Македонија
Обезбедена нова финансиска помош за 1.000 лица од ранливите категории

Министерката за труд и социјална политика, Јованка Тренчевска, и генералниот секретар на Црвениот крст на Македонија, Саит Саити, денеска ја најавија новата финансиска поддршка наменета за 1.000 корисници на Гарантирана минимална помош, во чии домаќинства има член над 69 години.
Тие информираа дека овие лица ќе добијат еднократна помош во висина од 4.685 денари, средства наменети за покривање на здравствените трошоци предизвикани од староста, болеста, видот и степенот на попреченост, обезбедување на основни средства за домаќинството или да се задоволат други потреби кои ги имаат овие корисници.
Финансиската поддршка се реализира во рамки на проектот „Зајакнување на отпорноста на стари лица и лица со попреченост во време на Ковид-19 и идни катастрофи“, на Црвениот крст на Република Северна Македонија поддржан од Европската Унија, австриската Агенција за развој и австрискиот Црвен крст.
Министерката Тренчевска истакна дека Министерството за труд и социјална политика континуирано работи на унапредување на социјалните права и услуги во државата, со цел да обезбеди заштита и да ги подобри условите за живеење на сите граѓани во државата, со акцент на најранливите категории.
„Оваа Влада ја воведе Гарантираната минимална помош, со што значително се зголемија трансферите кон семејствата кои имаат ниски или воопшто немаат приходи, се воведе универзален детски додаток, со кој бројката на деца корисници на ова право се зголеми од 3.724 на 21.886, се воведе додатокот за образование за децата и во основно и во средно образование и со тоа бројката на корисници се зголеми од 3.800 на 28.749, се воведе таканаречената социјална пензија, а надоместокот за скратено работно време се зголеми на висина на 50% од просечната нето плата и постојано се работи на развој на нови услуги“, рече Тренчевска.
Таа се осврна и на најновите мерки, креирани како одговор на здравствената и енергетската криза и случувањата во Украина. Финансиска поддршка од 1.000 денари во наредните три месеци за околу 36.000 граѓани од ранливите категории и 330.000 пензионери во државата. Истовремено, бележиме и раст на минималната плата на 18.000 денари.
Генералниот секретар Саити информираше дека корисниците на Гарантирана минимална помош се мапирани во соработка со Министерството за труд и социјална политика и се семејства кои се социо-економски ранливи и лица со попреченост.
„По исплатата на финансиската помош, која треба да се реализира до 31 март, волонтери на Црвениот крст ќе ги посетат сите 1.000 семејства, со цел да се процени употребата на финансиската помош обезбедена преку проектот во месеците април и мај.
Министерката Тренчевска изрази благодарност до Црвениот крст на Република Северна Македонија, кои се секогаш тука да ѝ помогнат на државата во справување со кризни состојби и да обезбедат помош и поддршка на најранливите категории во општеството.
При денешната посета на Црвениот крст министерката Тренчевска го посети и Центарот за обуки на Црвениот крст на Северна Македонија, каде се спроведуваат обуки согласно 4 верификувани програми, за негователи за помош и нега во домот, лична асистенција на лица со попреченост, палијативни негователи за изнемоштени лица и асистенција за нега на лица со алцхајмерова болест.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Во Кисела Вода отворен нов парк со сообраќаен полигон

Градоначалникот на Општина Кисела Вода, Орце Ѓорѓиевски, свечено го отвори новиот парк со прв инклузивен сообраќаен полигон во општината, простор наменет за игра, учење и развој на сите деца, вклучително и на децата со попреченост.
На местото на поранешниот запоставен простор, општината доби нов, современо уреден простор од околу 1.250 м², лоциран во рамки на Државното училиште за рехабилитација на деца и младинци со оштетен вид „Димитар Влахов“.
Паркот е дел од пошироката стратегија на Општина Кисела Вода за подобрување на животната средина и создавање нови зелени површини. Во изминатите четири години, беа оформени и уредени над 80.000 м² ново зеленило, со што значително се унапреди квалитетот на живеење. Полигонoт, пак, е прилагоден за потребите на сите деца и опремен со пристапни патеки, визуелни елементи и тактилни површини.
-Грижата за лицата со попреченост е еден од врвните приоритети во нашата работа. Отворањето на овој парк и инклузивен сообраќаен полигон е конкретен доказ за тоа. Се наоѓаме во училиште кое има специјална задача, да обезбеди образование и поддршка за децата со оштетен вид, и не случајно, токму тука вложуваме во инфраструктура која е достапна и корисна за сите. Уште на почетокот на мојот мандат, започнавме да ја поддржуваме оваа установа со донација на книги напишани на Брајова азбука за училишната библиотека. Денес, таа поддршка добива и просторна димензија. Но, со овој парк испраќаме и друга силна порака- дека Кисела Вода останува посветена на создавање зелени, чисти и функционални површини што ќе им служат на сите генерации. Од депонии правиме паркови. Од запуштени простори, безбедни и уредени катчиња за децата. И тоа е визијата со која продолжуваме да ја менуваме општината на подобро- изјави градоначалникот Ѓорѓиевски.
Инаку, во Кисела Вода по извршената реконструкција, се наоѓа првото целосно инклузивно основно училиште во државата, „Кузман Јосифовски Питу“, како и првата инклузивна јавна детска градинка во Скопје. Со ваквите проекти, локалната самоуправа покажува дека грижата за најранливите категории не е само декларативна, туку реална и видлива на терен.
Македонија
Во моментот нема активни пожари, надлежните апелираат да се внимава за Илинденските празници

