Владата достави пет закони, и тоа со европско знаме, со цел да се легализираат коруптивните елементи на договорот со „Бхетел и Енка“, како и да се амнестираат членовите на Владата што го усвоиле договорот, како и неговите потписници, рече пратеникот Павле Трајанов на денешната седница во Собранието.

Со потпишување на договорот, во кој има одредби спротивни на Законот за утврдување јавен интерес и номинирање стратешки партнер за изградба на коридорите 8 и 10 д, како и на одредби од законите за урбанистичко планирање, градење, експропријација и работни односи, се работи за класична злоупотреба на службената положба и постојат основани сомненија за кривична одговорност, смета Трајанов.

„Обидот на Владата преку пратеници да предложи 9 закони беше неуспешен за дел од тие закони, сега Владата предлага пет од нив, но по скратена постапка и со европско знаме, со цел тие да бидат донесени без можност да бидат блокирани од пратеници што не се согласуваат со решенијата содржани во предлог-законите. Овие закони ги предлага со европско знаме, но се работи за класична злоупотреба бидејќи предложените измени не се во насока на усогласување на нашите закони со законодавството и стандардите на ЕУ“, рече пратеникот.

Доколку парламентот ги усвои овие пет закони, во суштина ќе се случи тежок институционален криминал, вели тој, бидејќи ќе се амнестираат од одговорност сите министри и премиерот и ќе се легализира грабеж од огромни размери.

Според него, одлуката и одговорноста е кај пратениците – или ќе спречат грабеж на столетието или ќе ги амнестираат министрите и потписниците на овој коруптивен договор, кој пратениците не може да го видат.