Вицепремиерот задолжен за европски прашања, Бујар Османи, кој е во работна посета на Финска, оствари средба со министерот за европски прашања, Само Терхо, на која беа отворени темите за процесот на проширување на Унијата со земјите од Западен Балкан, како и евро-атлантските перспективи на Македонија.

Од кабинетот на Османи соопштија дека имајќи ја предвид успешната примена на двојазичност во рамките на финската администрација, каде што, покрај финскиот, во целосна службена употреба е и шведскиот јазик, Османи побарал поддршка во знаење, размена на искуство и начин на имплементација во согласност со потребите за усогласување на администрацијата и во Македонија со новиот закон за употреба на албанскиот јазик.

„Доаѓам во веројатно најважниот период за нашите европски интеграции, веднаш по успешната имплементација на договорот од Преспа, што претставува историска пресвртница не само за нашата земја туку и за целиот регион“, истакна Османи на почетокот од средбата.

Презентирајќи ја динамиката на спроведувањето на реформите од планот 18, Османи ја потенцира интенцијата на Владата да ги имплементира практично сите преземени обврски создавајќи со тоа услови за чиста и беспрекорна препорака од страна на Европската комисија, која би водела до конфирмација на одлуката за почеток на преговорите од страна на Европскиот совет во јуни оваа година.

„Европската идеја на Балканот има смисла само доколку процесот добие вистинска валоризација преку конфирмација на одлуката и почеток на преговорите со Македонија од страна на Европскиот совет во јуни оваа година“, истакна Османи изразувајќи надеж дека во рамките на претседателството на Финска со ЕУ, во втората половина од оваа година, Македонија и ЕУ ќе ја реализираат и првата меѓувладина седница, со што и формално ќе почнат билатералните преговори.

Во рамките на посетата на владата на Финска, Османи оствари средба и со Нина Нуркала, специјална советничка за европски прашања на премиерот Јуха Сипилја, како и со делегацијата на Министерството за надворешни работи, предводена од државниот секретар, Самули Виртанен. Во рамките на посетата на Финска, Османи оствари посета и на финскиот парламент, каде што имаше средба со делегацијата на Комисијата за европски прашања, предводена од претседавачот Артон Сатонен. На маргините на средбата Османи имаше можност да го посети и Европскиот центар на извонредност, посветен на борбата против современите хибридни закани, кој работи под покровителство на Европската Унија и НАТО, а се наоѓа во Хелсинки.