Македонија
Пад на вредноста на општинските тендери за една третина

Градот Скопје и 80 општини потрошиле 7,3 милијарди денари, односно 118 милиони евра за јавни набавки во 2022 година. Произлегува дека во 2022 година се потрошени дури 65 милиони евра помалку отколку во 2021 година, според базата на податоци на тендерите на општините во 2022 година, што денеска ја објави Центарот за граѓански комуникации.
Пад на вредноста на јавните набавки во 2022 година е забележан кај 54 општини и Град Скопје. Притоа на листата на единици на локалната самоуправа со најголеми падови на вредноста на јавните набавки, што ја предводи Град Скопје со намалување на тендерите од 31 милион евра, се наоѓаат и скопските општини Центар и Гази Баба, со падови од 5 милиони евра, потоа Гостивар, со пад од 4 милиони евра, и Тетово со 3 милиони евра. Другите општини имаат намалување на вредноста на набавките под 3 милиони евра.
Најголеми скокови во апсолутната вредност на тендерите во 2022 година имаат остварено општините Кисела Вода, со раст од 3,6 милиони евра, потоа Струмица со 3,5 милиони евра и Штип со раст од 2,8 милиона евра.
И покрај големиот пад, јавните набавки на Град Скопје се на врвот според вредноста и изнесуваат 916 милиони денари, односно околу 15 милиони евра. Но, за разлика од претходните години, кога уделот на јавните набавки на Град Скопје изнесувал и до една четвртина од вкупните набавки на локалните власти, во 2022 година тој удел е намален на 13 %.
За падот на досегашната доминација на скопските општини во однос на трошоците за јавни набавки говори и податокот дека во Градот Скопје и во 10-те скопски општини се потрошени речиси 40 милиони евра, што е половина од потрошеното во 2021 година во износ од 82 милиона евра. Поради овој пад, уделот на скопските општини и на Град Скопје во вкупните набавки е намален од 45 % во 2021 година на 33 % во 2022 година.
Во првата десетка единици на локалната самоуправа со најголема вредност на тендерите зад Град Скопје се Кисела Вода и Битола, со вредност по речиси 7 милиони евра, потоа е Струмица со 5,4 милиони, па Штип со 4,8 милиони евра, Кавадарци со 4,4 милиони евра, Центар со 4,2 милиони евра, Куманово со 4,1 милиони, Гостивар со 4 милиони и Гази Баба со 3,4 милиони евра. За нерамномерноста меѓу општините говори податокот дека овие десет единици на локалната самоуправа имаат вредност на набавките буквално колку преостанатите 71 општина заедно.
Над еден милион евра имаат 30 општини, следни се 21 општина со вредност на јавните набавки помеѓу половина и еден милион евра, потоа 21 општина имаат договори за јавни набавки во вредност од 200 илјади до 500 илјади евра и на крајот се 9 општини, чии јавни набавки се вредносно под 200 илјади евра.
На дното од табелата со убедливо најмала вредност на јавните набавки е Општина Вевчани, со само 50 илјади евра. Веднаш пред неа е Општина Лозово, со јавни набавки од 53 илјади евра, потоа општините Центар Жупа, Шуто Оризари и Старо Нагоричане, со набавки од 113 до 129 илјади евра.
На јавни набавки на жител се потрошени од 5 до 392 евра
Просечно, на јавни набавки на жител во 2022 година се потрошени по 69 евра, што е за 15 евра, односно 18 % помалку од 2021 година кога просекот изнесуваше 84 евра на жител. На врвот во 2022 година e Општина Карбинци, со 392 евра вредност на јавните набавки на жител. Општината имала поголеми инфраструктурни проекти, како што се санација на мост на реката Брегалница кај селото Долни Балван, регулација и уредување на речното корито на Козјачка Река, како и реконструкција на улици. На второ место е Петровец со 316 евра, потоа следуваат Општина Новаци со 277 евра на жител, Општина Дојран со 167 евро и Општина Росоман со 164 евра. Сите други општини имаат вредност на јавните набавки помали од 150 евра на жител.
