Вкупно 16 пожари на отворен простор се евидентирани до 12 часот, покажуваат податоците од Центарот за управување со кризи. Од нив, осум се активни, пет се ставени под контрола, а три се целосно изгаснати.

Најмногу активни жаришта има во општина Македонски Брод, каде што се водат битки со три пожари: во близина на селата Црешнево и Локвица, во атарот меѓу селата Рамне и Ковче, и во село Слатина. Пожарите зафатија дабови и мешани шуми, како и ниска вегетација, а еден од нив се проширил од индустриски објект (фабриката Самоков).

Активни пожари има и во: Чучер Сандево, меѓу селата Блаце и Горњани (Рамна шума), Прилеп, кај селото Бешиште, Чашка, под Солунска Глава (само чад, но сè уште под надзор), Дојран, кај селото Николич, Крива Паланка, во атарот на село Градец.

Пет пожари се ставени под контрола, меѓу кои во Ѓорче Петров кај село Орман, Гази Баба, во близина на Смилковско Езеро, Шуто Оризари, на градската депонија, во Кочани, кај Јастебник и Полаки, и во Делчево, на депонијата Острец.

Целосно изгаснати се пожарите во:

Делчево (место викано Брежјето),

Желино, меѓу селата Ларце и Горна Лешница,

и Куманово, во населбата Средорек.

Надлежните апелираат на зголемена внимателност и соработка со службите, особено во подрачјата каде што пожарите се сè уште активни.

За ДУИ, најновиот извештај на европратеникот Томас Вајц во Европскиот парламент претставува алармантно обвинение за насоката во која се движи Северна Македонија под раководство на коалицијата ЗНАМ–ВМРО–ВЛЕН. Овој извештај, велат од партијата на Ахмети, потврдува токму она на што ДУИ со месеци предупредува: државата се претвора во експериментален терен за најдеструктивните антизападни влијанија на континентот.

„Според извештајот, Северна Македонија станала отворен терен за руската пропаганда, за нетранспарентното економско влијание на Кина и за пренесување на овие влијанија преку политички и медиумски мрежи поврзани со концептот на „српскиот свет“. Унгарија и Србија играат улога на посредници, зајакнувајќи го авторитарното присуство и поткопувајќи го евроатлантскиот пат на земјата. Пропагандата против Европската Унија, која се шири преку домашните медиуми, ја злоупотребува идентитетското прашање за да го прикаже интегративниот процес како закана, а не како надеж.

Дополнително, извештајот отвора загриженост за постоење на стари мрежи од тајните служби, кои можат да бидат инфилтрирани и поврзани со странски интереси.

Наместо сериозен одговор, оваа Влада молчи. Наместо да го брани институционалниот суверенитет и западната ориентација на државата, таа дозволува Северна Македонија да тоне во изолација и инструментализација“.

Ова, како што оценуваат од ДУИ, е резултатот кога власта им се предава на туѓи агенди, додека се занемаруваат најважните партнери на државата – Европската Унија и НАТО.

ДУИ алармира, патот што го следи оваа влада е пат на изолација, институционално заробување и поткопување на демократскиот поредок. Како што истакнуваат, иднината на нашите граѓани не лежи во зависноста од авторитарниот Исток, туку во целосната интеграција во европското семејство, со силни институции, транспарентна економија и одржлив мир.

Министерот за надворешни работи и надворешна трговија, Тимчо Муцунски, денеска на прес-конференција во Владата информираше дека статусот на Охридското Езеро како светско природно и културно наследство е зачуван.

„Задоволство ми е да ве информирам дека статусот на Охридското Езеро како светско природно и културно наследство е зачуван. Овој успех е резултат на активна, посветена и координирана дипломатија, во соработка со нашите партнери и пријатели од меѓународната заедница. Заедно покажавме дека кога постои јасна волја, координација и одговорен пристап – резултатите се неминовни.“

Министерот истакна дека уште од првиот ден, заедно со премиерот Христијан Мицкоски, активно се вклучиле во процесот. „Водевме интензивни разговори, спроведовме дипломатски консултации и градевме заеднички позиции со државите-членки на Комитетот за светско наследство.“

Тој укажа на состојбата која беше затекната: „Неопходно е отворено да се посочи дека ситуацијата што ја наследивме беше резултат на години запоставување, неодговорно управување и изостанок на суштински мерки од страна на претходната влада. Наместо превенција и одговорност, оставија проблем што бараше итно решавање. Нашиот пристап беше поинаков – не декларативен, туку посветен и фокусиран на резултати.“

Муцунски потенцираше дека зачувувањето на статусот е само прв чекор: „Свесни сме дека пред нас стои обврската да обезбедиме долгорочна заштита, одржливо управување и повторно да ја изградиме довербата во институциите и капацитетот на државата да се грижи за своето највредно природно и културно наследство.“

Во завршницата, тој упати благодарност: „Дозволете ми искрено да се заблагодарам на тимот на Министерството за надворешни работи и надворешна трговија – за нивната стручност, пожртвуваност и тивка, но клучна работа зад сцената. Токму таа работа придонесе за одлука што значи многу за нас како држава.“