Македонија
Османи: Западен Балкан ќе го трансформираме во единствен пазар, според стандардите на ЕУ

Министерот за надворешни работи, Бујар Османи, во просториите на Министерството одржа работен појадок со амбасадорите од земјите на Западен Балкан.
На појадокот присуствуваа и амбасадорот на Бугарија, Aнгел Ангелов, и амбасадорката на Германија, Анке Холштајн, кои имаа свои воведни обраќања.
Како што објаснуваат од Министерството, оваа иницијатива на Османи е дел од дипломатските активности на министерот за редовна координација на земјите од Западен Балкан во пресрет на годинешниот софиски самит, во рамките на Берлинскиот процес, да се направи пресек на досегашните постигнувања, но и осврт за очекувањата од самиот процес.
„Би сакал да објавам дека минатата недела ние земјите од Западен Балкан, секако помогнати и од нашите колеги од Советот за регионална соработка (RCC), успеавме да финализираме многу важен документ официјално со наслов ‘Повеќегодишен акциски план за заеднички регионален пазар’. Тоа претставува важна пресвртница за Западен Балкан со визија за трансформирање на регионот во практично еден пазар заснован на правилата и стандардите на ЕУ. Одиме кон зголемување на неговата привлечност и конкурентност во исто време, но намалувајќи го растојанието до пазарите на ЕУ – што е секако наша крајна цел“, истакна Османи.
На средбата се разговараше и за другите иницијативи и очекувања од заедничкото копретседавање меѓу Северна Македонија и Бугарија со Берлинскиот процес.
„Напорно работиме, заедно со нашите колеги од Бугарија, за да имаме навистина квалитетна финализација на нашето копретседателство преку успешен дводневен самит во Софија. Регионалната соработка, покрај големото значење за европските перспективи, значи и зголемена економска, културна и општествена размена, што само по себе претставува важна придобивка за граѓаните на нашите земји“, рече Османи.
Тој додаде дека од заеднички интерес е целокупниот успех на овој процес, кој претставува значајна иницијатива за регионално инфраструктурно и економско поврзување на земјите од Западен Балкан како важни одредници за европските перспективи на земјите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Победивме убедливо во првиот круг во Струмица, дваесет години чекавме на овој ден, рече Мицкоски и кажа дека Орце Ѓорѓиевски оди во втор круг

Историски резултати се бележат на овие избори и според премиерот и претседател на ВМРО – ДПМНЕ, Христијан Мицкоски. Тој доцна вечерва кажа дека победиле во првиот круг во над 30 општини меѓу кои и во општини каде градоначалници досега имаше СДСМ.
„Драги пријатели, имаме победа во над 30 општини уште во првиот круг. Разликата е 2:1, некаде 3:1, а некаде и многу поголема. Имаме победа и во општини во кои СДСМ имаше свои градоначалници. Победивме убедливо во првиот круг во Струмица. Дваесет години чекавме на овој ден, дваесет години. Имаме победа и во Делчево, победивме и во Берово, убедлива победа имаме и во Битола, во Прилеп, во Штип, во Кавадарци, во Гевгелија, во Свети Николе, во Охрид во Карбинци, во Демир Хисар, во Новаци, Градско, Бутел, Ѓорче Петров, Гази Баба, Кисела Вода, Сопиште, Илинден. Петровец, Јегуновце, Велес, Радовиш, Ресен и така натаму“, рече Мицкоски.
Во втор круг оди кандидатот за градоначалник на Скопје од ВМРО-ДПМНЕ, Орце Ѓорѓиевски кој до последен момент пред изборниот молк беше уверен дека ќе победи во првиот круг.
„Орце има огромно водство, неколкупати повеќе од својот противкандидат во Скопје. И таму извесен победник е Орце во вториот круг. Водиме во Карпош, таму Сотир се бореше против сите сојузи и подземни игри и сигурен сум дека ќе имаме победа во вториот круг. Јасно е дека граѓаните бараат промени во Карпош“, рече Мицкоски.
Овие избори тој вели дека се и порака за Демократската унија за интеграција.
„Кога Али Ахмети се удираше во гради дека менувал премиери реков полека, смири се, непријатно ќе бидеш изненаден по резултатот. Ова е тој ден. Ова што е најважно е што политиките на етноцентризам, национализам и вештачки теми за орли и зајци и небитни теми за граѓаните, се поразени, а се отвора прашањето за реформи во опозицијата“, рече Мицкоски.
И тој, како и сите останати политичари вечерва повика на обединување во вториот круг во кој, како што рече, нема место за калкулации, поделби и суети.
„Ви благодарам народе на Македониа. Заедно испишуваме историја. Бог да ја благослови Македонија“, рече Мицкоски на крајот од обраќањето вечерва.
Додека Мицкоски зборуваше за победите, во белата палата се скандираше „цело Скопје вмровмски град“ па тој беше принуден да направи паузи, а на почетокот предупреди дека таквото скандирање може да биде извадено од контекст иако е вистина.
Македонија
Јанчев прогласи победа во Кавадарци

По трет пат Кавадарци избра работа, чесност и резултати, објави досегашниот градоначалник на Кавадарци, Митко Јанчев на социјалните мрежи.
„Соодноста е неверојатна – 7:1 за работа, чесност и резултати!
Оваа победа не е само моја, ова е победа на народот, на сите кои веруваат во подобро утре, во фер и посветена работа, во силна Македонија“, порача Јанчев.
Им се заблагодари на граѓаните за поддршката.
„Голема чест е повторно да го имам вашиот глас и вашата вера во мене и во тимот.
Голема благодарност и честитки до советничката листа на ВМРО-ДПМНЕ, до сите кои застанаа зад оваа победа, со работа, со идеја, со срце и душа!
Продолжуваме уште посилно, со истата љубов и со уште поголема одговорност.
Кавадарци да биде пример за развој, чесност и успех“, вели Јанчев.
Македонија
Димитриевски објави убедливо водство во Куманово, советничката листа на ЗНАМ во овој град со извојувана победа

Избори според скандинавски модел, ваква е оценката на лидерот на ЗНАМ, Максим Димитриевски за денешниот изборен ден.
Овој пат како што рече ниту во Куманово, ниту во Македонија не се забележува како кандидатите за градоначалници ги бркаат полициски тимови или дополнително се врши притисок на сите нив.
„Според 80% обработени податоци во нашиот аналитички центар, јас како кандидат водам убедливо во однос на сите останати шест кандидати, или за споредба, колку имаат вкупно гласови останатите шест кандидати толку јас како кандидат на ЗНАМ со поддршка на ВМРО-ДПМНЕ имам добиено гласови. Дали ќе имаме втор круг или не, во овој момент не можам да ви кажам бидејќи сите податоци не се обработени. Но и да има втор круг, ЗНАМ ќе биде дефинитивно победник на претстојните избори на локално ниво, бидејќи повеќе од јасна е желбата на граѓаните и дека препознаваат континуитет и развој на овој град и сакаат Куманово да продолжи да се развива во тој дух“, рече Димитриевски.
Листата на кандидати за советници на ЗНАМ во општина Куманово, според него, извојува победа и доби најголем број на гласови.
„Веднаш зад нас е и листата на ВМРО-ДПМНЕ и повеќе од јасно е дека мнозинството во Советот ќе го сочинуваат овие две листи и веројатно останатите поранешни партнери во локалната власт“.
.