На дното е Општина Шуто Оризари со само 5 евра на жител, а пред неа Врапчиште со 17 и Сарај со 20 евра на жител.
Гледано во однос на консолидираните буџети на единиците на локалната самоуправа, произлегува дека просечно на јавни набавки во 2022 се потрошени 19 % од консолидираните буџети на општините и на Градот Скопје. Висок удел од 30 до 62 % од буџетот трошат само 10 општини по што следуваат 23 општини, кои на јавни набавки трошат од 20 до 30 % од буџетот, а најголем дел од општините, односно 35, имаат удел во буџетите од 10 до 19 %. На дното се 13 општини, во кои на јавни набавки се трошат од 3 до 9 %.
Вредноста на набавките на жител, како и уделот на вредноста на јавните набавки во општинските буџети, се дел од параметрите што може да се видат на ниво на сите единици на локалната самоуправа во базата на податоци за јавни набавки на општините во 2022 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ССНМ: За целосно стабилизирање на медиумскиот сектор потребен е нов закон

Самостојниот синдикат на новинари и медиумски работници ги поздравува измените на Законот за медиуми со коишто практично беа прифатени сугестиите на локалните и специјализираните онлајн медиуми, но повторно истакнува дека за целосно стабилизирање на медиумскиот сектор потребен е нов закон целосно усогласен со Европскиот акт за слобода на медиумите.
Од ССНМ појаснуваат дека со овие измени онлајн изданијата беа изедначени во правата и обврските со останатите медиуми, а новинарите и медиумските работници го изборија својот статус на рамноправни со колегите од другите медиуми, статус кој претходно беше мета на арбитрарни толкувања и создаваше проблеми.
„Уште со најавата на измените на Законот за медиуми минатата година ССНМ постојано укажуваше дека се потребни допрецизирања и пред сè, земање предвид на условите во кои работат локалните, но и специјализираните и непрофитните медиуми. Затоа ССНМ поднесе предлози до ЕНЕР (Единствен национален електронски регистар), а потоа низ повеќе средби со Министерството за дигитална трансформација, две панел дискусии и постојани консултации со најголем дел од медиумите кои не беа вклучени во процесот на донесување на Предлог измените на Законот за медиуми придонесе за корекции на измените, што и се случи преку амандмани во Собранието. Самостојниот синдикат на новинарите и медиумските работници ги сублимира и ги пренесе ставовите на важниот дел од медиумската сцена, како што се локалните и специјализираните онлајн медиуми до сите релевантни институции (Влада на РСМ, Собрание, Министерство за дигитална трансформација, АМВУ)“, велат од ССНМ.
ССНМ останува на ставот дека овој потфат може само да се гледа како на дел од процесот што треба да заврши со донесување на комплетно нов Закон за медиуми, и тоа низ целосна и сеопфатна јавна дебата во кој ќе бидат имплементирани сите елементи на Европскиот акт за слобода на медиумите (ЕМФА).
Особено важни аспекти кои треба да се опфатат со новиот закон, според ССНМ, се механизмите за заштита на работничките и професионалните права на новинарите и медиумските работници, значајно за објективно и професионално известување од јавен интерес, усогласување на дефинициите за медиум според ЕМФА, сајбер безбедноста на новинарите и друго.
Македонија
Мицкоски објави нови информации за имотот на Левицата: Во т.н. подрум регистриран е локал

На седницата на Собранието посветена на пратенички прашања, премиерот на Владата, Христијан Мицкоски одговараше на прашање посветено на имотот на политичката партија Левица.
„Јас би сакал на денешната седница да одиме чекор понатаму да ја информираме јавноста за т.н. подрум, кој не ќе да е само подрум, туку има и приземје“, рече премиерот надополнувајќи ја информацијата за имотот на партијата Левица која ја обзнани на претходната седница за пратенички прашања.
Тој на говорницата покажа и фотографии од објектот и посочи дека во истиот тој локал е регистрирано и друштво за угостителство и услуги.
