Македонија
Панова: Оваа една година вреди многу повеќе од седумте години на СДС и ДУИ

Ние во текот на оваа година можеби успеавме да поставиме добри темели на кои понатаму ќе ги работиме идните реформи. Оваа една година можам да кажам дека вреди многу повеќе од седумте години измината власт на СДСМ и ДУИ, истакна пратеничката од ВМРО-ДПМНЕ Ели Панова на денешната трибина во Струмица насловена „Една година ги градиме темелите на македонското земјоделство и храна“.
„За оваа една година ние сфативме со каков буџет располагаме, односно наследивме во исто време во првите 100 дена се снаоѓавме со долговите кои ни беа оставени, морам да напоменам дека исплаќавме задоцнети плати во делот на АД „Водостопанство“ и задоцнети плати во Македонски шуми, пари кои воопшто не беа предвидени во буџетот на изминатата 2024 година но, ете Владата и ние заеднички најдовме средства и тие пари беа изнајдени од средства кои не биле правилно испланирани“, кажа Панова.
Панова истакна дека ребалансот на буџетот кои повторно е во Собрание претставува една нужна алка во работењето на целиот македонски систем.
„Со ребалансот на буџетот кој повторно е во Собрание како една нужна алка во работењето на целиот македонски систем беа и неисплатените субвенции, тие мораа да бидат повторно обезбедени од некаде за да може да се подмириме тоа што сме должни и за да бидеме на позитивна нула и да знаеме дека во иднина нашите земјоделци субвенциите ќе ги добиваат редовно и не како што било досега, туку навремено, однапред платено онака како што заслужуваат“, вели Панова.
Панова потенцираше дека Собранието во изминатата година донело повеќе од 297 закони што е повеќе од половина за време на владата на СДСМ и ДУИ.
„Она кое би сакала да го потенцирам е исто така моментот што во изминатата една година Собранието успеа да донесе повеќе од 297 закони што значи за повеќе од половина од целиот изминат мандат на владата на СДСМ и ДУИ. Можеби оваа бројка е огромна и еден дел од истата се однесува на одредени усогласувања но, добар дел се однесува и на закони кои се наменети токму на земјоделието и она кое значи исправање на грешките со кои се соочува македонските земјоделци во изминатите периоди“, заклучи Панова.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„И СДС и Димовски признаваат дека во период на изборни циклуси бил следен и прислушкуван Мицкоски“, велат од ВМРО-ДПМНЕ

„Скандалот со прислушкувањето на АНБ и АР на претседателот на ВМРО-ДПМНЕ, новинари, бизнисмени добива се поголеми размери. И СДС и поранешниот нивен директор на АНБ, Виктор Димовски признаат дека имало следење и прислушкување на неистомислениците, критички кон нив настроените новинари, јавни личности“, соопшти ВМРО-ДПМНЕ.
„Во обид да се извлечи од целата ситуација откако СДС потврди дека имало прислушкување, Димовски призна дека во период на изборни циклуси во државата процениле дека било неопходно да се следи ВМРО-ДПМНЕ, на чело со претседателот Мицкоски, како тогашна опозиција.
Која безбедносна закана би биле партиските активности на партијата во пресрет на тогаш локални и парламентарни избори, освен закана СДС да си замине од власт.
Ова нивно признавање за петгодишно следење и прислушкување на претседателот Мицкоски значи дека не само тој, туку и неговото семејство биле предмет на следење на тајните служби.
Овие безбедносни служби, наместо да се грижат за безбедноста и да го штитат интегритетот на државата и граѓаните, тие биле маша за политичка борба и притисок на СДС, а главен извршител бил Виктор Димовски.
Виктор Димовски многу добро знае што правел, и какви кривично правни последици има тоа и токму затоа треба јавно да признае што и по чија наредба од врвот на политиката правел.
Ова следење и прислушкување не би било можно без директна дозвола од Зоран Заев, затоа што во целиот систем бил вклучен и Љупчо Коцевски од ЈО, кој подоцна токму СДС го избира за државен јавен обвинител, како и Врховниот суд.
Овој скандал на злоупотреба на безбедносните служби во политички цели, не смее да остане несанкциониран и одговорност мора да има, за никогаш да не се повтори“, се наведува во соопштението на ВМРО-ДПМНЕ.
Македонија
Филипче во работна посета на Франција

Претседателот на Социјалдемократскиот сојуз на Македонија, Венко Филипче, денеска е во еднодневна работна посета на Франција.
Во рамки на посетата, Филипче ќе одржи средба со пратеничката и потпретседателка на групата за пријателство Франција – Северна Македонија во француското Собрание, Лилиана Танги.
Претседателот Филипче ќе одржи средба со шефот на Канцеларијата за соседство, проширување и одбрана при Генералниот секретаријат за европски прашања, Жозеф Жустиниани.
За време на работната посета во Париз, Филипче ќе има состанок со директорот за Континентална Европа при Министерството за Европа и надворешни работи, Брис Рокфеј, и со специјалниот претставник за Балканот, Рене Троказ.
Воедно, Филипче ќе има средба и со Бенжамин Куто, истражувач при Институтот „Жак Делор“.
„Во фокусот на средбите ќе биде спроведувањето на реформската агенда и моменталниот статус на евроинтеграцискиот процес на Македонија“, соопштија од СДСМ.
Македонија
Без струја дел од Илинден

Од ЕВН Македонија АД известуваат дека денеска без електрична енергија ќе останат:
· од 07:00 – 15:00 часот, корисниците од улицата 9 во населба Илинден. (Општина Илинден)