Македонија
Обновен дрворедот на „Рузвелтова“

„Град Скопје ја продолжува акцијата за обновување на дрворедите во Скопје, дел од големата есенска акција за зазеленување на градот. Денеска го обновуваме дрворедот на улицата Франклин Рузвелт, и тоа oд двете страни по должината на улицата, од булеварот Илинден до улицата Васил Ѓоргов. Ги заменуваме сите исечени и паднати дрвја со нови здрави висококвалитетни листопадни садници од видот див костен, како и преостанатите во дрворедот. Речиси 500 пенушки на градските сообраќајници оваа есен ќе бидат отстранети и на нивно место ќе се засадат нови здрави садници“, изјави портпаролот на Град Скопје, Ваљон Салиху.
Обновата на дрворедите во градот ќе се реализира на начин што новите садници ќе бидат засадени внимателно, грижливо, со видовите какви што претходно биле засадени на истото место.
„Оваа есен ќе бидат засадени 3.500 висококвалитетни листопадни садници на повеќе локации во сите скопски општини. Си зедовме обврска пред граѓаните да го вратиме изгубеното зеленило и да се бориме за секој сантиметар слободен простор за ново зеленило за разлика од претходната власт, која го уништуваше зеленилото каде што ќе стигнеше. Преку надоместувањето на изгубеното зеленило, зголемувањето на бројот на парковите и дрворедите и заштитата на сите јавни зелени површини во сите општини во градот сериозно работиме на намалување на загадувањето и подобрување на животната средина во градот“, изјави Салиху.
Влогот во здравата животна средина е трајна придобивка која директно влијае на здравјето на граѓаните затоа Град Скопје константно работи да им обезбеди на граѓаните што повеќе чисти и зелени површини. Оваа есенската акција Градот ја реализира заедно со сите скопски општини кои во неа учествуваат со свои работници, механизација и садници.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Вардариште е канцер“ – граѓаните утре повторно на протест во Ново Лисиче

И вечерва, како и во претходните денови, жителите на Ново Лисиче и Аеродром се жалат дека се чувствува мирис на изгорено во воздухот и не се дише.
По денешниот протест и кратката блокада кај мостот „Киро Глигоров“ поради дивата депонија Вардариште, граѓаните најавија дека утре повторно ќе излезат на улица. На денешниот собир видлив беше и транспарент со порака, „Вардариште е канцер“, а од институциите беше побарано без меѓусебни обвинувања да ја преземат одговорноста.
Следниот протест е закажан за утре, во 18 часот кај паркчето „Авионче“ во Ново Лисиче. Организаторите апелираат на масовност и истрајност, убедени дека само така може да се издејствува конечно решение за проблемот со Вардариште.
Претходно денес, О2 Иницијативата упати јавен апел до кандидатите за градоначалници и советници во Град Скопје, Аеродром и Гази Баба, барајќи итни решенија за санација на депонијата.
„Доста е со молк, одлагања и префрлање на одговорност! Вардариште не е тема за кампања – тоа е закана за нашето здравје и иднината на Скопје,“ порачуваат од иницијативата, нагласувајќи дека очекуваат конкретни обврски и јавно дадени ветувања од сите кандидати.
Во апелот се наведени три приоритетни барања: Итна изработка на проектна документација за санација и ревитализација на Вардариште, со што Општина Гази Баба треба без одлагање да ги донесе потребните детални урбанистички планови; Привремени мерки додека проектите не стартуваат, како запечатување, оградување, осветлување, 24-часовна чуварска служба и видео надзор; Транспарентност и отчетност, со редовно известување за секој чекор, конкретни активности и прецизни рокови.
Од иницијативата потсетуваат дека станува збор за прашање кое не смее да се третира како обично предизборно ветување.
Во неделата голем пожар избувна во близина на Вардариште во Скопје, при што половина град остана без електрична енергија 5 часа.
Македонија
СДСМ ги објави имињата на уште тројца кандидати за градончалници

СДСМ ги објави имињата на уште тројца кандидати за градоначалници, со што досега објавени се вкупно 60 кандидатури.
За градоначалник на Пробиштип, партијата го кандидира Драган Анастасов, Драгослав Симоновиќ е кандидат за градоначалник на општина Градско и Борче Гиевски за Зелениково.
„Сите кандидати се чесни, одговорни и посветени луѓе, кои ќе го дадат својот максимум во интерес на граѓаните. Преку изборните програми кои се подготвуваат заедно со граѓаните, со стручни лица и експерти во различни области СДСМ ќе понуди издржани решенија за секоја општинина и ќе претстави нова визија за развој на локалните заедници“, велат од партијата.
Македонија
Јасно и гласно кажав дека не сум се сретнал со Груевски, ВЛЕН манипулира, рече Османи

Бујар Османи, потпретседател на ДУИ и кандидат за градоначалник на Општина Чаир, ги демантираше тврдењата за наводна средба со Никола Груевски за обезбедување пратеници за поддршка на уставни измени.
„Во недостаток на идеи и очекуван пораз на изборите, манипулациите на ВЛЕН продолжуваат во однос за наводна моја средба со Груевски со цел обезбедување на пратеници за подршка на утавни измени. Јасно и гласно кажав дека таква средба немало. Тоа што се служат постојано со лаги и повторување на сите невистини нема да им помогне во кампањата“, рече Османи.
Додаде и дека дговорот на овие оцрнувања ќе стигне на 19 октомоври.