Според податоците на Центарот за управување со кризи (ЦУК), заклучно со 18:00 часот , нема ниту еден активен пожар. Шест се целосно изгаснати, додека еден е ставен под контрола.
Под контрола е пожарот во Општина Берово, во реонот на планината Готен кон Малешевските Планини, каде што е зафатена нискостеблеста шума, смрека, борова и букова шума, како и грмушки и ниска вегетација.
Во изминатото деноноќие, пожарните служби успешно се справија со шест пожари на отворен простор ширум земјата. Во Општина Карбинци, пожар избувна во шумскиот предел кај селото Јунузлија. Слична ситуација се случи и во Општина Кавадарци, каде што пламна ниска вегетација помеѓу селата Галиште и Ќесендре.
Во Општина Прилеп беа активни два пожара. Првиот се прошири од селото Бешиште, низ местото познато како Бешишки Рид, и продолжи кон територијата на Општина Новаци и граничниот појас со Грција. Вториот зафати поширок реон помеѓу селата Царевиќ, Смолани, Радобил и Дрен, каде што гореше мешана шума и нискостеблеста вегетација.
Во скопската Општина Гази Баба беше изгаснат пожар во село Трубарево, каде што гореше отпад, додека во Општина Гевгелија беше изгаснат уште еден пожар во селото Милетево, кој зафати ниска вегетација.
Директорот на Дирекцијата за заштита и спасување, Стојанче Ангелов, денеска апелираше за внимателност за Илинденските празници, за да не се предизвикаат пожари.
Македонија
Арсовска за Чаир: Денес 50 дивоградби, утре уште 50, луѓето не заслужуваат да живеат безбедносно загрозени

Градоначалничката на Скопје, Данела Арсовска, денеска изјави дека до Обвинителството за гонење на организиран криминал и корупција е доставена обемна документација од 3.200 страници поврзана со сомнителни постапки за легализација и изградба на објекти во општина Чаир.
На брифинг со новинарите, Арсовска посочи дека станува збор за згради кои сѐ уште се градат – без документација, без проект, без платени комуналии и без статика.
„Ако нема санкционирање, денеска имате 50 згради што се градат. Утре ќе имате уште 50. Таму живеат луѓе, не бројки. И тие луѓе не заслужуваат да живеат во 12-катници без гаранција за нивната безбедност“, рече таа, предупредувајќи на сериозен преседан доколку институциите не постапат.
Документите доставени до обвинителството содржат, како што рече, докази за фалсификати, меѓу кои и изјави потпишани од лица кои во моментот на наводната изградба биле малолетни.
Таа ја нарече состојбата „очигледна операција на перење пари“, и нагласи дека ваков размер на криминал не е забележан во ниту една друга општина во Скопје.
Обвинителството веќе постапува по пријавата – одземена е документација од Општина Чаир и од Министерството за транспорт и врски, а тече споредба на податоците со други институции.
Арсовска истакна дека не планира повторна кандидатура за градоначалник, но зад себе остава над 900 реализирани проекти, од кои 250 капитални, „и покрај сериозните опструкции од Советот на градот“.
Во однос на најавата на градоначалникот на Чаир, Висар Ганиу, дека ќе ја тужи, Арсовска одговори дека ќе и биде задоволство да ги соочи доказите со него, било каде и на било која платформа.