Кандидатот за градоначалник на Чаир, Бујар Османи, денеска упати остри критики до актуелниот министер за животна средина Изет Меџити, обвинувајќи го дека не само што ги користи државните ресурси за сопствена кампања, туку и директно го загрозува здравјето на граѓаните со својата неактивност.

„Двапати размислував дали денес треба политички да зборувам. Но не можам да не кажам: најпрво, сметам дека тој требаше да поднесе оставка уште истиот ден кога се кандидираше, за да биде натпреварот еднаков“, изјави Османи.

Тој потенцира дека Изет Меџити, наместо да ја напушти функцијата кога влезе во изборна трка, остана министер со полн капацитет и буџет на располагање, нешто што, според Османи, е длабоко неморално и нефер.

„Се кандидира со платата на министер и прави кампања во Чаир со ресурсите на министерството“, предупреди Османи.

Но, Османи додаде дека сега постои уште посериозна причина за оставка, неспособноста да се справи со еколошка и здравствена криза каква што се случи вчера во Трубарево, кога цело Скопје беше обвиено со токсичен чад од горење на пластика и кабли.

„Со тоа што не ја врши работата за која е платен од граѓаните, и обидувајќи се политички да преживее, тој го загрозува здравјето на луѓето и тоа не само привремено, туку со долгорочни последици“, нагласи Османи.

Во ситуација кога јавноста со право очекуваше реакција, инструкции и информации од Министерството за животна средина, Изет Меџити не се појави ниту пред јавноста, ниту на терен, додека граѓаните во Трубарево мораа да се евакуираат доцна во ноќта, а целиот град се задушуваше во отровен чад.

„Затоа ова е и повик за неговата оставка“, заклучи Османи. „Тој покажа дека не ја врши својата работа како што треба, го загрозува здравјето на луѓето, а притоа ги злоупотребил државните ресурси за изборна кампања.“

Иако Центарот за обука на МВР беше отстапен за сместување на жителите од Трубарево кои живеат во близина на складиштето за електронски отпад каде што вчера избувна пожар, до денес таму нема доброволно евакуирани граѓани.

Информацијата ја потврди портпаролката на Владата, Марија Митева, на прес-конференција.

„Во делот на евакуацијата, пред почетокот на прес-конференцијата разговарав со министерот за внатрешни работи и информациите коишто ги добив се дека нема лица кои доброволно се евакуирале во Центарот за обука. Дали е состојбата променета во овие час и половина, немам информација“, рече Митева.

Министерот Панче Тошковски синоќа им препорача на оние кои се во непосредна близина да ги напуштат своите домови, повикувајќи се на мерења на квалитетот на воздухот кои покажале дека во непосредна близина до 150 метри од опожарените складишта има високо ниво на штетни супстанци и состојбата се смета за високоризична.

Министерот за животна средина и вицепремиер, Изет Меџити, на прес-конференција во Владата информира дека за следење на состојбата со воздухот се ангажирани повеќе акредитирани лаборатории кои ќе продолжат со мерења и во наредните денови.

На терен веќе биле поставени 24-часовни инструменти за мониторинг, а контроли спровеле Државниот инспекторат за животна средина, лабораториите „Еуромак контрол“ и МЖСПП, како и специјализираната единица на Армијата за хемиско и радиобилошко загадување. Во тек е и ново мерење од „Амбикон“ од Штип, кое ќе трае пет дена.

Паралелно, почна административен инспекциски надзор кај компанијата „Ф Групација“, која поседува дозвола за работа издадена од Министерството со важност до 2031 година. По завршување на надзорот ќе бидат преземени сите мерки – ќе се земат мостри од почвата и ќе биде нарачано вештачење за да се утврди точниот обем на загадувањето врз животната средина.

Прашан кога ќе има резултати за квалитетот на воздухот, Меџити одговори дека денеска ќе се знаат и јавноста ќе биде известена детално и транспарентно.

Меџити потенцира и дека објектот не е куќа, туку индустриски хали со важечка лиценца. Дополнително објасни дека иако не бил дел од Управувачкиот комитет за справување со кризи и затоа не присуствувал на првата прес-конференција, но тој и Министерството постојано биле во контакт и ангажирани околу настанот.