ВМРО-ДПМНЕ во безидејност продуцира лажни информации и монтира фотографии, реагира Општина Центар по соопштението во кое Општинскиот комитет Центар на опозициската ВМРО-ДПМНЕ обвини за нечистотија во центарот на главниот град.

„Општинскиот комитет на ВМРО-ДПМНЕ Центар е сè уште во шок од катастрофалните порази што ги доживеа на парламентарните и локалните избори. Во безидејност продуцираат лажни информации и монтираат фотографии. Вчерашното соопштение за чистотата во Центар, во кое, немајќи што да напишат, дезинформираат за купишта ѓубре, кучиња скитници, добиток, дупки по улиците. Една од фотографиите што е испратена до медиумите за да покажат наводно шокантни слики за нечистотијата е извадена од некоја од архивите на ВМРО-ДПМНЕ. Господа од ИК на ВМРО-ДПМНЕ, сега е пролет, дрвјата се раззеленети, а на фотографијата се гледаат голи дрвја сликани во доцна есен. Вакво сечење, лепење и монтирање на вистината не е дозволиво за една партија што сака да се претстави како сериозна опозиција“, реагира Општината.

Додаваат и дека членовите на Извршниот комитет на ВМРО-ДПМНЕ Центар можеби се нови и никој не ги подучил дека тоа што го наведуваат како застрашувачка слика од преполни контејнери и смет не е надлежност на општините, туку на Град Скопје.

„Во желба за дисквалификација на градоначалникот Саша Богдановиќ не се ни обиделе да прочитаат во законот кој за што е надлежен.  Општина Центар, и покрај тоа што нема таква обврска, во интерес на граѓаните, започнува со вонредно чистење на територијата на општината. Проблемот со кучињата е реален, но тој треба да се решава координирано со другите општини и со Град Скопје бидејќи кучињата кои се денес во Центар, утре ќе се префрлат во друга општина. Општина Центар за решавање на овој проблем обезбеди средства во буџетот за 2018 за изградба на прифатилиште за кучиња скитници и тоа ќе биде реализирано. Во тек е изработка на проекти за зазеленување на Центар бидејќи една од заложбите на Општина Центар и на градоначалникот Саша Богдановиќ е да обезбеди чиста и здрава животна средина за живеење“, реагира Општина Центар.