Папата Франциско во рамки на посетата на нашата држава, по светата литургија со која чиноначалствуваше на плоштадот „Македонија“, во катедралата „Пресвето срце Исусово” оствари и екуменска и меѓурелигиска средба со заинтересираните млади од земјава и светот.

На средбата папата ислушал сведочења на неколку млади верници од православна, муслиманска и католичка вероисповед, а потоа одговарал на прашања на младите за животните соништа, упатувајќи им пораки и советувајќи ги да ги следат своите стремежи, да комуницираат меѓусебе и да се грижат за постарите.

„Во вашите сведоштва и прашања среќавам грижи, соништа, потрага, сето тоа како еден плоден терен за правење големи нешта во вашиот живот. Ми дава голема надеж тоа што гледам млади кои ги острануваат претходно залепените етикети и не ги поднесуваат повеќе поделбите од минатото и сегашноста и одат над тоа“, порача папата Франциско во своето обраќање во катедралата „Пресвето срце Исусово“ во Скопје.

Папата се сретна и со свештениците, нивните семејства и со монахињите и монасите од Католичката црква во нашата земја.

„Не би сакал да го злоупотребам нејзиниот лик, но оваа земја му ја поклони на светот и на Црквата Мајка Тереза. Многумина беа смирени од нежноста на нејзиниот поглед, утешени од нејзината милост, ослободени од нејзината надеж и нахранети од храброста на нејзината вера способна да даде чувство на најзаборавените дека не се заборавени од Бог. Историјата ја пишуваат оние личности кои немаат страв својот живот да го потрошат за љубовта”, порача папата на средбата во Католичката црква.