Македонија
ООУ „Лазо Ангеловски“ домаќин на краткорочна размена на ученици

ООУ „Лазо Ангеловски“ во Аеродром оваа недела, од 11 до 15. 4.2022 година, е домаќин на краткорочна размена на ученици во рамките на проектот на „Еразмус +“ – „Млади новинари денес – одговорни дигитални граѓани утре“, во кој учестуваат 3 партнер-училишта од Хрватска, Србија и од Романија.
Манифестацијата беше отворена на 11 април со пригодна приредба изведена од нашите ученици, на која беше прикажана куса драматизација поврзана со обичаите за Велигден и народни ора. Во текот на денот следуваа активности за тим-билдинг и меѓусебно запознавање на учениците, посета и прием во Општина Аеродром и проследување на првиот дел од презентациите за Македонија, а во пладнивните и вечерните часови во опуштена атмосфера имаше заеднички ручек и вечера со сите гости.
На гостите добредојде им посака директорката на училиштето „Лазо Ангеловски“, м-р Магдалена Петреска, осврнувајќи се на проектот и неговата важност за идните генерации истакнувајќи дека живееме во време на отворено и брзо пласирање информации, во кое нашите деца треба да знаат како да ја проверуваат веродостојноста, да ги препознаваат дезинформациите и како во иднина одговорно самите тие да пласираат информации. Само така може да имаме добро информирани идни граѓани и веродостојни информации. Потоа таа истакна дека проектот придонесува и кон создавање нови пријателства меѓу децата и возрасните од земјите во регионот.
Своето задоволство во врска со манифестацијата го изразија и координаторите на групите учеснички.
Стјепан Лучки, директор на ОУ „Св. Петар“, Ореховац, Хрватска, координатор на проектот, ја изрази својата благодарност и истакна: „Воодушевени сме од приредбата, од драмската изведба и од прикажаното народно оро и од носиите, кои имавме можност да ги видиме. Можевме да видиме дека со голема волја и жар е подготвена приредбата, па големи пофалби до учениците и наставниците што ги подготвуваа“.
Стојанка Лесички, координатор на проектот на „Еразмус+“ – „Млади новинари денес – одговорни дигитални граѓани утре“, изјави дека во рамките на проектот сите училишта успешно формирале свој дигитален училиштен весник и притоа разменувале новинарски натписи. На блогот на проектот реализирани се над 500 објави со текстови испратени од училиштата. Креирани и одржани се многубројни работилници и тркалезна маса на тема „Медиумска писменост“. За потребата од поддршка на вакви и слични проекти, го истакна следново: „Сметаме дека дигитални весници за деца се и повеќе од потребни. Недостига буџет за такво нешто, а потребата од нив секако постои со оглед на тоа дека нашите деца наоѓаат информации само на социјалните мрежи и често се дезинформирани затоа што има многу лажни вести, многу објави, кои децата, всушност, не би требало да ги читаат. Кај нас постојат дигитални весници за студенти, средношколци, но не и за децата од основните училишта, кои всушност се најмалку медиумски писмени, и ние и понатаму ќе се залагаме, дури и по завршувањето на овој проект да се направат обиди да се реализира оваа идеја и се надевам дека овој наш проект ќе поттикне некаква активност во оваа сфера, сферата на медиумска писменос“.
Биљана Вучковиќ, Чичевац, Србија: „Ние доаѓаме од мало место и нам ни е многу мило што ја почнавме новинарската секција во Србија. Денес, тука, присутни се деца кои се нашите најдобри новинари, оние што имаат напишано најголем број текстови. Преку овој проект децата имаат можност преку целата година да бидат активни и да стекнуваат дигитални и вештини за медиумска писменост“.
Ciofalca Mihaela Cristina, претставник на партнер-училиштето од Романија: „Ние ја почнавме нашата соработка со координаторот Стојанка Лeсички и координаторот од вашето училиште Љубица Ружинска на платформата eTwinning, а заедничката цел ни беше да ги подобриме дигиталните вештини и медиумската писменост на нашите ученици. Нашите ученици и наставници работат на зголемувањето на свесноста за сајбер-насилството, како да го препознаат, како да препознаат лажни вести, како да проверат веродостојност на вести и особено во време на пандемијата се појави потреба да пишуваме токму на овие теми. Им благодариме на нашите партнери од Македонија, кои одлично ја подготвија оваа размена“.
Во текот на другите четири дена од ученичката размена се реализираа повеќе работилници поврзани со темата на размената и во склад на целите на проектот, и тоа: „Моќта на медиумите“, „Да бидеме реални“, „Дали е трик или го заслужува мојот клик?“ и „Филтирани меурчиња“. Учесниците на размената исто така имаа можност да се запознаат со културата, обичаите и знаменитостите на градот Скопје и нашата држава преку презентации што сами ги подготвија, како и културните посети, кои се реалзираа во текот на размената: шетачка тура низ градот Скопје, проследена со лов на богатство, како и посета на археолошкото наоѓалиште „Стоби“. Истовремено, преку разните видови неформални активности во училиштето и надвор од него учесниците имаа можност да се дружат, забавуваат и да формираат нови пријателства со своите соучесници од државите.
Учениците учесници на ученичката размена, кои воедно се членови на медиумската група во училиштето, која е дел од овој проект, напишаа натписи во училишниот дигитален весник „Л.А ИН-форматор“ за активностите и впечатоците од секој ден на размената. Тие се достапни на следниот линк https://lainformator.wordpress.com/home/
(ПР)
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Уапсени се полицајци и полициски функционери кои биле на смена кобната вечер“: СДСМ ја поздрави акцијата на ОЈО ГОК за Кочани

