Македонија
Отворена реновираната спортска сала во ООУ „Невена Георгиева-Дуња”, инвестиција вредна 4 милиони денари

Градоначалникот Орце Ѓорѓиевски, сопственикот на „Адора инженеринг“, Ванчо Чифлиганец, и ракометарот Борко Ристовски денес ја пресекоа лентата и ја пуштија во употреба целосно реновираната спортска сала во ООУ „Невена Георгиева-Дуња“. Се работи за инвестиција во вредност од речиси 4 милиони денари, кои се искористија за темелна реконструкција на руинираниот објект изграден по катастрофалниот земјотрес.
„Се наоѓаме во училишната спортска сала на ООУ ‘Невена Георгиева-Дуња’, која за нешто помалку од 3 месеци претпре сериозна реконструкција за децата, за разлика од минатото, да имаат далеку подобри услови за спортување. Инаку, оваа сала е изградена непосредно по земјотресот и во неа изминативе 60 години не беше вложено буквално ништо. Бидејќи Општината не можеше сама да го направи овој финансиски чекор, сакам да ѝ се заблагодарам на компанијата „Адора инженеринг“ и на нејзиниот сопственик Ванчо Чифлиганец, кои се приклучија во цела оваа работа за денес да добиеме ваков убав, нов спортски бисер во Кисела Вода, кој ќе го користат младите генерации. За нив сме должни да создаваме подобри услови за живеење и подобра иднина“, изјави градоначалникот Ѓорѓиевски наведувајќи ги извршените градежни зафати во овој објект.
Во училишната спортска сала е извршена целосна термоенергетска обнова на ѕидовите. На подот, кој има површина од 430 квадратни метри, е поставен паркет. Целосно се променета електричната инсталација и осветлението, саниран е и системот за вентилација. Соблекувалните и помошните простории се варосани и обложени со плочки, а променета е и влезната врата. Санација претрпе и постојната покривна конструкција. Спортските реквизити беа санирани и репарирани, а извршено е дополнување со нови. На барање на Општина Кисела Вода, БЕГ постави нов приклучок со потстаница, со што салата доби и парно греење.
„Концептот на покажување општествена одговорност токму ова го подразбира – кога помошта се дава на вистинското место и во вистинскиот момент“, истакна градоначалникот Ѓорѓиевски, кој му додели благодарница на Ванчо Чифлиганец – „Адора инженеринг“ за финансиската поддршка при реализацијата на овој проект. Благодарница за континуираната поддршка на развојот на спортот во општина Кисела Вода доби и голманот Борко Ристовски.
На настанот присуствуваа и познатиот ракометар Аце Станковски и судијата Ѓори Начевски. По свеченото отворање, во салата влегоа основците од ООУ „Невена Георгиева-Дуња“, кои во ведра атмосфера го одржаа часот по физичко заедно со спортистите и градоначалникот на општината.
По онаа во ООУ „Партенија Зографски“, oва e втората училишна спортска сала што целосно е реконструирана за овие шест месеци откако на чело на Општина Кисела Вода е градоначалникот Орце Ѓорѓиевски. Тој најави сериозни инвестиции и во периодот што следува.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ВМРО-ДПМНЕ вели дека економијата се стабилизира од пустошот и хаосот кој го остави СДСМ

Економијата се стабилизира од пустошот и хаосот кој го остави СДСМ после 7 години катастрофално менаџирање, лоши економски политики и отсуство на мерки и проекти, велат од ВМРО-ДПМНЕ.
„После 7 години откако СДС ја уништи економијата и го срози стандардот на граѓаните, од голем минус стопанството и трговијата во индустријата се стабилизираа. Индикаторите за првиот месец од вториот квартал се високи, што покажува дека состојбата е стабилизирана во рамките на нула. Имаме раст на трговијата во индустријата од 6%, раст на преработувачката индустрија од 6,6%. Раст на прометот со трговијата во индустријата на меѓународниот пазар, каде имаме многу повеќе раст од домашниот. Прометот во трговијата во индустријата надвор е околу 7,5 – 7,6 проценти. За краток период Владата предводена од ВМРО ДПМНЕ исто така успеа да ги стабилизира буџетските приходи, и енормно да ја зголеми довербата на инвеститорите. Владата работи посветено со домаќински скроен буџет, се зголемија платите во клучни сектори како здравство, образование, полиција, се работи на конкретни мерки и проекти за намалување на невработеноста со цел подобар и поквалитетен живот на граѓаните“, се вели во соопштението на ВМРО-ДПМНЕ.
Македонија
Денес протест пред МВР поради одложеното рочиште за убиството на кучето Феликс

Денеска пред Министерството за внатрешни работи во 12 часот ќе се одржи протест поради одложеното рочиште за убиството на кучето Феликс.
Протестот го организира граѓанската иницијатива „Зелен хуман град“ заедно со активистички здруженија и групи за заштита на животните од држава.
-На 15 јуни во 12 часот ве повикуваме на мирен, но гласен и масовен протестен марш што ќе започне пред Министерството за внатрешни работи! Кога едно убиство — најтежок облик на кривично дело — останува неказнето, тоа е тешка повреда на правниот и на моралниот поредок во целото општество. Кога убиец останува на слобода се губи доверба во институциите (полиција, обвинителство, судство), се праќа порака дека животот нема вредност, се поттикнува култура на страв и молчење, наместо правда и одговорност, а насилството се нормализира! Кога нема казна, има повторување! Правдата не е избор, туку обврска на секое демократско и хумано општество! Феликс — симбол на добрината, верноста и кроткоста — беше брутално убиен. Феликс не беше само уште едно бездомно куче, не беше само уште една несреќна жртва! Неговото убиство не смее да помине неказнето! Правдата не дискриминира по вид. Живот е живот! Судот мора да изрече затворска казна ако сакаме и најмал зрак на надеж дека слични дела нема да се повторуваат во иднина!, велат од здруженијата.
Здруженијата бараат итно расчистување на случајот и максимална затворска казна за сторителот Љубе Крстевски како и за неговиот соучесник Бранко Билбиловски, воведување минимум од една година задолжителна затворска казна за кривичното дело убиство и мачење животни од Кривичниот законик, формирање локални (општински служби за заштита на животните), донесување закон за Комунална полиција (со полиција за животни), превентивни мерки за редуцирање на насилството врз животните и системска едукација.
Македонија
По половина час се чека на граничните премини Табановце и Богородица

На граничните премини Табановце и Богородица, времето на чекање за влез и излез од државата изнесува околу 30 минути. На останатите гранични премини од македонска страна, нема подолги задржувања за влез и излез од државата.
Сообраќајот на државните патишта се одвива непречено, по суви коловози. Интензитетот на сообраќај на патните правци надвор од градските средини е умерен.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.