Македонија
Панел-дискусија „НАТО – повеќе од алијанса за стабилност и безбедност“

Комисијата за одбрана и безбедност, во соработка со Министерството за одбрана и Амбасадата на Република Словенија во Република Македонија, организираа панел-дискусија на тема „НАТО – повеќе од алијанса за стабилност и безбедност“.
Овој настан е во рамките на официјалната посета на Република Македонија на министерот за одбрана на Република Словенија, Карл Ерјавец.
Отворајќи ја панел-дискусијата, претседателот на Комисијата за одбрана и безбедност, Хари Локвенец, рече дека оваа Влада минала низ болен процес на преговори со Грција и со макотрпен пат за интеграција во НАТО. Вратен е меѓународниот углед на нашата држава која се водеше од политиката на решавање, а не создавање проблеми. Нашата земја, рече тој, е достоен партнер за НАТО.
Емилија Александрова од независната пратеничка група од ВМРО-ДПМНЕ и коалицијата, рече дека оваа пратеничка група ги поддржа измените во Уставот и сметаат дека Република Македонија е на сигурен пат кон членство во НАТО. Додаде дека, сепак, договорот од Преспа е само прв чекор, а сега нè очекува вистинската работа.
Илија Николовски од Партијата на обединети пензионери и граѓани на Македонија се заблагодари на поддршката на Република Словенија, која ќе биде следна земја за контакт во НАТО.
Реџаиљ Исмаили од пратеничката група на ДУИ посочи дека не било лесно за две години да се исполнат сите заложби за нашето членство во НАТО и изрази надеж дека во јуни или јули Македонија ќе го добие заслуженото 30. место во НАТО.
Илија Димовски од пратеничката група на ВМРО-ДПМНЕ рече дека Република Македонија мораше да плати посебна цена за да стане членка на НАТО. Тој не се сомнева во капацитетот на институциите за реализирање на заложбите и задачите и се надева на брзо зачленување во НАТО.
Министерот за одбрана на Република Словенија, Карл Ерјавец, рече дека како министер бил сведок на самитот во Букурешт во 2008 година. Според него, сега Македонија има брз двегодишен напредок и е пример во регионот за храбро лидерство и граѓани кои на референдумот во големо мнозинство избраа да живеат во евро-атлантска иднина. Карл Ерјавец посочи дека по приемот во НАТО, Словенија станала дел од безбедносната рамка, што ја направи и посигурна бизнис-средина. Министерот го изрази своето задоволство што Македонија, конечно, ќе стане членка на НАТО.
Никола Димитров, министер за надворешни работи, рече дека дебатата се одвива во клучно време кога се прават последните чекори за реализација на една желба и амбиција, а тоа е членство во НАТО.
„18 години по формирањето на Вилнус-групата кога било потенцирано дека Европа нема да биде цела и стабилна додека сите земји членки на групата не станат и членки на НАТО, Македонија, но и соседите и регионот, се пред самата цел, која ќе почне со ратификацијата на договорот во грчкиот парламент. Членството во НАТО не значи само силна армија, туку и силна демократија и институции, сигурна и просперитетна држава“, рече Димитров.
Министерката за одбрана, Радмила Шекеринска, рече дека политичката волја на Владата ќе била пуста желба доколку Собранието не било подготвено да создава политики на 21 век.
„Македонија како ретко кога успеа да се покаже во најдобро можно светло. Членството во НАТО за Македонија ќе има брзи ефекти и во економијата бидејќи, ако нема безбедност, нема ни просперитет. Прашање на недели е кога во Парламентарното собрание на НАТО нема да бидеме само на минување, туку ќе седнеме и ќе го заземеме заслуженото место“, рече Шекеринска.
Заклучувајќи ја панел-дискусијата, амбасадорот на Словенија, Милан Јазбец, рече дека процесот бил долг, но Македонија ќе стане 30. земја членка на алијансата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Тошковски: Стабилна безбедносна состојба во Дебар – ГП „Блато“ станува мост на поврзување со Албанија

Министерот за внатрешни работи Панче Тошковски денеска оствари работна посета на ОВР Дебар при што го посети и Граничниот премин „Блато“ кој се наоѓа во близината на Дебар.
Министерот Тошковски со раководството на ОВР Дебар беше информиран дека безбедносната состојба во целиот регион е стабилна со значително подобрени резултати во справувањето со насилниот криминал, имотните деликти и унапредување на сообраќајната безбедност. На средбата раководството го информираше министерот дека веќе активно се преземаат оперативни активности во насока на обезбедување мирен, безбеден и демократски изборен процес.
„Што се однесува до Граничниот премин „Блато“ евидентиран е значително поголем број на патници од минатата и претходните години. Преминот станува вистинска мост на поврзување за граѓаните кои одат на одмор во соседна Албанија и туристите кои доаѓаат на одмор, бањско лекување, викенд престој, роднинските посети, домашни веселби, како и шопинг. Со тоа, нашата соработка со албанските колеги е насочена кон имплементација на системот „One Stop“, кој преку дополнителни инфраструктурни решенија ќе обезбеди трајно намалување на гужвите и поефикасен проток на патници и возила како во текот на целата година а посебно за периодите на зголемен туристички сообраќај“, истакна министерот Тошковски.
Македонија
Отворен конзулат на Казахстан во Куманово

Претставници од Општина Куманово, предводени од претседателката на Советот на Општина Куманово, Ивана Ѓорѓиевска, денеска присуствуваа на свеченото отворање на конзулат и инаугурација на Почесниот конзул на Република Казахстан во Куманово, Ејуп Абдулахи.
На пригодниот настан присуствуваа претставници од високи државни институции во земјава, од дипломатскиот кор, амбасадори и претставници од бизнис секторот.
Пред присутните се обрати претседателката на Советот на Општината, истакнувајќи ја важноста на воспоставената соработка во повеќе економски сегменти (технологија, енергетика и трговска размена) меѓу казахстанскиот град Караганда и Куманово.
Македонија
Сиљановска-Давкова во Њујорк: Младите мора да бидат наши партнери во реформирањето на ОН

Претседателката Гордана Сиљановска-Давкова се обрати на сесијата посветена на 30 годишнината од Светската програма за млади, што се одржа во рамки на 80. Генерално собрание на ОН.
Таа укажа на потребата младите генерации да добијат заслужено место во оформувањето на иднината на Обединетите нации и ја потенцираше важноста на стратегијата Youth2030 како основа за активно, а не само симболично вклучување на младите во реформите на ОН на сите нивоа.
Учесниците на сесијата говореа на теми посветени на улогата на младите во глобалниот развој.
Се дискутираше за „Светската програма за акција за млади: забрзување на глобалниот напредок преку меѓугенерациска соработка“, како и за „Унапредување на спроведувањето на Светската програма за акција за млади со цел никој да не изостане“.