Македонија
Отчет на Ѓорѓиевски: За две години реализирани се 90% од четиригодишната програма
Под слоганот “Големи идеи, за сериозни промени”, градоначалникот Орце Ѓорѓиевски синоќа го презентираше отчетот од својата двегодишна работа. Реализирани се 90 проценти од целокупната предизборна програма, предвидена за четири години, истакна во своето излагање, додавајќи дека како никогаш досега во овие 30 години, е извршена обнова на инфраструктурата. Асфалтирани се 44 км улици, атмосферска мрежа во должина од 5470 метри, фекална канализациона мрежа 6690 метри и 3610 метри водоводна мрежа. Изградени се 1300 нови паркинг места, два нови пазари, а големи се и инвестициите во образованието. Како што информираше градоначалникот Ѓорѓиевски, сите училишта се опремени со смарт уреди, обезбедени се компјутери за сите наставници, ранчиња за сите првачиња, наскоро и униформи за сите основци. Изградени се сензорни соби во сите училишта, изградени и обновени спортски училишни сали. За само две години, имаме две нови градинки. Ја ставивме во функција градинката во Драчево и за првпат отворивме нова, целосно инклузивна градинка во Усје. Неколку објекти со значително проширен капацитет. Ги распишавме условите за избор на најповолен изведувач за реконструкција и проширување на градинката Пеперутка1 во Драчево, а наскоро ќе градиме целосно нов објект во 11 Октомври Згради, намалувајќи ги од листите на чекање од 400 на двоцифрен број дечиња-потенцираше градоначаликот Ѓорѓиевски.
Тој посебно ја истакна изградбата на спортската инфраструктура, со посебен акцент врз обновата на запуштените спортски терени и локации кои некогаш беа култни места. Се работи за 11 спортско-рекреативни центри и паркови.
Кисела Вода е првата дигитализирана општина на Балканот која за граѓаните обезбеди услуги по електронски пат, а наспроти минатото во кое оваа локална самоупрва беше симбол за криминал и корупција, сега е првата општина која после 1965 година распиша меѓународен конкурс за идејниот лик на Расадник, поддржан од сите македонски авторитети од областа на урбанизмот и архитектурата, како и од своите жители. Жири комисијата која имаше меѓународен карактер одлучи дека Расадник кој претходното раководство сакаше да го загуши со 99 згради, сега ќе се уредува согласно принципите за хумано живеење. Градоначалникот Ѓорѓиевски информираше и за сетот мерки за поддршка на социјално загрозените граѓани, за старите лица, како и за лицата со попреченост. Заокружи со проектите од културата после кои Општина Кисела Вода стана симбол за одличен културно-забавен живот во главниот град.
Градоначалникот Ѓорѓиевски потенцираше дека и покрај тоа што го презеде раководството на Општина Кисела Вода со наследен долг од 3 милиони евра, сега таа е во ликвидна кондиција и притоа се спроведува рамномерен развој во сите населби. Во контекст на буџетот и транспарентноста, на влезот од Домот на културата “Билјана Беличанец” каде се одржа настанот, имаше штанд каде граѓаните ги запишуваа своите идеи за претстојниот Буџет 2024.
-Концептот “Големи идеи за сериозни промени” го продолжуваме со уште поголема енергија и одлучност, користејќи го секој ден што ни претстои за поубава Кисела Вода во која ќе биде престиж да се живее, инвестира и работи, потенцираше на крајот градоначалникот Ѓорѓиевски заблагодарувајќи им се на сите граѓани, на Советот и неговиот претседател и на администрацијата за цела досегашна поддршка и посветена работа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Тоневски: Со мнозинство во советот одиме кон уште поголема победа во Пробиштип, време е за промени
На вечерашниот мини-митинг во општина Пробиштип, во рамки на вториот круг од локалните избори кои ќе се одржат на 2 ноември, се обрати кандидатот за градоначалник од редовите на ВМРО-ДПМНЕ, Тони Тоневски кој истакна дека во Пробиштип е потребна промена после 8 години апатија и уништување на градот, потенцирајќи дека новиот правец во кој ќе се движи општината ќе биде развиен, вистински и долгорочен со реализација на многу проекти кои ќе донесат развој и напредок на Пробиштип.
„Во првиот круг жителите на Пробиштип беа јасни, покажавте верба храброст и желба за промени, освоивме стабилно мнозинство во советот и сега сигурно со дигната глава одиме на уште поголема победа. Вие граѓаните ја препознавте програмата што значи работа, развој и сигурна иднина. Вие граѓаните го направивте вистинскиот избор за нашиот Пробиштип. Осум години стоевме во место, наместо да броиме нови индустриски погони, работни места, водоводи, ние броевме изгаснати светла во домовите. Затоа минатата недела Пробиштип испрати јасна порака, доста беше стагнација, уназадување и апатија, време е за нов правец, развиен, вистински, долгорочен“, рече Тоневски.
Кандидатот за градоначалник на општина Пробиштип посочи дека програмата е сеопфатна и е сработена заедно со граѓаните, со нивни предлози и идеи, со што ќе се инвестира во секој дел од општината, со проекти за младите да останат во својот роден град како и инвестиции во областа на туризмот, спортот и индустријата.
