Македонија
Пендаровски ги прими учениците добитници на пет медали на Oлимпијадата во Доха

Претседателот Стево Пендаровски денеска ги прими учениците коишто освоија пет медали на меѓународната јуниорска олимпијада по природни науки којашто од 3 до 12 декември минатата година се одржа во Доха, Катар.
Во конкуренција на 409 ученици од 70 држави на Олимпијадата по природни науки македонскиот тим се закити со два сребрени и три бронзени медали, што претставува најголем успех на ваков вид натпревари. Мајкл Георгиевски од гимназијата „Добри Даскалов“ во Кавадарци и Никола Спировски, ученик во деветто одделение во скопското основно училиште „Јохан Хајнрих Песталоци“, освоија сребрен медал. Бронзен медал, пак, освоија Емилија Николовска, ученичка во деветто одделение во ОУ „Григор Прличев“ во Охрид, Матеј Гелев, ученик во деветто одделение во велешкото основно училиште „Блаже Конески“, како и Стефан Дрмач, ученик во прва година во гимназијата „Раде Јовчевски-Корчагин“ од Скопје. На олимпијадата учествуваше и Теона Кировска, ученичка во прва година во средното училиште „Кочо Рацин“, во Свети Николе.
„Секој позитивен пример мора да се истакне и државата мора да ги препознава и целосно да ги поддржува талентираните ученици и млади луѓе. Навистина е импресивно да се освојат пет медали на меѓународно, високо ниво. Посебно ме радува овој успех бидејќи досега многу ретко момчиња и девојки од нашата земја учествувале на меѓународни натпревари“, истакна претседателот Пендаровски на средбата.
Во оваа насока, претседателот Пендаровски посочи дека во рамки на своите надлежности во континуитет ќе дава поддршка за развој на потенцијалот и талентот на сите поединци во земјата.
На средбата учениците го објаснија процесот на селекција на учениците коишто имаат право да учествуваат на овој натпревар. Односно, како што рекоа тие, поминале низ неколку подготвителни тренинзи со ментори, професори од Природно математичкиот факултет, во Скопје. Следен предизвик, како што посочија учениците, е Олимпијадата во Франкфурт, Сојузна Република Германија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Без струја делови од Кисела Вода

Од ЕВН Македонија АД известуваат дека денеска без електрична енергија ќе останат:
– во периодот од 09.00 до 12.00 часот, дел од корисниците од ул. 1523, објектите на фирмите Пастор, Орнамакс и други во нивна близина, корисниците од бул. Борис Трајковски од бр. 77 до бр. 85, како и корисниците лоцирани помеѓу објектите на фирмите Циле Инжињеринг и Интеграф. (општина Кисела Вода)
Македонија
Шукова: Време е за резултати, уреден Бутел, нови паркови, подобар превоз и вода за сите

Кандидатката за градоначалник на Град Скопје од СДСМ, Каја Шукова, вчера одржа митинг во Бутел, каде пред жителите порача дека Скопје мора да се гради со дела, а не со празни зборови.
„Вечерва не сум тука само како кандидатка за градоначалничка на Скопје. Тука сум, пред сè, како човек што верува во овој град и во луѓето што го прават Бутел дом,“ изјави Шукова.
Таа се осврна на реалните проблеми со кои се соочува општината запуштеното корито на Серава, недоволната инфраструктура, недостигот на јавен превоз и дотраената водоводна мрежа и истакна дека решенијата веќе се подготвени.
„Серава ќе стане место на кое ќе се гордееме уредено корито, пешачки и велосипедски патеки, зелена зона за сите. Новите паркови и 10.000 засадени дрвја ќе го вратат сјајот што Скопје го имаше пред децении,“ нагласи таа.
Посебен акцент стави и на водоснабдувањето и инфраструктурата:
„Денес, 60 проценти од питката вода се губи во системот. Време е за модернизација и стабилно снабдување со вода за секој дом. Новите мостови, клучки и булевари ќе го поврзат Бутел со целиот град и ќе овозможат безбедно и побрзо движење,“ рече Шукова.
Таа потсети дека во изминатите години градот беше заложник на неработење и популизам:
„Четири години ВМРО-ДПМНЕ ги запоставуваше општините. Време е за резултати, а не за слики и празни зборови. Половина од нашите проекти може веднаш да се реализираат,“ додаде таа.
Во својот говор, Шукова повика на единство и одговорност:
„Бутел не смее да биде изолиран. Бутел е почетна точка на модерното Скопје место каде што се инвестира, се гради и се слуша секој граѓанин.“
Македонија
Претежно облачно со врнежи од дожд, повремено пообилни

Времето денеска ќе биде претежно облачно со повремени врнежи од дожд кои ќе бидат пообилни во западните делови, каде се очекува локално да наврнат и над 25 l/m²дожд. Ќе дува слаб до умерен ветер од југоисточен правец.
Минималната температура ќе биде во интервал од 7 до 12, а максималната ќе достигне од 11 до 15 степени.
Во Скопје, претежно облачно со повремени врнежи од дожд, повремено пообилни. Ќе дува слаб до умерен ветер од југоисточен правец. Минималната температура ќе се спушти до 12, а максималната ќе достигне до 14 степени.
Времето во наредните денови
Во сабота времето ќе биде променливо облачно со повремени локални врнежи од дожд со послаб интензитет. Потоа следува претежно стабилно време со потпросечни температури за овој период од годината.