Во рамките на проектот „Баир – здружена акција на Битола за вклучување Роми“ се објавува повикот за пријави за реновирање домаќинства на ромското население во населбатаБаир. Целта на овој повик е да им се реновираат домаќинствата на 27 ромски семејства, чии објекти имаат имотен лист.

Во своето обраќање, градоначалниот на општина Битола, Тони Коњановски, истакна дека во општината сè уште постојат нерешени проблеми поврзани со урбанизацијата, а со тоа и обезбедување соодветна подземна и патна инфраструктура, што значително ги отежнува условите на граѓаните што живеат во таквите места. Токму затоа Општината веќе работи на донесување нов ГУП за општина Битола, чија подготовка неодамна почна и на забрзување на процесот на легализација. Преку овој процес на легализација 17 ромски семејства добија имотен лист за објектите во кои живеат во рамките на проектот Баир.

„Денес, со објавувањето на повикот за апликации за реновирање домаќинства на ромското населени во населба Баир заедно со нашите партнерски организации почнуваме еден нов процес во рамките на споменатиот проект, со кој 27 ромски домаќинства ќе имаат можност да извршат поставување ПВЦ-дограма, обновување фасада или санација на покривна конструкција. Верувам дека со искористувањето на средствата од овој фонд ќе се создадат похумани и подостоинствени услови за живеење. Најважен критериум од кој не смее да се отстапува во повикот е избраните домаќинства да се легализирани и да се дел од ДУП, со цел и инвестираните средства да имаат одржлив ефект. Токму затоа и легализацијата е процес на кој интензивно се работи во целиот овој период.

Со проектот ‘Баир’ опфативме и реконструкција на улиците Струшка и Сутјеска, со вредност од 5.623.157 денари, а партнерската соработка овозможува и реализација на социјалната и на инклузивната компонента преку спроведување активности што поттикнуваат развој и поддршка на културни и спортски иницијативи и кампањи за подигнување на јавната свест кај ромското население за релевантни теми од секојдневното живеење.

Во целиот овој процес најважна е партиципативноста на населението затоа што неговото учество овозможува и точно идентификување на потребите при реализацијата на проектите“, посочи Коњановски.

„Ова е една од носечките активности и има цел бенефитите од проектните средства граѓаните Роми директно да ги почувствуваат во своите домови. Предвидува три типа интервенции од поставување ПВЦ-дограма, обнова на фасада и реконструкција на покривот. Граѓаните ќе имаат можност од денес, 21 септември, па секој работен ден, заклучно со 7 октомври до 14 часот, да се пријават. Доколку се јави недоволен број, повикот ќе биде продолжен“, рече Климентина Ѓорѓиоска, проектен менаџер.

Проектот „Баир – здружена акција на Битола за вклучување Роми“ е финансиран од Европската Унија преку инструментот за претпристапна помош ИПА 2, ЕУ за Ромите и луѓето што живеат во длабока сиромаштија. Имплементатори на проектот се италијанската невладина организација COSV, „ПРЕДА плус фондација“ и Општина Битола.