Македонија
Османи учествува на Бледскиот стратешки форум во Словенија

Министерот за надворешни работи на Република Северна Македонија, Бујар Османи учествува на Бледскиот стратешки форум, во организација на Министерството за надворешни работи на Република Словенија на тема „Солидарност за глобална безбедност”, при што во вторник ќе се обрати на министерскиот панел посветен на политиката на проширувањето на ЕУ 20 години по Солунската агенда.
Агендата во Блед вчера Османи ја започна со средба со Претседателот на Европскиот совет, Шарл Мишел заедно со Премиерот, Димитар Ковачевски и Вице-премиерот за европски прашања, Бојан Маричиќ.
На маргини на Бледскиот стратешки форум Османи ќе учествува на работниот појадок со министри за надворешни работи и специјални претставници за Западен Балкан, организиран од министерката за надворешни работи на Словенија, Тања Фајон, извести МНР.
Исто така, за време на работната посета во Словенија, Османи ќе оствари бројни билатерални средби, вклучувајќи и со министерот за надворешни работи на Република Кореја, Парк Џин, со државната секретарка за европски прашања на Франција, Лоранс Бун, државната секретарка за европски прашања на Португалија, Тиаго Антунес, специјалниот претставник на Обединетото Кралство за Западен Балкан, Лорд Стјуарт Пич, со членот на Државниот совет на Франција и поранешен советник на францускиот претседател, Александре Адам, како и со лидерката на белоруската опозиција, Светлана Тихановскаја, се додава во соопштението на МНР.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Се излеа Маркова Река кај Батинци

Маркова Река се излеа денес по обилните врнежи од дожд.
Во селото Батинци, водата е надојдена, излевајќи се на неколку места околу речното корито.
Ангажирана е механизација за санирање на штетата, а градоначалник на Студеничани, Азем Садики, објави дека забележана е материјална штета во дворовите од куќите кои се наоѓаат во близина на реката.
Засега, според градоначалникот, нема потреба од евакуација.
Фото: ТВ21/скриншот
Македонија
Тетово повика на јавна дебата за промена на имињата на улиците

Општина Тетово в петок, со почеток во 15:00 часот, организира јавна дебата за предлози за имиња на улиците.
„Ги повикуваме сите граѓани, здруженија, невладини организации и граѓанскиот сектор да учествуваат на оваа јавна дебата за именување на улиците“, велат од општината преку допис.
Додаваат дека секој предлог од граѓаните е важен и помага овој процес да биде инклузивен и успешен за граѓаните и градот Тетово.
Македонија
Тошковски: Припадниците на МВР денеска примија плата зголемена за 10 отсто

Припадниците на МВР денеска примија плата зголемена за 10 отсто, информира министерот за внатрешни работи, Панче Тошковски.
„Изминативе години сосема оправдано имаше критики дека платите во МВР се ниски, а очекувањата и одговорностите големи. Често се укажуваше на разлики во однос на некои сродни служби, а чувството на потценетост беше реално и оправдано. Ова зголемување не е доволно, но е еден од многуте чекори што ќе следат во насока на враќање на достоинството и угледот на полицаецот. Целта е јасна – да изградиме модерна, професионална и силна полиција која ќе биде вистински сервис на граѓаните. Продолжуваме понатаму кон обезбедување на подобри услови, поголема поддршка и вистинско вреднување на трудот што секојдневно се вложува“, напиша Тошковски во објавата на социјалните мрежи.