Македонија
Одбележан Меѓународниот ден на борба против корупцијата
Само со заедничка акција на институциите и со поддршка од јавноста борбата против корупцијата ќе има ефект! Ова е пораката од конференцијата што се одржа денес, по повод одбележувањето на 9 Декември – Меѓународниот ден посветен на борбата против корупцијата. Конференцијата која се одржа под мотото „Избери вистински правец – избери интегритет!“ е во организација на Државната комисија за спречување на корупцијата (ДКСК).
Во рамките на конференцијата Државна комисија за спречување на корупцијата ги акцентираше досега реализираните активности. Зголемен број на предмети, дигитализација за поголема ефикасност, анализа за проценка на ризиците од корупцијата во повеќе области и интензивирање на соработката со повеќе институции се главните области на кои ДКСК работеше фокусирано во текот на годината. За унапредување на борбата против корупцијата и судирот на интересите, ДКСК минатата година за првпат изготви и анализа за дискреционите овластувања во повеќе сектори.
„И покрај напорите за подобрување на состојбите, корупцијата е сè уште голем проблем во нашето општество, за што се потребни системска акција, поголемо вклучување на граѓаните и подигнување на свеста на јавноста за тоа дека корупцијата не смее да се толерира и не смее да биде неказнива. Повеќе од јасно е дека корупцијата влијае на развојот на земјата, а истовремено ја зголемува и недовербата кон институциите. Преку корупцијата јавните ресурси се пренасочуваат во џебовите на корумпираните поединци наместо на потребните инвестиции во интерес на сите граѓани со кои ќе се подигне квалитетот на животот. Затоа апелирам до сите институции да се вклучат и да ја зголемат ефикасноста во борбата против корупцијата“, истакна Билјана Ивановска, претседателка на ДКСК.
Во текот на 2021 година Комисијата, покрај другите активности, отвори 788 предмети, меѓу кои и за високи функционери.
На конференцијата се обрати и г. Џулијан Васало, заменик-шеф на Делегацијата на ЕУ во земјава, кој порача: „Корупцијата ја поткопува демократијата и владеењето на правото, односно основата на европските општества. Ја продлабочува нееднаквоста и ја поткопува социјалната кохезија. Ги засега сите области на животот. Борбата против корупцијата е од суштинско значење за ЕУ и е во сржта на процесот на проширување. Европската комисија ја поздравува проактивноста на Државната комисија за спречување на корупцијата и остварениот напредок. Но сепак потребно е уште повеќе. Напорите треба да бидат бескомпромисни и постојани. Треба да имаат за цел остварување на структурни и општествени промени, кои треба да се одржат со текот на времето. Исто така не смее да има враќање назад. Европската Унија и понатаму активно ќе ја поддржува борбата против корупцијата, преку техничка и финансиска поддршка, како и преку споделување на најдобри практики.“
На конференцијата се обрати и Марин Мрчела, претседател на ГРЕКО. Мрчела, честитајќи го Меѓународниот ден посветен на борбата против корупцијата, се осврна на процесот на имплементирање на препораките на ГРЕКО во земјава.
„Борбата со корупцијата останува да биде еден од приоритетите во општествата, но и во политичката агенда. За да имаме напредок неопходен е поголем ангажман на институциите за имплементација на препораките од ГРЕКО, а не само нивно прифаќање. Корупцијата не заобиколува ниту една држава, но наша заедничка заложба е да ја сведеме на минимум, а наспроти тоа да го зајакнеме почитувањето на човековите права и слободи. Во таа насока важна е да се обезбеди поголема заштита на укажувачите, кои се клучни во овој процес, како и стратешки и организиран пристап во борбата против корупцијата со заедничка поддршка на сите институции. Но, не помалку важно е паралелно да се работи на поголема едукација на јавноста и подигнување на свеста, за да се поттикне што поширока акција против корупцијата“, истакна господинот Мрчела.
За важноста на соработката помеѓу институциите, но и за јакнењето на нивната ефикасност и интегритет во заедничката систематска борба против корупцијата, на конференцијата говореа и заменик-претседателот на Собранието на Република Северна Македонија, господин Горан Мисовски, министерот за информатичка технологија, господин Јетон Шаќири, претставници на институции, како Државниот завод за ревизија, Народниот правобранител и други.
Конференцијата за одбележување на Меѓународниот ден за борба против корупцијата е дел од проектот „Промовирање на транспарентност и одговорност во јавната администрација”, кој е финансиран од ЕУ .
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Поради поголем пламен и отпаднати делови од приколка на возило делницата од автопат А1 Велес – Градско е затворена
Поради поголем пламен и отпаднати делови од приколка на возило, во 01:20 часот делницата од Автопат А1 Велес – Градско е затворена и возилата се пренасочуваат по експресниот пат Градсско – Дреново до локализирање и ликвидирање на пожарот, извести АМСМ.
Сообраќајот на магистралниот пат Прилеп – Градско се одвива наизменично.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
Македонија
Без струја делови од Петровец, Чаир и Гази Баба
Од ЕВН Македонија АД известуваат дека денеска без електрична енергија ќе останат:
– во периодот од 08.30 до 11.30 часот, корисниците од селата Градманци, Летевци, Катланово и Брезница, општина Петровец;
– во периодот од 08.30 до 15.00 часот, корисниците од улицата Ордан Чопела, улицата Петре Георгиев и улицата Челопек, општина Чаир;
– во периодот од 09.00 до 13.00 часот, корисниците од улицата Вера Вучковска Жезељ во населба Хиподром, општина Гази Баба.
Македонија
Делови од Центар и Карпош денеска без вода
Од ЈП Водовод и Канализација известуваат дека денеска поради дефект во шахта од ф – ¾ на улицата Ацо Караманов бр. 10, во периодот од 09.00 часот па се до отстранување на дефектот без вода ќе останат дел од корисниците од улицата Ацо Караманов, како и објектот на Американската Резиденција, општина Центар.
Од ЈП Водовод и Канализација известуваат дека исто така денеска поради уличен дефект на улицата Девол бр. 15, во периодот од 09.00 часот па се до отстранување на дефектот без вода ќе останат корисниците од улицата Девол, општина Карпош.

