Главниот координативен кризен штаб ги објави насоките и пропозициите врз основа на кои државјаните на Србија, Косово, Црна Гора и на Босна и Херцеговина може да влегуваат и да транзитираат низ земјава.

Државјаните на овие земји, кои имаат двојно државјанство, доколку имаат живеалиште во државава, при влез не е потребно да приложуваат медицинска потврда со негативен резултат од ПЦР-тест. Оваа одредба не важи за лицата што немаат живеалиште во Македонија и при влез тие ќе мора да покажат негативен резултат од ПЦР-тест направен 72 часа пред влезот.

Носители на македонски патни исправи, кои имаат адреса на живеење во Србија, Косово, Црна Гора и во Босна и Херцеговина, при влез во државава исто така задолжително треба да приложат медицинска потврда со негативен резултат од ПЦР-тест.

Оние што во Македонија доаѓаат преку аеродромите во Скопје и Охрид нема да треба да приложат негативен тест на Ковид-19 доколку потпишат изјава дека во рок од три часа ќе ја напуштат територијата на државата.

Исто така, доколку патниците од овие држави влезат во земјата преку копнен граничен премин, а имаат намера да заминат со авион, потребно е задолжително да прикажат авионски билет (електронски билет) и да потпишат изјава за транзит, односно во рок од три часа да ја напуштат државата.

За професионалните возачи, не е потребно приложување потврда за тест, со обврска за задолжително почитување на протоколот за вршење меѓународен превоз.

Потврда од направен тест не е потребна ниту во случај на организиран автобуски превоз, а во овој случај територијата на Северна Македонја мора да се напушти во рок од пет часа, со потпишување изјава за транзит. Исто така, одредбата за приложување потврда за направен ПЦР-тест ги исклучува дипломатите од Србија, Косово, Црна Гора и од Босна и Херцеговина, акредитирани во земјата, и членовите на нивните семјства.

Задолжителна обврска за приложување негативет тест направен најмногу три дена пред влезот има за државјани на Србија, Косово, Црна Гора и Босна и Херцеговина, кои имаат регулиран привремен или постојан престој во земјата, како и за државјаните од овие земји што имаат претходно закажани здравствени прегледи и лекување во македонски болници.

Министерството за внатрешни работи, по прибавување на пополнетите изјави од државјаните на овие четири земји, заедно со медицинските потврди од ПЦР-тестовите, ќе ги доставува на проверка и потврдување до Министерството за здравство, а Министерството за здравство ќе ги доставува до регионалните центри за јавно здравје во согласност со адресите.