделците. Ќе обезбедиме основни услови за работа преку тампонирање на сите земјоделски патишта. Ќе ја вратиме загубената чест на земјоделецот, а ќе ја вратиме и душата на градот. Нашата визија е да ја подобриме заедницата. Предлагаме нови политики и мерки кои директно одговараат на реалните потреби на граѓаните. За младите , нов младински центар. За социјално ранливите фонд за самохрани мајки. Во образованието, стипендии за талентирани деца, порача Гичев.
Македонија
Времето денеска ќе биде сончево со мала до умерена облачност, од утре пад на температурите

Времето денеска ќе биде сончево со мала до умерена облачност. Кон крајот на денот облачноста ќе се зголемува и во текот на ноќта ќе има повремен локален дожд. Ќе дува слаб до умерен ветер претежно од јужен правец. Минималните температури ќе се движат од -3 до 2, а максималните ќе бидат до интервал 12 до 20 степени целзиусови.
Во Скопје, сончево со мала до умерена облачност. Кон крајот на денот облачноста ќе се зголеми. Ќе дува слаб до умерен ветер од јужен правец. Минималната температура во главниот град ќе се спушти до 1 степен, а максималната ќе достигне 17 степени.
Од понеделник до среда ќе дува умерен до засилен северен ветер, а температурите ќе се задржат под просекот за овој период од годината. Пораст на дневната температура се очекува од четврток.