Македонија
Отвореноста и транспарентноста на извршната власт се во застој, укажуваат резултатите од Индексот на отвореност
Денес, на 19-ти јуни, под насловот „Посветеност кон отвореност за долготрајни успеси“, Фондација Метаморфозис одржа презентација и дискусија на резултатите од Проценката на состојбата на добро владеење во Северна Македонија преку Индексот на отвореност за извршната власт.
Мониторирањето се спроведува осма година по ред, регионално, во Северна Македонија, Србија, Црна Гора и Босна и Херцеговина и сумираните регионални резултати ќе бидат објавени во септември, додека фокусот на денешниот настан беше на националните резултати.
Резултатите ги презентираше програмската директорка на Фондацијата Метаморфозис, Данче Даниловска-Бајдевска. Таа нагласи дека нашата земја е единствена од регионот со Стратегија за транспарентност на Владата, но имплементирањето на стратегијата, сепак се одвива бавно.
Главните заклучоци од овогодинешното мониторирање покажуваат дека напредокот во зголемување на транспарентноста и отвореноста на извршната власт (министерствата и органите во состав) е во застој, подобрените резултати од минатото се застанати на одредено ниво, па не постои значајно поместување во последните години. Затоа се препорачува засилена имплементација на постојните политики со кои се унапредува отвореноста од страна на министерствата и извршните органи, со цел да се постигне напредок во отвореноста.
Мониторирањето се врши осма година по ред, а сумираните национални резултати може да се погледнат на следниот линк.
Како што посочи Даниловска-Бајдевска, сите овие процеси, односно преземени активности за унапредување на отвореноста во суштина ѝ помогнаа на Република Северна Македонија во континуитет во последните пет години да биде земја чија Влада е највисоко на скалата на отвореност во регионот.
Во овогодинешното мерење на Индексот на отвореност (2023 г.), Владата исполнува 78,33% од поставените критериуми за отвореност што повторно е најдобар резултат на регионално ниво. На првото регионално мерење за отвореноста на извршната власт во 2016 г. Република Северна Македонија беше на последно место во регионот и исполнуваше само 36% од индикаторите. Сепак, треба да се напомене дека споредено со минатата година, Владата има незначителен пад во исполнувањето на индикаторите за отвореност.
На настанот беше претставена работата и значењето на Партнерството за отворена власт (ПОВ), како и заложбите од шестиот Национален акциски план за кој говореше Гордана Гапиќ-Димитровска од Министерството за информатичко општество и администрација, како национален координатор за ПОВ.
Партнерството за отворена власт е значаен процес кој е единствен по својата управувачка структура – во Советот за ПОВ учествуваат еднаков број претставници на граѓанските организации, избрани преку Мрежата за ПОВ, и државните институции.
Фондација Метаморфозис е координатор на Мрежата граѓански организации за ПОВ. Улогата на мрежата е да го мобилизира и координира застапувањето на граѓанското општество за прашањата на ПОВ, односно претставува мрежа на активни граѓански организации кои работат посветено да ги поттикнат институциите на поодговорно работење, зголемена транспарентност, учество и отчетност.
Настанот е дел од синергија помеѓу проектите „Транспарентност и отчетност на државните институции во РСМ“ кој го спроведува Фондација Метаморфозис со финансиска поддршка од Фондација Отворено Општество-Македонија, и проектот “Користење на новите медиуми за промовирање на владината транспарентност” кој го спроведува Фондација Метаморфозис како дел од партнерскиот конзорциум ACTION SEE со финансиска поддршка од Националниот фонд за демократија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Филипче: Бошњачката заедница е нераскинлив дел од нашето мултиетничко општество
Претседателот на Социјалдемократскиот сојуз на Македонија, Венко Филипче, вечерва присуствуваше на одбележување на Меѓународниот Ден на Бошњаците, во организација на Странката на демократска акција на Македонија (СДА).
Во обраќањето пред присутните, Филипче прача дека бошњачката заедница е нераскинлив дел од општеството и има значаен придонес во развојот и напредокот на Северна Македонија.
„Граѓаните Бошњаци по измените на Уставот од 2001 година, станаа дел од преамбулата и на нашиот Устав. Со нивната традиција, како составен и нераскинлив дел од нашето мултиетничко општество, имаат значаен придонес во развојот и напредокот на државата. Бошњачката заедница во Северна Македонија активно се вклучи во успешниот концепт „Едно општество за сите“, со кој Северна Македонија сега е пример во Ервопа и регионот за дијалог, меѓусебно разбирање и почитување“, рече Филипче.