„На ова место, кое не ќе да е подрум, над земја три-четири метри е регистриран локал, односно друштво за угостителство и услуги „Павилјон 36“ ДООЕЛ Скопје. Регистриран е на истата адреса каде што се наоѓа подрумот или сутеренот. Дури и си направиле профили по социјалните медиуми, прилично слични на профилот на една политичка партија. Кога малку ќе истражите и ќе ја извадите тековната состојба, покрај тоа што уплатиле 5000 евра во кеш за регистрирање на ова друштво за угостителство и услуги, се јавува како сопственик лицето Зоран Ивановски. Тој се јавува како управител, како менаџер и ја регистрирал оваа фирма, која се занимава со дејност ресторани, но и дејности на интернетски портали. Тоа е подружницата од ова друштво“, истакна премиерот.
Мицкоски дополни дека лицето Зоран Ивановски е дел од претседателството од Левица и е дел од управниот одбор на „Скопски водовод“, а на интернет има и негови фотографии со претседателот на политичката партија Левица.
„Еве како се трошат парите на членовите на политичката партија Левица. Но тоа не е сѐ. Ако ги слушате последните искази од случајот поврзан со Палевски и сведочењата таму, ќе слушнете дека тие се среќавале во штабот на партијата Десна, кој што бил во објектот Опера Хаус, а објектот Опера Хаус е токму овој објект“, рече премиерот Мицкоски и продолжи: „за другите детали нема да зборувам. Се надевам ќе има и други пратенички прашања и се надевам ќе ме почестат со нивното присуство. Јас сум подготвен на македонската јавност и на поддржувачите на Левица да им разоткријам дека не е баш така како што некој сака да ги прикаже работите“.
Премиерот Мицкоски од говорницата истакна дека овие работи ги кажува и да ги разоткрие неколкумина скапо платени таканаречени левичари кои со дејствувањето нанесуваат трајна штета на ткивото на македонскиот идентитет.
„Од сега па натаму, сум подготвен да разговараме и за тоа, да видиме кој, што, како и каде, и за мене. Па ќе се вратиме малце и на патните трошоци, ама ќе се вратиме и на патните трошоци од партијата кои што ги земале и кога ги земале и колку земале и кои земале“, заклучи премиерот Мицкоски.
Македонија
(Видео) Костадиновска-Стојчевска до Љутков: Зошто навреме не ги пресметавте платите за вработените?

Пратеничката на СДСМ, Бисера Костадиновска-Стојчевска, на денешната собраниска седница посветена на пратенички прашања, упати прашање до министерот за култура Зоран Љутков, кое се однесуваше на неисплатените плати, непочитувањето на колективниот договор за исплата на платите на културните работници .
„МКажавте дека сте биле член на СКРМ во време на потпишувањето на колективниот договор, и јас очекувам – бидејќи вие секогаш сакате правда и исправување на криминал – дека, ако нешто било незаконско во тој колективен договор, требало да реагирате и да укажете, како што денес тврдите. Сакам да знам дали и зошто сега го напаѓате колективниот договор. Дали планирате да го промените членот 65 од истиот колективен договор?“, праша Костадиновска-Стојчевска.
Во завршната одредба на овој колективен договор, додаде таа, стои дека тој останува во важност до моментот на потпишување на нов колективен договор.
„Значи, тој е важечки според сите одредби. И вие знаете дека секогаш со мартовската плата во културата се прави усогласување со минималната плата, откако таа започна да расте. И токму моето прашање до вас: зошто не ги направивте новите решенија на време? Зошто урнек-решенијата се испратени на 10 април до установите, знаејќи дека имате безмалку околу 100 културни установи – 49 под Министерство за култура и 49 под локална самоуправа?И зошто дури на 10 април се добиени тие урнек-решенија и не се потпишани од тој што ги изработува? Дали не бевте во државата? Дали во Министерството за култура ова е времето кога се користат ланските одмори, па сега немате таму помош? Или имавте некоја друга намера?“, праша таа.