СДСМ продолжува со креирањето дневна политика во недостаток од реални идеи. Како што ја водеа Владата, така ја практикуваат опозицијата. Несериозно, со мерки кои што се неприменливи и тотално промашени. Ова го истакна Дејан Проданоски, пратеник на Пратеничката група на ВМРО-ДПМНЕ во Собранието.

Според него, политиката на промашеното прогресивно оданочување и Солидарниот данок, СДСМ сега ја пресликуваат со несериозни предлози за кои мислат дека ќе им донесе некој политички поен.

„Истите ликови кои ја втурнаа Македонија во сиромаштија и убедливо закована на дното сега се преставуваат како економски иноватори. Прочитани се. Од кога ВМРО-ДПМНЕ е на власт покачени се платите на сите образовани работници, од основното до високото образование. Покачени се платите на вработените во здравството, ќе се вработат 600 приватни специјализанти, а решение ќе земат над 1.000 здравствени работници кои се сега со договор на дело. Повисоки плати ќе земат и вработените во МВР и во јавната администрација. Ќе има и повисока минимална плата согласно законот, а доколку на ЕСС се договорат синдикатите и работодавачите, владата ќе ја прифати таа минимална плата“, изјави Проданоски.

Додека СДСМ критикува, рече тој, во моментот се исплати првата транша на евтини кредити кон стопанството, а општините веќе аплицираат за вториот повик.

До опозицијта порача, наместо да глумат дека се загрижени, во текот на утрешниот ден да гласаат за Законот за технолошките индустриски зони, каде што се отвора пат за нова инвестиција од повеќе стотини милиони евра.

Економијата тоне, животниот стандард на граѓаните драстично се влошува а власта покажува неспособност и целосна незаинтересираност за кризата која самата ја предизвика, изјави на прес-конференција пратеничката од СДСМ, Сања Лукаревска.

Таа рече дека клучните економски параметри покажуваат дека на македонската економија не и оди, дека граѓаните имаат се помалку пари. Инфлацијата е зголемена и изнасува 5 отсто. Цените на храната се зголемени за 20 отсто. Индустриското производство е во пад од 1,4 а извозот е намален за 5,9 проценти.

„Платите стагнираат, нема зголемување ниту на минималната ниту на просечната плата. Најновите податоци се загрижувачки – дури 83.000 работници не ја добиле јануарската плата! Драстичниот раст на бројот на компании кои не успеваат да исплатат плата и отпуштените работници се првите знаци дека е влошена и нестабилна состојбата и во компаниите. Ова не се само бројки, ова се човечки животи, ова е нашето секојдневие. Реално, народот осиромашува. Ова се негативни економски трендови кои ќе продолжат доколку Владата итно не преземе конкретни мерки. Последната изјава дека нема пари за поголеми плати за работниците, дека нема пари за поголема минимална плата уште еднаш покажува отсутност од релноста. Тоа значи дека стандардот на граѓаните ќе продолжи да се намалува, граѓаните ќе имаат се помалку пари и нема да можат месецот да го поминат со високите сметки и цени на храна“, вели пратеничката.

Партијата побара од власта и од владејачкото мнозинство да обезбеди пари за покачување на минималната плата. Најмалку што заслужуваат работниците, велат од СДСМ, е фер минимална плата од 500 евра за достоинствен живот.

Агенцијата за храна и ветеринарство (АХВ) во соработка со Организацијата за земјоделство и храна на Обединетите нации – (ФАО), на 11 и 12.3.2025 година ќе спроведе симулациска вежба за болеста африканска чума кај свињите. Теоретско-практичниот дел од симулацискта вежба ќе се одржи на 11.3.2025 (вторник) во Велес, а теренскиот на 12.3.2025 година (среда), во с. Башино Село.

„Ги известуваме јавноста од општина Велес и локалното население во с. Башино Село дека не станува збор за реална ситуација и појава на болест, туку за активности на Агенцијата поврзани со симулациската вежба. Целта на вежбата е да се утврдат добрите и слабите страни на одговор при евентуална појава на болеста африканска чума кај свињите, која е предмет на планови за итни мерки на АХВ. Преку вежбата, по однапред утврдено сценарио и доделување улоги на учесниците, ќе се реализираат активности во случај на појава на болеста на африканска чума кај свињите. По спроведувањето на вежбата, ќе се направи евалуација на подготвеноста на планот за итни мерки и ќе се утврдат добрите и лошите страни на одговорот при евентуална појава на болеста, кои може да ги згрозат здравјето и благосостојбата на животните“, посочуваат од АХВ и додаваат:

„На симулациската вежба ќе учествуваат претставници од АХВ, Ветеринарната комора на РСМ, Факултетот за ветеринарна медицина од Скопје, експерти од Европската Унија, претставник oд Секторот за шумарство и ловство при Министерство за земјоделство, шумарство и водостопанство, од здруженијата на одгледувачи на свињи и претставник од Ловечка федерација на Македонија“.