Воедно, претседателот на СДСМ, Филипче ја потенцираше важноста на Странката на демократска акција на Македонија (СДА), која како коалициски партнер на СДСМ, изминативе години даде поддршка на развојните политиките во периодот на Владата на СДСМ.
„Во основното образование за учениците Бошњаци се врати редовната настава на босански јазик, Северна Македонија и Босна и Херцеговина потпишаа серија на билатерални договори во интерес на граѓаните,Скопје и Сараево станаа збратимени градови. Со својата прогресивна идеологија во изминатите години, СДА активно учествуваше во сите процеси кои ја придвижија државата напред, како што е членството во НАТО и започнувањето на преговорите со Европската Унија“, рече Филипче, додавајќи дека токму тоа и е разликата СДСМ и актуелната власт .
Филипче во своето обраќање нагласи дека СДСМ и СДА и во иднина ќе делуваат заеднички и ќе се залагаат за соживот,меѓусебна почит и интеграција на државата.
„ За жал деновиве сме сведоци на едни политики кои ја враќаат државата назад во изолација, нешто за што граѓаните не гласаа. И тоа не смееме да го дозволиме, не смееме да се откажеме од европскиот пат, од европска иднина за нашите граѓани. СДСМ и СДА и понатаму ќе продолжат да делуваат заеднички, ќе се залагаме за демократските вредности и инклузија на сите заедници, за интеграција, а не за изолација на државата“, порача претседателот на СДСМ, Венко Филипче.
Македонија
Промена на времето: УХМР за утре најавува дожд, силен ветер и драстичен пад на температурите
Управата за хидрометеоролошки работи најавува значителна промена на времето утре – дожд, засилен ветер и пад на температурата.
Утре под влијание на влажна и постудена воздушна маса од север ќе настапи позначителна промена на времето. Од утринските часови најпрвин во северните делови, ќе има повремени врнежи од дожд и локална појава на грмежи. Ќе дува силен ветер (наместа над 70км/ч.) кој ќе продолжи и во понеделник.
ИЗВОР: УХМР
Дневната температура значително ќе се намали (утре за 6 до 8, а во понеделник уште за дополнителни 4 до 6 степени). Потоа во следните два дена времето ќе биде сончево со ниски утрински температури, а дневните ќе бидат во пораст.
Во Скопје, утре ќе има повремени врнежи од дожд, локално со појава на ретки грмежи и силен ветер.
Од четврток се очекуваат нови врнежи од дожд.
Македонија
Претседателката Сиљановска Давкова се сретна со генералниот секретар на Советот на Европа, Алан Берсе
Претседателката Гордана Сиљановска Давкова во рамки учеството на 79. Генерално Собрание на Обединетите Нации во Њујорк, оствари средба со генералниот секретар на Советот на Европа, Алан Берсе.
На средбата беа разменети мислења за целите и приоритетите насочени кон демократизацијата на македонското општество, човековите права и владеењето на правото. Реафирмирајќи ја посветеноста за натамошна конструктивна соработка со Советот на Европа, претседателката Сиљановска Давкова изрази задоволство од континураната поддршка за нашето целосно усогласување со европските стандарди и вредности.
Претседателката Сиљановска Давкова ја нагласи важноста од кредибилно постапување на Европската Унија во однос на интеграцијата на земјите од Западен Балкан кога напредокот на поединечните кандидати е евидентно заслужен. Таа се осврна и на неопходното обезбедување усогласеност со обврските што земјите-членки ги презеле, вклучително и правилното спроведување на пресудите на Судот во Стразбур.
Соговорниците разговараа и за актуелните безбедносни состојби во Европа, со акцент на војната во Украина, како и за потребата од посветеност и заеднички пристап кон сегашните и идните предизвици какви што се влијанието на новите технологии и климатските промени врз човечките ресурси.
На средбата претседателката Сиљановска Давкова упати честитки до новоизбраниот генерален секретар на Советот на Европа, Алан Берсе, изразувајќи искрени желби за успешно исполнување на важната мисија и продолжување на плодната соработка со македонските институции.