„Многу ми е важно нашиот град да има иднина, нашиот Пробиштип заслужува многу повеќе, ние не ветуваме чуда ние ветуваме само работа, ветуваме развој, ветуваме иднина. Во програмата се влезени вашите идеи, оваа програма е победничка, заедно ја пишувавме заедно ќе ја реализираме, ќе започнеме со нова урбанизација, нова населба за изградба на куќи и нова индустриска зона исклучиво за незагадувачка индустрија. Ќе создадеме услов за нови работни места и повисоки плати, нашиот фокус се младите, младите ќе имаат бесплатен канцелариски простор доколу сакаат да започнат сопствен бизнис и бесплатни проекти за типски куќи. Голем дел од младите ќе можат да ја градат својата кариера и во туристичката дејност затоа што инвестициите во Лесново и Пониква ќе бидат големи, ќе изградиме детско одморалиште на Пониква, ново одбојкарско игралиште, Пробиштип ќе добие и нов градски базен“, вели Тоневски.
Македонија
Aрсовска: Директорот на „Комунална“ е пуштен, Јулијана од Управен нема да ја апсат оти има албум со сликички со функционери на ВМРО
Директорот на Комунална хигиена Скопје е пуштен неколку часа откако беше приведен во станица , не е виновен за ништо, работата ја вршел чесно и совесно, напиша на социјалните мрежи градоначалничката Данела Арсовска.
„Оваа информација пристигна откако по неколку часа убедување во полициска станица, директорот на Комунална хигиена им кажал дека во срцето и душата е ВЛЕН, уште додека бил во станица му донеле да потпише изјава за членство по што е пуштен да си продолжи со успешната работа во претпријатието.
Во меѓувреме Мицковски и МВРО упорно бараат некој од ДУИ да го апсат како што ветија, тргнаа по Изет Меџити од ДУИ, па откако стана ВЛЕН си го земаа во коалиција“, напиша Арсовска на социјалните мрежи.
За апсењата во Комунална таа и претходно се огласи на „Фејсбук“. Напиша дека претседателката на Управен одбор Јулијана Спировска, нема да ја апсат „бидејќи има албум со сликички со сите функционери на ВМРО“.
„Јулијана која ја управува Комунална Хигиена Скопје е осуден криминалец во 2022 година со казна затвор за убиство и осуден криминалец во 2006 за нанесување тешки телесни повреди. Јулијана во КХС ги команда другите членови на Управен одбор од ВМРО и ВЛЕН, кои се поставени од Советот на град Скопје од ВМРО и ВЛЕН.Јулијана 3 години опструира нови камиони, инвестициска програма, вработените кои 5 години ги чистат улиците не можат да земат решение за работа поради нејзините сопартијци од ВМРО и ВЛЕН во Советот. Јулијана по наредба на ВМРО континуирано со години прави опструкции додека градот не се удави во смет. И сега директоров им е крив кој не можел да набави 35 нови камиони бидејќи тоа Јулијана го одложила за да ги набави Орце“, напиша Арсовска.
Македонија
Филипче: СДСМ води чесна кампања, ВМРО-ДПМНЕ врши притисоци, пријавивме во ДИК
Претседателот на Социјалдемократскиот сојуз на Македонија, Венко Филипче, на новинарско прашање поврзано со кампањата и која е неговата оценка за истата, изјави дека
СДСМ води чесна, искрена кампања, насочена кон граѓанските интереси, нагласувајќи ги, како што рече, сериозните изборни притисоци и нерегуларности од страна на ВМРО-ДПМНЕ, кои уредно биле пријавени до ДИК и набљудувачката мисија на ОБСЕ/ОДИХР.
„Пријавивме притисоци и закани по работните места на гласачите, особено членови и симпатизери на СДСМ, поткуп и обиди за поткуп, па дури и на самите гласачки места. Дополнително, компании биле принудувани да присуствуваат на одредени настани, што не е во духот на демократијата”, изјави Филипче.
Тој додаде дека сите овие забелешки се официјално доставени до Државната изборна комисија и до ОБСЕ/ОДИХР.
Претседателот на СДСМ направи паралела со кампањата која СДСМ ја води и го истакна контрастот со владејачката партија.
„Ние водиме чесна, искрена и позитивна кампања. Имаме добри кандидати за градоначалници и советници, добро познати во своите заедници, со програми кои реално се реализираат”, рече д-р Филипле.
Тој потенцираше дека градоначалниците на СДСМ имаат меѓу 90 и 100 отсто реализација на предизборните ветувања, за разлика од градоначалниците на ВМРО-ДПМНЕ, кои, според Филипче, „не реализирале ниту 20 отсто”.
„Нашите градоначалници имаат помеѓу 90 и 100% реализираност на ветените проекти, додека, според нашите податоци, градоначалниците на ВМРО-ДПМНЕ немаат реализирано ниту 20% од своите програми”, изјави лидерот на СДСМ, д-р Филипче.

