Општина Гази Баба во соработка со „Млади инфо-интернационал“, во партнерство со волонтерскиот центар од Славонски Брод и Нова Градишка од Хрватска, го реализира проектот „Солидарни млади во време на кризи“ на тема „Активните млади во време на криза – се движечката сила за подобра иднина“!

Како што информираат од скопската Општина, настанот се одржал во просториите на Општина Нова Градишка, Хрватска.

Инаку, Mакедонија и Хрватска се земји со долга историја во кризни ситуации, во кои, покрај човечкиот фактор (политички и социјални проблеми, вооружени конфликти), голема улога имаат и природните непогоди (земјотреси, поплави, пожари).

„Во проектот ‘Солидарни млади во време на кризи и природни непогоди’ најпрвин се работеше на онлајн и офлајн-мапирање национални и локални државни органи и релевантни засегнати страни кои се одговорни за итни одговори во време на природни непогоди и кризи. Учесниците во овој проект имаа можност да разменат искуства на оваа тема, научија нови техники за справување со природни непогоди и имаа сеопфатна дискусија за тоа како подобро да се разбере важноста на солидарноста во време на кризи“, се наведува во соопштението од Општината.

Учесниците од Македонија и Хрватска за време на работилницата во склоп на настанот развиле акциски чекори како подобро да се одговори во време на кризи и природни непогоди и да се подобри соработката на локалните власти со младите волонтери.

„Се дискутира за посттрауматскиот стрес што луѓето го имаат по големи природни катастрофи и колку е важно да се работи на тоа поле, односно луѓето да добиваат соодветно психолошко советување по вакви големи кризи и природни непогоди“, објасуваат од Гази Баба во однос на проектот „Солидарни млади во време на кризи“.