Македонија
Партијата на Грчева бара оставки од министерот за животна средина и градоначалниците во загадените градови

Партијата на Солза Грчева -Глас за Македонија бара неотповиклива оставка од министерот за животна средина и просторно планирање, поради неможноста ова министерство да се справи со загадувањето во повеќе градови во Македонија.
„Ние како земја, водиме во светски размери по загаденоста на воздухот. Не можеме да се согласиме со препораките да не се излегува на улица и прозорците да бидат затворени. Така беше вчера во Скопје, така е повеќето денови“, велат од партијата.
Оттука бараат оставки да поднесат и градоначалниците на Скопје, Тетово и од сите градови каде загаденоста на воздухот во повеќето денови е далеку над дозволената граница.
„Се покажа дека не се способни да воведат интервентни и брзи мерки за санирање на овој проблем, поради кој во опасност се доведени илјадници животи и здравјето на граѓаните. Бараме, наместо лагите дека поголемото загадување доаѓа од затоплувањето на дрва, отворено да кажат колку увозен опасен отпад влегува во земјата, кој непрописно се согорува. Бараме да ги затворат веднаш и дивите топилници на метали. Последниве ако не знаат каде се, ќе им ги покажеме.
Бараме во најзагадените градови, веднаш да се прекине со градење на згради за домување, кои веќе сега ги има повеќе од потребното, а прашината од градењето дополнително не гуши. Не е понудено ниту кусо рочно, ниту трајно решение за сообраќајот и огромниот број на коли по улиците.Прашуваме, дали има некој казнет во државата за ваквата алармантна ситуација?
Министерството за здравство да излезе со точните бројки на ново заболени од канцер, од астма и белодробни заболувања.
Оваа колективна неодговорност на сите оние кои се платени и задолжени за одржување на квалитетна животна средина, мора да прекине. Не е јасно зошто воопшто граѓаните треба да ги плаќаат ваквите неодговорни институции кои не работат во интерес на здравјето на граѓаните“, додаваат од партијата на Грчева.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Ниту 50% намалени цени за патарините, ниту патни трошоци за работниците“, власта не ги изгласа предлозите на партијата Левица

„Македонија ќе продолжи да ги има најскапите патарини во Европа за едни од најлошите и не безбедните патишта бидејќи пратениците од власта на ВМРО-ДПМНЕ, ЗНАМ и ВРЕДИ одбија да гласаат по предлогот на Левица за намалување на истите за 50%“, велат од партијата Левица.
Предлогот го образложи пратеникот од Левица, Реџеп Исмаил, којшто посочи дека е „некоректно пратениците на коишто им се исплаќаат патни трошоци (каде се вклучени и патарините), да немаат разбирање особено за работниците коишто патуваат секој ден до работното место трошејќи две до три плати просечно за патарини“.
Пратениците коишто земаат патни трошоци не се согласија и на работниците да им следува таков надоместок.
Предлогот на Левица го образложи координаторот на пратеничката група, Борислав Крмов, којшто објасни дека надоместок за патни трошоци им следувало на работниците во Македонија, но истиот бил укинат во 2008 година:
„Забелешките кои ги даде поранешниот министер за финансии, Трајко Славевски, којшто тврди дека сѐ уште постојат патни трошоци за работниците, но тие сега се наоѓаат во бруто платата – не се соодветни бидејќи тоа не се однесува на приватниот сектор и ваквото право вообичаено се поништува со колективните договори, договорите за вработување. Така што, патни трошоци во бруто плата нема“ – објасни пратеникот Крмов.
„Не можеме овој трошок на работниците да го третираме како наивен. Позитивен пример во регионот е Србија – таму газдите се должни да им исплатат надоместоци или да им организираат превоз на работниците. И затоа, таму целосно го остваруваат ова право, без манипулации“ – посочи тој.
Пратениците од Левица ја предложија истата формулација за пресметка на патни трошоци за работниците која што ја предложија и при обидот за да се вразумат патните трошоци на пратениците, но која беше одбиена.
„Како најодговорна ќе ја посочам пратеничката група на ВМРО-ДПМНЕ затоа што влада на ВМРО-ДПМНЕ го има укинато ова право на работникот и бидејќи зависи од ВМРО-ДПМНЕ дали ова решение сега ќе се донесе. Дополнително, од 2010 до 2024 пратениците од ВМРО-ДПМНЕ ја чинат државата рекордни 3.705.914 евра за патни трошоци. Затоа ве повикувам да покажете сенс и доблест и да не се однесувате како некоја привилегирана каста која нема допир со реалноста и реалноста која ја живее обичниот работник. Работниците се процентуално најголем дел од населението и од вашите гласачи, и за нив треба да работиме, а не за газдите“ – потенцираше пратеникот од Левица, но и овој предлог парламентарното мнозинство не го изгласа.
Македонија
ВМРО-ДПМНЕ: Започна исплатата на зголемените плати во здравството

