Македонија
Општина Центар им додели признанија на децата што спасија човек во автобус

Општина Центар им додели признанија на 13-годишните Петар Тодоровски, Ведран Лауренчиќ и Мила Кочевска, кои пред два дена спасија патник во градски автобус, кому му се слошило и колабирал за време на возењето. Вчера градоначалникот на Центар, Саша Богдановиќ, им се заблагодари на тројцата ученици во ОУ „Кочо Рацин“ за нивната храброст и пожртвуваност и им ги додели признанијата.
„Особено сум горд што имам можност да им изразам почит и признание на нашите херои, кои вчера помогнаа да се спаси еден човечки живот. Признание за нивната хуманост, храброст и пожртвуваност. Тие треба да бидат пример за сите деца, а и за нас, возрасните“, изјави Богдановиќ.
Ученикот Ведран нагласи дека секој треба да знае како се пружа прва помош затоа што не се знае кога ќе ви притреба за да помогнете некому, а можеби и да спасите човечки живот. „Најважно е да не се паничи, да се остане присебен, но и да се знае што е најважно да се направи при вакви случаи“, вели Ведран.
Интересна коинциденција е што трите деца се враќале од натпревар по прва помош кога се случи настанот во автобусот со број 57. Тие забележале дека на еден од патниците не му е добро при што му кажале на возачот да запре и со помош на дел од возрасните го извадиле надвор од автобусот. Применувајќи го своето знаење го спречиле да го голтне јазикот и му ја преврзале главата од каде крвавел по што пристигнало амбулантно возило кое го однело повредениот човек во скопските клиники.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Се излеа Маркова Река кај Батинци

Маркова Река се излеа денес по обилните врнежи од дожд.
Во селото Батинци, водата е надојдена, излевајќи се на неколку места околу речното корито.
Ангажирана е механизација за санирање на штетата, а градоначалник на Студеничани, Азем Садики, објави дека забележана е материјална штета во дворовите од куќите кои се наоѓаат во близина на реката.
Засега, според градоначалникот, нема потреба од евакуација.
Фото: ТВ21/скриншот
Македонија
Тетово повика на јавна дебата за промена на имињата на улиците

Општина Тетово в петок, со почеток во 15:00 часот, организира јавна дебата за предлози за имиња на улиците.
„Ги повикуваме сите граѓани, здруженија, невладини организации и граѓанскиот сектор да учествуваат на оваа јавна дебата за именување на улиците“, велат од општината преку допис.
Додаваат дека секој предлог од граѓаните е важен и помага овој процес да биде инклузивен и успешен за граѓаните и градот Тетово.
Македонија
Тошковски: Припадниците на МВР денеска примија плата зголемена за 10 отсто

Припадниците на МВР денеска примија плата зголемена за 10 отсто, информира министерот за внатрешни работи, Панче Тошковски.
„Изминативе години сосема оправдано имаше критики дека платите во МВР се ниски, а очекувањата и одговорностите големи. Често се укажуваше на разлики во однос на некои сродни служби, а чувството на потценетост беше реално и оправдано. Ова зголемување не е доволно, но е еден од многуте чекори што ќе следат во насока на враќање на достоинството и угледот на полицаецот. Целта е јасна – да изградиме модерна, професионална и силна полиција која ќе биде вистински сервис на граѓаните. Продолжуваме понатаму кон обезбедување на подобри услови, поголема поддршка и вистинско вреднување на трудот што секојдневно се вложува“, напиша Тошковски во објавата на социјалните мрежи.