Македонија
Османи: Западен Балкан ќе го трансформираме во единствен пазар, според стандардите на ЕУ

Министерот за надворешни работи, Бујар Османи, во просториите на Министерството одржа работен појадок со амбасадорите од земјите на Западен Балкан.
На појадокот присуствуваа и амбасадорот на Бугарија, Aнгел Ангелов, и амбасадорката на Германија, Анке Холштајн, кои имаа свои воведни обраќања.
Како што објаснуваат од Министерството, оваа иницијатива на Османи е дел од дипломатските активности на министерот за редовна координација на земјите од Западен Балкан во пресрет на годинешниот софиски самит, во рамките на Берлинскиот процес, да се направи пресек на досегашните постигнувања, но и осврт за очекувањата од самиот процес.
„Би сакал да објавам дека минатата недела ние земјите од Западен Балкан, секако помогнати и од нашите колеги од Советот за регионална соработка (RCC), успеавме да финализираме многу важен документ официјално со наслов ‘Повеќегодишен акциски план за заеднички регионален пазар’. Тоа претставува важна пресвртница за Западен Балкан со визија за трансформирање на регионот во практично еден пазар заснован на правилата и стандардите на ЕУ. Одиме кон зголемување на неговата привлечност и конкурентност во исто време, но намалувајќи го растојанието до пазарите на ЕУ – што е секако наша крајна цел“, истакна Османи.
На средбата се разговараше и за другите иницијативи и очекувања од заедничкото копретседавање меѓу Северна Македонија и Бугарија со Берлинскиот процес.
„Напорно работиме, заедно со нашите колеги од Бугарија, за да имаме навистина квалитетна финализација на нашето копретседателство преку успешен дводневен самит во Софија. Регионалната соработка, покрај големото значење за европските перспективи, значи и зголемена економска, културна и општествена размена, што само по себе претставува важна придобивка за граѓаните на нашите земји“, рече Османи.
Тој додаде дека од заеднички интерес е целокупниот успех на овој процес, кој претставува значајна иницијатива за регионално инфраструктурно и економско поврзување на земјите од Западен Балкан како важни одредници за европските перспективи на земјите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Талески до Тошковски: Кој ќе одговара за пропустите на МВР за трагедијата во Кочани

Пратеникот на СДСМ, Миле Талески, на денешната собраниска седница посветена на пратенички прашања упати прашање до министерот за внатрешни работи, Панче Тошковски, кое се однесуваше на одоворност за пропустите на МВР за трагедијата во Кочани, во која животот го загубија 59 луѓе, а над 200 беа повредени.
Toj ги потенцира сите пропусти на МВР и повика на неселективна истрага и утврдување на одговорноста.
Талески вели дека ваква трагедија, со толку многу жртви и повредени, повикува на неселективна истрага и утврдување одговорност.
„Досега нема одговор на најважните прашања: за потфрлањето на безбедносниот систем, кој е одговорен за пожарот во кобната ноќ и кој дозволи таков настан со присуство на толку луѓе и малолетници. Клучната улога за безбедноста на граѓаните, за сигурноста на јавните собири, за превенцијата и спречување потенцијални настани со огромни последици е во Министерството за внатрешни работи. Затоа ќе поставам прашања до министерот за внатрешни работи, кој раководи со ова Министерство и е најодговорен за неговата работа и постапувањето. Господине Тошковски, механизмите за контрола под надлежност на МВР покажуваат алармантни пропусти непосредно пред и за време на кобниот настан на Бирото за јавна безбедност, на ОВР Кочани и СВР Штип.
Факт 1. Законот за јавни собири јасно наведува дека за собири со повеќе стотици лица – како што беше овој настан со 650 присутни – полицијата има обврска да има оперативни сознанија и да преземе мерки за обезбедување, дури и ако собирот не бил формално пријавен.
Стандардните процедури во вакви случаи вклучуваат 1) формирање на оперативен штаб најмалку во ОВР Кочани, 2) Комуникација со сите СВР за можни ризици и присуство на организирани групи и 3) Превентивно зголемување на полициското присуство.
МВР не подготвила официјален план за обезбедување на настанот, што е стандардна процедура при јавни собири со голем број посетители. Овој пропуст значително ја намалил способноста за контрола и управување со ризици, особено во случај на итни ситуации.
Факт 2. МВР, односно БЈБ, СВР Штип и ОВР Кочани, не направиле ниту план за процена на ризик. Без разлика што немало официјално известување, настанот бил јавно објавен и најавен, а покрај тоа немало комплетен безбедносен план.
Значи МВР – конкретно во Кочани – не постапило по закон. Да постапеше, на местото на настанот ќе имало полиција, противпожарна бригада, брза помош и безбедносен план кој можеше да спаси животи.
Факт 3. МВР е директно одговорно за контрола на процесот на употреба и давање дозвола за користење на пиротехника во затворен простор, што е единствена причина за пожарот, а БЈБ е одговорно за обезбедување на јавната безбедност.
Факт 4. МВР не презел никакви активности за прекинување на настанот кобната вечер, иако непосредно пред случување на несреќата во клубот имало полицајци, ама во 2 часот полноќ. Увиделе присуство на малолетници, присуство на пиротехника, затекнале настан кој се случува непријавено, во клуб за кој биле должни да знаат дека не поседува валидна лиценца и не презеле ништо.
И уште еден факт. По смената на началниците, сопственикот првин го реновирал клубот, па го отворил во ноември, исто така со јавна најава. Немал лиценца, полицајците оделе во акциски контроли во диво кабаре, а не спречиле ништо.
Доколку МВР преку своите ОВР и СВР постапеле по кој било од наведените 4 основи, немало да има ваква трагедија.
Ова го покажува директното непостапување на службениците на МВР, особено Бирото за јавна безбедност и службениците во СВР Штип и ОВР Кочани.
Господине Тошковски, мото прво прашање е: Кој ќе одговара за овие институционални и системски пропусти во МВР? Ама не лани, не пред две години, туку на денот на несреќата, 16 март 2025 година?“, додаде Талески.
Македонија
В недела се враќа студот, наместа ќе паѓа и снег