„Со априлската плата за месец март, здравствените работници го добија ветеното зголемување на платите од 2500 денари!“, велат од ВМРО-ДПМНЕ.
„Со многу труд, работа и посветеност, платите во јавното здравство заедно со зголемувањето во ноември минатата година, достигнавме зголемување од 4815 денари, додека пак за медицинските сестри, платите се зголемија за 6200 денари!
Моментално, просечната плата во јавното здравство изнесува над 50 илјади денари. Ова се должи на октомвриското зголемување од 10,49%, а додека пак кумулативно ќе достигне дури 17,18%!
За разлика од периодот од 2021-2023 кога реалниот раст изнесуваше само 3,8%, сега здравствените работници, добиваат реален раст на нивните плати од 9,4%.
Владата предводена од ВМРО-ДПМНЕ ги реализира своите ветувања и работи за зголемување на платите во сите сектори!“, соопшти ВМРО-ДПМНЕ.
Македонија
Учество на Муцунски на состанокот на министрите за надворешни работи на НАТО: Нагласен фокусот на Алијансата врз Западен Балкан

На покана на генералниот секретар на НАТО, министерот за надворешни работи и надворешна трговија, Тимчо Муцунски, вчера и денес учествува на состанокот на министрите за надворешни работи на земјите членки на НАТО, кој се одржа во седиштето на Алијансата во Брисел, Кралството Белгија, информира Министерството за надворешни работи и надворешна трговија.
Состанокот претставува добра можност министрите заеднички и во поширок формат да се осврнат на актуелните безбедносни случувања кои имаат импликации за европскиот континент и пошироко.
Фокусот на првиот ден од состанокот беше ставен на состојбите поврзани со руската агресија врз Украина, при што беше реафирмирана силната поддршка за дипломатските напори предводени од САД за постигнување прекин на огнот и траен, долгорочен мир преку политички дијалог и почитување на меѓународното право.
Министрите разговараа и за потребата од зголемување на издвојувањата во областа на одбраната, како и зајакнување на капацитетите и способностите на НАТО за градење колективна безбедност и одбрана, со цел ефективен одговор на заедничките закани и предизвици.
Особено беше нагласен фокусот на Алијансата врз Западен Балкан, како важен елемент за обезбедување на регионалната, но и на севкупната европска безбедност и стабилност, известуваат од Министерството.
Во време на сложени геополитички услови, кои носат широки безбедносни предизвици, министерот Муцунски ја нагласи важноста од одржувањето на единството меѓу сојузниците како столб на заедничката безбедност, значаен за заштитата на заедничките вредности.
Во оваа насока, тој ја потенцира и важноста на нашиот регион како простор од стратешко значење и за НАТО и за Европската Унија, со потреба да остане високо на агендата на двете организации. Притоа, побара зголемено внимание и стратешки пристап, особено во контекст на напорите на земјите од регионот за реализација на нивните европски и евро-атлантски аспирации преку брза имплементација на интегративните процеси, соопшти Министерството надворешни работи и надворешна трговија.