Во согласност со изборното ветување на градоначалникот Илија Јованоски за гасификација на градот, Општина Прилеп забрзано ги презема сите неопходни чекори за практична имплементација на гасоводот на територијата на нашата општина, се вели во реакцијата на Општината на прес-конференцијата на ВМРО-ДПМНЕ.

„Притоа, целосно свесни за огромното значење и бенефитите што гасификацијата ги носи за институциите, приватните стопански субјекти и граѓаните, беа одржани неколку јавни средби во салата на Општина Прилеп со сите заинтересирани и засегнати страни, со цел да ги спознаеме нивните реални потреби од гасот за да можеме правилно да се проектираат првите 20 километри од гасоводната мрежа во градот.

На тие средби, водејќи се од принципот на транспарентност и отвореност, градоначалникот и службите што работат на подготовките за гасификација упатија јавен повик и отворена понуда до сите присутни, да предложат специјализиран кадар што Општината ќе го вклучи во самиот процес на гасификација на градот“, се вели во соопштението.

„Формирањето на јавното претпријатие ‘Енерго Прилеп’ е еден од основните услови за да биде практично реализиран овој капитален проект за општината и граѓаните. Навистина жалиме што опозициските советници од ВМРО-ДПМНЕ, освен гола критика, не смогнаа сила да ги надминат партиските интереси и на вчерашната седница на Советот не го поддржаа овој капитален проект. Очигледно интересите на граѓаните не се во фокусот на опозицијата, но затоа мнозинството гласаше за гасификација на градот, што ќе донесе почиста животна средина, намалени сметки за греење на граѓаните и институциите, поевтино производство во стопанството и можност за нови работни места“, се додава во реакцијата.