Денес попладне и во текот на ноќта, во западните, а утре и во источните делови, ќе има повремени врнежи од дожд, наместа пообилни од над 15 литри на квадратен метар.
В сабота ќе има услови за локална појава на нестабилност со пороен дожд, грмежи и засилен ветер.
В недела ќе има брз продор на студена воздушна маса од север и ќе има врнежи од дожд, на планините и на повисоките места снег. Ќе дува засилен северен ветер, температурите значително ќе опаднат и врнежи од снег се очекуваат и во некои од пониските места. В понеделник наместа ќе има провејување слаб снег, а утринските температури на повеќе места ќе бидат негативни.
Потоа следува период на стабилно и постудено време со утрински температури кои насекаде ќе бидат по нулата.
Во Скопје, попладне и во текот на ноќта, ќе има врнежи од дожд, во делови од котлината повремено пообилни (10-15 л/м2). Утре ќе се задржи променливо облачно време со повремен дожд. В сабота ќе има преодно стабилизирање на времето, а в недела ќе биде претежно облачно, ветровито и студено со повремени врнежи од дожд. Во вечерните часови во повисоките делови од котлината ќе има услови за повремен слаб снег.
Македонија
Тошковски не кажа како службена тајна завршила кај обезбедувачот на премиерот за да не ја осуети истрагата

Министерот за внатрешни работи Панче Тошковски и утрово порача дека неселективно ќе се бори против криминалците и кога тие доаѓаат од редовите на Министерството за внатрешни работи, но не кажа како документите класифицирани како службена тајна завршиле кај обезбедувачот на премиерот Христијан Мицкоски. Одговарајќи на новинарски прашања по обраќањето на дебатата „Безбедноста на пешаците – одговорност на сите нас“, министерот Тошковски најави дека ќе сподели детали кога ќе заврши истрагата.
„Во овој момент не би сакал да откривам детали од истрагата. Кога ќе ги имаме потребните информации и кога ќе можеме, ќе ги споделиме“, кусо одговори министерот Тошковски на прашањето како обезбедувачот дошол до документите што ги користел за изнуда.
Тошковски потврди дека е вознемирен од случајот исто како и другите припадници на МВР.
„Сите во МВР се вознемирени кога гледаат дека некој криминалец се прикривал со униформа, без разлика дали таа униформа е свечена, дали е тактичка или униформа што ја носат припадниците на одделот за обезбедување имот и лица“, рече министерот Тошковски.
Кривичната пријава против обезбедувачот на премиерот за Тошковски е иста како и кривичните пријави што во минатото биле поднесувани против криминалците од редовите на МВР. Одделот за внатрешна контрола по добиените информации за случајот во рамките на спроведувањето на истрагата, веднаш известил надлежен јавен обвинител, кој уште истата вечер издал наредби да се преземат дејства.
Обезбедувачот на премиерот за 50.000 евра откривал полициски службени тајни од истрага. Обвинителството извести дека тој на 30 март годинава, на паркинг пред хотел во Велес се сретнал со сведок во постапка и му покажал документи на МВР, кои се службена тајна. Обвинителството побара, а судот прифати 30-дневен притвор за обезбедувачот.