„Ја поздравуваме вечерашната акција на Обвинителството за организиран криминал и корупција во која се лишени од слобода полицајци и полициски функционери кои биле на смена кобната вечер на 16 март во т.н. дискотека Пулс во Кочани“, соопшти СДСМ.
„Фактот што четири месеци ВМРО-ДПМНЕ се обидуваше да ја сокрие одговорноста на полицајците и полициските функционери, фактот што нивната вина беше негирана од страна на Панче Тошковски и Христијан Мицкоски укажува на тоа дека сите биле вмешани или на некој начин знаеле за нелегалното работење на Пулс и тоа го одобрувале.
Само поради обидите да се сокрие одговорноста од страна на Тошковски и Мицкоски на лицата кои тие ги поставија за полицајци, командири и началници би требало веднаш да си поднесат оставки.
Одговорност мора да има и за Александар Јанев, директорот на БЈБ. Тошковски и Јанев не смеат повеќе да ја попречуваат истрагата ниту да влијаат некој да не сноси одговорност.
Вистината за Кочани која цела недела ја објавуваше СДСМ е точна. Се покажа дека без силен притисок на јавноста, на дел од медиумите и на СДСМ нема да има правда за Кочани. Време е за одговорност, време е за оставки“, се додава во соопштението на СДСМ.
Македонија
Приведени уште 13 полициски службеници за пожарот во „Пулс“

Во тек е акција под раководство на обвинител од Специјализираното одделение за полициски службеници, соопштија од Обвинителство за гонење на организиран криминал и корупција.
Уште 13 полициски службеници и началници се приведени во рамки на истрагата за пожарот во дискотеката „Пулс“ во Кочани.
Од Обвинителството најавија дека соопштение ќе има во текот на утрешниот ден.
Македонија
МОН: Стручното образование е силна страна на македонскиот образовен систем, креира квалитетен и побаруван кадар на пазарот на трудот

„Во средните стручни училишта во Македонија успешно функционира концептот на дуално образование во чија реализација е вклучена и бизнис заедницата. Училиштата и компаниите заедно содаваат квалитетен кадар кој полесно може да се снајде на пазарот на трудот. Затоа, развојот и проширувањето на овој концепт ќе биде наш приоритет и во следниот период“.
Ова го истакна државниот секретар во Министерството за образование и наука, Елена Ивановска на панел дискусија „Достапност на квалификувана работна сила: предизвик и стратешки фактор за инвестициски одлуки и економски раст“, организирана во рамки на Првиот македонско – германско бизнис самит, со кој АХК германската стопанска комора во Македонија одбележува 25 години постоење.
Ивановска рече дека од самиот почеток на мандатот, новото раководство во МОН се заложи за унапредување на законската регулатива, бидејќи таа е основ за спроведување на образовните политики, новите мерки и активности со кои ќе се остварат целите од владината програма за градење на поквалитетен образовен систем.
„Во новиот Закон за стручно образование и обука системски се уреди концептот на дуално образование, се прецизираа обврските на сите учесници во реализацијата. На пример се дефинираше кој и како може да стане ментор на учениците, компаниите да им исплаќаат месечен надомест на практикантите, да им овозможат заштита и безбедност при работа и така натаму. Со Законот за средно образование пак, се предвиде поголема поддршка за талентираните ученици, се воведуваат кариерни советници што ќе ги насочуваат учениците и сето ова е во интерес на создавање на потребната квалификувана работна сила“, рече Ивановска.
Осврнувајќи се на регионалните центри за стручно образование и обука рече дека тоа се всушност средни стручни училишта кои се трансформираат во образовни установи со поголема вредност и повеќе функции, обврски и одговорност.
„Таму не само што се реализира средно стручно образование за ученици, туку идејата е да се реализира и образование и обука на повозрасни кои имаат потреба од доквалификација, преквалификација и слично, за да станат конкурентни на пазарот на трудот. Фреквентноста на луѓе ќе биде многу поголема. Центрите ќе прават и анализи на пазарот на трудот, ќе креираат програми за настава и обука и така натаму“, рече Ивановска, додавајќи дека во моментов се формирани 7 регионални центри, а до 2028 година ќе се формира осмиот и последен, што како обврска е предвидено во Реформската агенда.
Државниот секретар информираше дека во регионалните центри се вложуваат големи износи на средства за да има добри училници, опремени кабинети, работилници и соодветни сместувачки капацитети. Средствата во најголем дел ги обезбедува Европската унија, а Ивановска ја повика и бизнис заедицата да помогне во модернизацијата на инфраструктурата, затоа што, како што рече, училиштата се инкубатори на човечки капитал кој и нив им е потребен.
На панел дискусијата модерирана од Дејан Чуповски, раководител на програмата за дуално образование при АХК германската комора, се обратија и програмската директорка на Источниот комитет на германското стопанство, директорот на средно стручно училиште „Св. Наум Охридски“ во Охрид, Сашо Недески, раководителката на одделот за глобална техничка и комерцијална обука во компанијата Дрекслмаер, Барбара Гербер и управниот директор на компанијата Унија Груп, Бранислав Серафимоски.