Македонија
Османи на министерски состанок за мировните операции на Обединетите нации

Министерот за надворешни работи, Бујар Османи, учествуваше на министерскиот состанок на Обединетите нации за мировни операции, кој се одржа виртуелно, во организација на министерот за надворешни работи на Република Кореjа, Чунг Еуи-јонг, и министерот за национална одбрана, Су Вок, заедно со генералниот секретар на Обединетите нации, Антонио Гутереш.
Во своето обраќање Османи ја реафирмира посветеноста на земјата кон мултилатералната соработка како еден од приоритетите на надворешната политика на Северна Македонија, во која, меѓу другото, спаѓа и соработката во делот на мировните операции во рамките на ОН и зачувување на мирот.
„Северна Македонија е целосно посветана и решена да продолжи со своите заложби во делот на зголемено учество во мировните операции на ОН преку зајакнување и обучување на своите капацитети, особено водејќи сметка и за еднакво учество на жените во мировните процеси или во делот на превенцијата“, истакна министерот Османи.
Воедно, министерот Османи истакна дека земјата целосно ги подржува реформите преземени од страна на генералниот секретар Гутереш за поефикасни мировни операции, кои, иако се соочуваат со предизвици, се важен инструмент за зајакнување на мирот и безбедноста во светот.
На сесијата посветена на одржување на мирот, на која учествуваше Османи, беше изразена силна поддршка за превентивната дипломатија како основа за градењето на мирот, што како процес е од суштинско значење за одржлив мир и стабилни општества.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Осомничен за трговија со дрога ја искинал наредбата за претрес во неговиот дом

Oбвинителството поведе истрага против едно лице за неовластено производство и пуштање во промет наркотични дроги. Тој е осомничен и за одземање или уништување службен печат или спис.
Осомничениот, во својот дом во Гевгелија, неовластено заради продажба држел 26,42 грама наркотична дрога кокаин. Дрогата и повеќе други предмети со траги од кокаин биле пронајдени на 1 август, при претрес во неговата јакна закачена во ходникот од семејната куќа.
При претресот, полициските службеници на осомничениот му ја предале и прочитале издадената наредба за претрес од судијата на претходна постапка при Основниот суд Гевгелија. Наредбата примена во МВР и со службен печат на МВР, тој ја зел и ја искинал пред службените лица и на тој начин оштетил спис кој припаѓа на државен орган, односно наредба издадена од Основен суд Гевгелија и примена од МВР ОВР Гевгелија.
Бидејќи постојат законски основи, надлежниот јавен обвинител до судијата на претходна постапка достави предлог за определување мерка притвор за осомничениот.
Македонија
Цела ноќ борба со огнот во велешката фабрика – изгореа магацин со фрижидери и канцеларии со документи

Пожарот што синоќа избувна во фабриката за прехранбени производи „Мирана“ во Велес бил целосно локализиран рано утрово, околу 4 часот. Според информациите од надлежните, огнот зафатил магацински простор и канцеларии, а на неколку места сè уште се забележува слабо чадење.
Пожарот бил пријавен околу 22 часот. Горел магацин каде што имало пластична амбалажа, фрижидери и друг материјал, како и канцелариски простории со документација.
Во гаснењето учествувале три противпожарни возила од ТППЕ Велес со екипи од три смени, возило од ЈКП „Дервен“, како и две специјални возила на Дирекцијата за заштита и спасување. На терен биле и шестмина полициски службеници од Велес.
Иако пожарот е ставен под контрола, службите сè уште се на терен за да спречат повторно разгорување, со оглед дека на одредени локации сè уште се јавуваат чадења.
Причините за избувнувањето на пожарот сè уште се испитуваат.
Македонија
Голем пожар во фабрика во Велес

Синоќа избувна голем пожар во фабриката за храна „Мирана“, лоцирана во индустрискиот блок на Велес, потврдија надлежните.
На барање на Територијалната противпожарна единица Велес, привремено беше исклучена електричната енергија во фабриката.
„Во Велес, кај индустрискиот блок, опожарена е фабриката ‘Мирана’. По барање на ТППЕ Велес, исклучена е струјата во фабриката. Единиците за гаснење на пожарот се на терен“, информираше директорот на ЦУК, Мухамед Али.
Директорот на ДЗС, Стојанче Ангелов, информираше доцна синоќа дека нема информации за повредени лица при пожарот.
Причините за избувнувањето сè уште не се познати.