Македонија
Обезбедени средства за да се донесе телото на македонскиот алпинист кој почина на Монт Еверест

Советот на Општина Гевгелија на вонредна седница синоќа донесе одлука за издвојување на 600 000 денари од буџетот на Општината за што побрзо префрлање на телото на починатиот доктор и алпинист Георги Петков од Катманду во Гевгелија.
Роднините на Петков апелираа за помош и отворија донаторска сметка наменета за собирање пари кои недостасуваат за целосно покривање на потребната сума за транспортирање на телото на починатиот доктор од Непал до Гевгелија. Со оглед на тоа дека собирањето пари на овој начин може да потрае подолго време, а сумата е ургентно потребна, Советот на Општината едногласно реши да се издвојат потребните средства од буџетот.
Доколку средствата што ќе бидат собрани преку донаторската сметка ја достигнат сумата од 600 000 денари, тие ќе бидат вратени во буџетот, а доколку собраната сума биде помала од издвоената, разликата ќе се смета како донација од Општина Гевгелија.
Македонскиот планинар Ѓорѓи Петков, 63-годишниот доктор-инфектолог од Гевгелија, почина од срцев удар на Хималаите во обидот да го искачи највисокиот врв на светот, Монт Еверест (8.848 метри). Петков бил дел од експедицијата предводена од британскиот алпинист и лидер за комерцијална експедиција, Тим Моусдејл од Лондон, со која пред пет години на Монт Еверест се искачуваше и Илина Арсова. Тој се наоѓал во базниот камп 3 на 7 200 метри надморска височина каде што колабирал при подготовките за финалната маршрута на искачување на Монт Еверест од јужната страна.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски: Се укинуваат визите за Обединетите Арапски Емирати

Последната посета на Обединетите Арапски Емирати го донесе првиот конкретен резултат. На наше барање, тие ги укинуваат визите кои беа потребни за патување кон оваа земја, објави премиерот Христијан Мицкоски на социјалните мрежи.
Наскоро, како што појаснува, со конкретната примена на одлуката за без визното патување ќе се влијае на посилна економија, слободно патување, зајакнување на меѓусебното партнерство.
„Се бориме на секој можен начин да се помогне на нашите граѓани, и со секој ден да се носат промени за заедничката иднина“, пишува Мицкоски.
Македонија
Судот и’ го одзеде пасошот на претседателката на антикорупциската комисија која споделувала службени тајни на „Вибер“

На претседателката на антикорупциската комисија, Татјана Димитровска, одземен и’ e пасошот, откако Кривичниот суд го прифати предлогот за определување на мерки за претпазливост, како осомничена во дополнетата истрага за предметот „Адитив“.
Таа се сомничи дека преку апликациите за пораки „Вибер“ и „Ватс ап“ му оддавала службени тајни на друг обвинет за поведени постапки, за отворање предмети и одлуки против сега обвинетите фирми и лица во предметот „Адитив“, како и податоци за проверка на имот и неговото семејство.
Судот определи и забрана за преземање одредени работни активности поврзани со кривичното дело, што подразбира дека осомничената не смее да има контакт со предмети, пошта и друга документација поврзана со работењето на ДКСК, воедно не може да гласа и да распределува предмети.
За првоосоничениот Б.Н. кој се товари за злосторничко здружување, злоупотреба на постапка за јавни набавки и перење пари, определена е мерка притвор во траење од 30 дена, соопшти Кривичниот суд.
И за осомничената Б.П.М., определени се мерки за претпазливост, односно привремено одземање на патната исправа и забрана за издавање нова и забрана за преземање одредени работни активности поврзани со кривичното дело.
Против овие решенија странките имаат право на жалба.
Македонија
Девет лица завршија во притвор поради злоупотреби со инвалидските пензии и туѓа нега

На деветмина осомничени од уапсените 23 во акцијата за туѓата нега, судот им одреди мерка притвор од 30 дена.
Едно лице сè уште е недостапно за органите на прогонот.
Притворот за деветмината осомниченни е определен поради опасност од бегство, попречување на истрагата со влијание врз сведоци и опасност од повторување на делото, информираа од Кривичниот суд.
Петмина завршија во куќен притвор, додека за девет лица, судот определи мерки на претпазливост, односно обврс да се јавуваат во судот и привремено одземање на патната исправа и забрана за издавање нова.
Во истрагата на Обвинителството се опфатени вкупно 49 лица. Се работи за две криминални групи чии членови разработиле шема преку која на лица баратели на социјални услуги им овозможувале да добијат право на туѓа нега и инвалидска пензија. Меѓу осомничените има и лекари специјалисти кои биле претседатели Стручната комисија за издавање наод, оцена и мислење за потребата од помош и нега од друго лице.