Македонија
„Ова со Бисера Антоанета е само почеток, Битиќи да молчи да не почнеме да вадиме за него, па да плаче“, реагира ВМРО-ДПМНЕ

„Таман помисливме дека неуспешниот Фатмир Битиќи се опамети, тој пак пролупа нова глупост. Мислевме Битиќи преминал во друга политичка партија како што најавуваше, но најверојатно не се договорил за позиција, па сега пробува да му се допадне на Венко Филипче бранејќи ги криминалите на неговите сопартијци“, реагираат од ВМРО-ДПМНЕ на статусот на Фатмир Битиќи.
„Битиќи да молчи да не почнеме да вадиме за него, па да плаче после дека сме албанофоби како што и вообичаено прави кога нема како да се оправда.
Битиќи мора вака да плаче јавно, бидејќи сега нема делење на финансиски средства на владина седница на неговата сопруга. Им се ускрати тоа право, па станува се понервозен.
Му порачуваме да се вразуми, бидејќи лошо му влијае нервозата на здравјето. Воопшто не сте иновативни и креативни во измислување на оправдувања, прочитана книга сте, затоа и сте опозиција со едвај 15 пратеници помеѓу кои има политички несогласувања и расправии.
Но, за цела среќа Битиќи е небитен лик, а и сега нема каде да дава изјави па така и нема кој да се кара и да навредува новинари по настани да бега од нив.
Повторуваме, ова со обелоденување на трошење на народните пари ќе продолжи и во иднина. Ова со Бисера Антоанета е само почеток.
Вардар не ја пере Бисера, а најмалку Битиќи. Со докази ќе ја информираме јавноста како Владата на СДС и ДУИ ги трошеле парите на граѓаните изминатите 7 години“, се додава во реакцијата на ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ЗНМ: Апелите од Министерството за здравство се на граница на цензура

Здружението на новинари на Македонија (ЗНМ) со загриженост ја следи јавната комуникација на Министерството за здравство, во која се упатуваат апели до медиумите кои се ограничувачки по својата содржина и претставуваат обид за воспоставување на лоша институционална пракса во односите со медиумите.
„Како ЗНМ, го осудуваме обидот на Министерството да наметнува практични правила за тоа како медиумите треба да известуваат, особено кога тоа се однесува на чувствителни настани од јавен интерес. Таквите инструкции, иако формално претставени како апели, во суштина се форма на институционален притисок и можна цензура, што е спротивно на основните демократски принципи и правото на слобода на изразување“, велат од ЗНМ.
Потсетуваат дека членот 16 од Уставот гарантира слобода на јавното информирање и забрана на цензурата, а прашањата поврзани со новинарската етика и професионализмот припаѓаат исклучиво на саморегулаторната сфера. За тие прашања постојат Советот за етика во медиумите и Судот на честа при ЗНМ, кои се единствено надлежни да оценуваат евентуални повреди на етичките норми.
„Ги повикуваме новинарите и медиумските работници да продолжат да известуваат со професионализам, етика и чувствителност, особено кога се работи за трагични настани и ранливи групи. Но истовремено, укажуваме дека секој обид за институционално ограничување на пристапот до информации и начинот на известување е неприфатлив и штетен по јавниот интерес“, велат од Здружнието.
ЗНМ останува отворено за дијалог со институциите со цел унапредување на транспарентноста и заемната соработка, но цврсто стои во одбрана на уредувачката независност, медиумската слобода и правото на јавноста да биде информирана – како темелни вредности на секое демократско општество.
Македонија
Евакуација во Психијатриската болница Бардовци, пожарот го зафати дворот

Попладнево избувна пожар во населбата Геге кој се прошири кон населбата Бардовци и зафати дел од површината на дворот на Психијатриската болница Бардовци, обраснат со висока сува трева и дрвја.
Од Центарот за управување со кризи (ЦУК) информираа дека пожарот претставувал опасност да се прошири во целиот комплекс на болницата. Пациентите и персоналот веднаш биле евакуирани, безбедно изнесени надвор од кругот на болницата.
ЦУК под водство на директорот Мухамед Али, побарал дополнителни сили од Бригадата за противпожарна заштита (БППЗ) и координирал со Хеликоптерската единица на Министерството за внатрешни работи (МВР). Првично се разгледувала можноста за пренасочување на воздушната поддршка, која дејствувала во општина Чучер Сандево – Блаце, за да помогне во гаснењето на пожарот во Бардовци.
Во моментот, пожарот е ставен под контрола и нема потреба од дополнителна воздушна поддршка. Хеликоптерот на МВР останува ангажиран кај Блаце, општина Чучер Сандево.
На лице место, заедно со директорот на ЦУК, Мухамед Али, беше и директорот на болницата, Иса Абдулаи, кои ја координираа целата акција.
Македонија
Хеликоптер го гасне пожарот кај Блаце

Хеликоптер на Министерството за внатрешни работи е веќе вклучен во акцијата за гаснење на пожарот кој избувна над магистралниот пат Скопје – Граничен премин Блаце.
Пожарот избил на потегот пред тунелот, од десната страна на коловозот. Зафатил тежок и непристапен терен, па по дојава на бројот за итни случаи 112, Центарот за управување со кризи (ЦУК) веднаш побарал воздухопловна поддршка. Хеликоптерската единица бргу се активирала, а акцијата на терен се координира заедно со припадници на противпожарните служби и други надлежни институции.