Македонија
Обезбедувачот на Гаши репетирал пиштол, турнал полицаец, викал и се заканувал – поднесена кривична пријава

Полицијата до надлежното Основно јавно обвинителство за гонење организиран криминал и корупција поднесе кривична пријава против С. С., началник на одделението за лично обезбедување на претседателот на Собранието поради загрозување на сигурноста.
„Пријавениот С. С., на 1 август, околу 10.30 часот, на Меѓународниот аеродром ‘Скопје’, на паркингот пред ВИП-салонот пристигнал со возило со поставени ротациски светла, излегол од возилото и од појасот го извадил пиштолот, го репетирал и повторно го вратил во појасот, а на полицискиот службеник од аеродромот, кој извршувал работни задачи пред вратата на ВИП-салонот му се обратил на висок тон, го турнал назад со двете раце и заканувајќи му се, го спречил полицискиот службеник како службено лице во извршување на своите службени дејства“, велат од МВР.
Се додава дека тој бил испратен на Меѓународниот аеродром „Скопје“ од страна на претседателот на Собранието со цел надминување на недоразбирањето што настанало со претседателката на Косово во врска со безбедносните процедури за преглед на багаж и електронски уреди при летање со комерцијални летови.
Потоа заедно со уште двајца полициски службеници од Секторот за обезбедување личности влегол во ВИП-салонот и движејќи се во просториите во кои немал овластување за движење и престој, на присутните вработените на ТАВ – Скопје, полициски службеници од граничната полиција и Одделот за заштита на определени личности и објекти, почнал да им се заканува за животот, воедно барајќи да ја спроведе претседателката со возило до авионот.
ОВККИПС, во согласност со своите надлежности и овластувања, ќе поднесе предлог за поведување постапка за утврдување дисциплинска одговорност против полицискиот службеник С. С. и ќе изрече задолжителни мерки за отстранување од работното место – суспензија до завршување на дисциплинската постапка, а против полициските службеници С. Р. и Н. Б. ќе поднесе предлог за поведување постапка за кршење на работниот ред и дисциплината поради извршување незаконита наредба, несовесно извршување на работните задачи и рушење на угледот на полицијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Дел од Карпош и Аеродром денеска без струја

Од ЕВН Македонија АД известуваат дека денеска без електрична енергија ќе останат:
– во периодот од 08.30 до 15.30 часот, корисниците од улицата Франце Прешерн, општина Карпош;
– во периодот од 09.00 до 13.00 часот, корисниците од улиците Симеон Кавраков, Петар Ацев и Анастас Митрев, општина Аеродром.
Македонија
Сончево со умерена облачност, попладне нестабилно со пороен дожд и грмежи

Сончево со мала до умерена облачност. Ќе дува умерен, а во северните делови засилен северен ветер, кој ќе предизвика опаѓање на дневната температура за 3 до 5 степени. Попладне ќе има локален развој на нестабилна облачност со пороен дожд и грмежи. Минималната температура ќе биде во интервал од 12 до 19, а максималната ќе достигне од 27 до 36 степени.
Во Скопје, сончево со мала до умерена облачност. Ќе дува умерен, а попладне засилен северен ветер. Минималната температура ќе се спушти до 17, а максималната ќе достигне до 32 степена.
Времето во наредните денови
Од денеска до среда во попладневните часови ќе има развој на нестабилна облачност со локален пороен дожд и грмежи. Потоа ќе преовладува претежно стабилно време, а дневните температури ќе бидат без промени.
Македонија
(Фото) Успешна евакуација на повредено лице со хеликоптер на Армијата

Вчера, во попладневните часови, по добиено барање од Центарот за управување со кризи (ЦУК), Армијата на Република Северна Македонија, поради сериозноста на повредите и непристапниот терен, изврши итна медицинска евакуација со хеликоптер од вВИНГ, на лице кое паднало во провалија во близина на Ливадичко Езеро, Шар Планина.
Повреденото лице, при падот, се здобило со скршеници на раката, ногата и колкот, како и со обилно крварење, поради што било во критична состојба. На лице место интервенираше екипаж- тим на парамедици, кои и покрај непристапниот терен успешно го извлекоа и имобилизираа повредениот.
„Армијата во координација со ЦУК и здравствените установи изврши успешна медицинска евакуација и го предаде повреденото лице на екипа од итната медицинска помош, по што истото беше транспортирано на понатамошен болнички третман.
Армијата на Република Северна Македонија, заедно со останатите институции во државата продолжува да дејствува во интерес на граѓаните, обезбедувајќи навремена и професионална поддршка“, се наведува во соопштението на Генералштабот на Армијата