Македонија
Обвинителството отвори истрага за шесткатница дивоградба во Чаир

Постапувајќи по кривична пријава од група граѓани, Основното јавно обвинителство Скопје почна истражна постапка против едно лице за кривично дело бесправно градење.
„Објектот почнал да се гради 2024 година, без одобрение и на државно земјиште, на улицата Кемал Сејфула во Чаир. Осомничениот, како управител на правно лице, се јавува како инвеститор на градбата – станбена зграда со деловни простории и катност По+П+6+Пк наменети за продажба“, соопшти Обвинителството.
По наредба на јавен обвинител, овластен судски вештак од областа на градежништвото констатирал моментна фаза на изграденост, односно изведени армирано-бетонски работи, целосно бетонирана скелетна армирано-бетонска конструкција, столбови, греди и плочи од подрумот до шестиот кат, како и ѕидање надворешни и внатрешни ѕидови со блок-тула.
Јавниот обвинител до судијата на претходна постапка достави предлог за определување мерки на претпазливост – обврска да се јавува кај определено службено лице, привремено одземање на патната исправа и забрана за изведување градежни работи на објектот дивоградба.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
СВР Скопје го расчисти убиството во обид од први јуни, поднесени кривични пријави против три лица

СВР Скопје – Единица за насилен криминал поднесе кривична пријава против Г.А.(33) од Скопје поради постоење основи на сомнение за сторено кривично дело „убиство“ во обид по член 123 во врска со член 19 од Кривичниот законик и против Б.С.(35) и А.С.(40), двајцата од Скопје, поради постоење основи на сомнение за сторено кривично дело „помагање“ по член 24 во врска со кривично дело „убиство“ во обид по член 123 во врска со член 19 од Кривичниот законик.
Имено, на 01.06.2025 во 22.00 часот во СВР Скопје, од Градска општа болница „Св.Наум Охридски“ е пријавено дека кај нив со убодни рани е донесен И.А.(38) од Скопје. Според пријавеното, околу 21.45 часот пред фитнес клуб на подрачјето на Чаир во Скопје, тој и неговиот брат А.А.(32) се обиделе да разделат три лица кои физички се пресметувале, при што биле нападнати со остар предмет. Притоа, и А.А.(32) се здобил со убодни рани и бил пренесен во Комплекс клиники „Мајка Тереза“, каде му била укажана помош. Во врска со настанот, подоцна во Градската општа болница „Св.Наум Охридски“ Скопје на преглед се јавил и Б.Р.(25) од Скопје.
По преземени мерки и активности и обезбедени докази, утврдено е дека пријавените го сториле делото, по што на 03.06.2025 се лишени од слобода од полициски службеници од Единицата за интервентна полиција при СВР Скопје. Во координација со јавен обвинител е поднесена пријавата, а од судија на претходна постапка на Г.А. му е одредена мерка притвор од 30 дена, а на Б.С. и А.С. им е определена мерка домашен притвор од 30 дена.
Македонија
180 сообраќајни прекршоци вчера во Скопје, 15 санкционирани возачи на мотоцикл

Секторот за внатрешни работи Скопје во текот на вчерашниот ден продолжи со контролите во областа на сообраќајот.
„На територија на град Скопје изречени се вкупно 180 мерки, меѓу кои за непрописно паркирање 90 санкции, 15 мерки за прекршоци што ги прават возачите на мотоцикл, девет санкции за возење без возачка дозвола.
Изречени се 10 мерки за користење мобилен телефон при возење, 15 санкции за некористење сигурносен појас, шест мерки за прекршоци што ги прават пешаците, пет санкции за недавање првенство на минување на пешаци…“, соопшти МВР.
Од таму додаваат дека сообраќајните контроли продолжуваат и во наредните денови.
Македонија
„Само ЈО го штити и не го гледа криминалот на Филипче во модуларната, вработените во министерството знаеле, затоа и не сакале да ги потпишат договорот и анексот“, вели ВМРО-ДПМНЕ

„Најголемата одговорност за криминалните модуларните болници, кои биле набавени како стоки со лош квалитет и леснозапалив материјал, со кредит од Светска банка е единствено кај Венко Филипче. Филипче, како тогашен министер за здравство, сега претседател на СДС, исто така е најодговорен за пожарот во модуларната болница во Тетово која целосно изгоре за само две минути, а со себе одзеде 14 животи“, вели ВМРО-ДПМНЕ.
„Ова секојдневно се потврдува со скандалозните детали од аферата „Провизии кои чинат животи“, која исто така покажа дека на Венко Филипче профитот од провизиите му бил на прво место, наместо здравјето и безбедноста на граѓаните.
Криминалното дејствување на Филипче, со цел да се спаси од одговорност, но и битката за уште провизии продолжи и по трагедијата во Тетово, така што тој противзаконски потпиша ништовен анекс на договорот за на изведувачот на модуларните болници да му ја зголеми цената за 20% за да ги смени панелите на другите болници со огнотпорни материјали.
Но, овој анекс кој го изготвил Филипче, не сакало да го потпише ниту едно стручно лице, затоа што сите вработени во Министерството за здравство и стручните лица во комисиите знаеле дека направил криминал во случајот со модуларната болница во Тетово.
Во ревизорскиот извештај направен по заминувањето на Филипче од здравство, констатирани се пропусти и противзаконски дејствија, додека во правното мислење од извештајот за анексот потпишан од него стои дека со цел да се спречат идни незаконски, правни и фискални импликации, договорот најитно треба да се раскине.
Лицето задолжено за проектот, не постапило по извештајот на проектната единица и на своја рака продолжувало да комуницира со изведувачот и врши притисок да се продолжи реализацијата според основниот договор и да се наплаќа по тие цени.
Се до септември 2022 година не се презема ништо и не се раскинува договорот, со што изведувачот го стави во поволна состојба за поднесување тужба за надомест на штета.
И од тука па натаму, цела тогашна влада на СДС се става во функција да го спаси Венко Филипче од одговорност.
Поради тужби за камати, министерството доставува информација до Владата со која предлага на изведувачот да му се плати спогодбено, под услов да се откаже од каматите и Владата на 11.07.2023 година носи одлука со која се одобрува исплата преку спогодба.
Иако постоел внатрешен ревизорски извештај, подготвен пред заминувањето Министерството, поради тужби за камати, доставува информација до Владата со која предлага на изведувачот да му се плати спогодбено, под услов да се откаже од каматите. Владата носи одлука на 11.07.2023 година со која се одобрува исплата преку спогодба.
Но и оваа спогодба не сака да ја потпише никој од проектната единица, затоа што знаеле колку е корумпирана и криминална оваа работа, со 20% провизија која завршила во нечиј џеб.
Криминалот на Венко Филипче секој го гледал, освен Јавното обвинителство кое наместо да отвори постапка, упорно молчи и го штити.
Криминал на Филипче има и во пуштањето во употреба на модуларните болници без одобрение од министерството за поставување и употреба, кои биле спротивни на Законот за градење и во кои не смеело да се обавува здравствена заштита.
Исто така, лично Венко Филипче го правел тендерот за модуларната кој дал листа со напишана спецификација.
Вистината за модуларната болница, јавноста заслужува да ја дознае, но и обвинителството да постапи.
Аферата „Провизии кои чинат животи“, го откри вистинското лице на Венко Филипче“, се наведува во соопштението на ВМРО-ДПМНЕ.