Премиерот Христијан Мицкоски денес одговарајќи на новинарско прашање во однос на реакцијата на судиите и обвинителите за ставот дека нивните плати не се заслужени и обвинувањата од опозицијата за блокирање на процесот на реформската агенда во правосудството, изјави дека на цела македонска јавност и стана јасно дека, не зборуваме за суштински реформи во Судството и Обвинителството, туку зборуваме за зголемување на буџетите, со цел зголемување на платите.

„Тоа е реформата, и добро е што сега македонската јавност може да суди. Дали овие коишто, не зборам за сите, ќе повторам, еве нека ми простат, има и такви коишто си ја вршат својата работа согласно со Закон и Устав, но има мал дел коишто го загрозуваат овој процес, и обвинители и судии, коишто не ја заслужуваат ниту оваа плата којашто ја земаат.

Дали ние ќе одвоиме, да речеме два пати повеќе, од некои многу поразвиени земји членки во Европската Унија, еве оставам јавноста и граѓаните да судат, за платите на судиите и обвинителите. Тоа е суштината. Значи ние континуирано зборуваме за зголемување на платите на судиите и обвинителите“.

Мицкоски додаде дека никој не е против измените во Законот за обвинителска и судска служба.

„Тие се два закони. Каде што за администрацијата, за вработените во судовите и обвинителствата ќе ги зголемиме платите. И тоа ќе го направиме, и тоа е дел од преговорите што ги водиме со синдикатите и ние сме подготвени тоа да го направиме. Тука никој нема против и тоа ќе го направиме, затоа што дискрепанцата е пет, седум спрема еден, помеѓу нивните асистенти и помошници и самите обвинители и судии. И ќе почнеме еден цел серијал на случаи како суделе поедини судии и како обвинувале поедини обвинители. Јавноста нека суди дали тие заслужуваат, па да кодошат таму по Брисел и каде одат, дека Владата не им ги зголемува платите. Еве јавноста нека суди и тие во Брисел нека судат дали овие луѓе што се генератори на корупцијата во државата, наместо да се борат против корупцијата, ја заслужуваат оваа плата“.

Јас не очекувам од тие, коишто ги поставуваа овие судии и обвинители, додаде Мицкоски, да имаат поинаков став од тој којшто го имаат, заштитнички.

„Ние како Влада еве 15 месеци сме избрани, нема ниту еден скандал криминален, коруптивен, тоа е владеење на право. Општините четири години, каде што има градоначалници на ВМРО-ДПМНЕ, нема ниту еден скандал криминален, коруптивен.
Кој ги брани обвинителите и судиите. Тоа се најчесто оние политичари коишто доаѓаат од Мала Речица или од Бихачка, бидејќи тие се нивниот последен бастион за одбрана од криминалот и корупцијата во минатото. Затоа што се свесни и исплашени, тоа е многу важно, исплашени, дека оној шверцерски закон којшто го протнаа со европско знаме во Парламентот, не е доволен да се спасат. И дека има и други одредби коишто го препознаваат нивниот криминал. И за којшто тие треба да дадат отчет“.

Како што рече, со овие судии и обвинители, правдата е невозможна.

„Затоа после локалните избори ќе ги најдеме сите правни механизми, без разлика какви и да се критиките. Без разлика какви и да се критиките, мора да имаме обвинители коишто обвинуваат и судии коишто судат според Закон и Устав.“

Денес и утре, во периодот од 10 до 16 часот, две екипи од Клиниката за пулмологија со амбулантни возила ќе им прават проверка на дишните патишта на жителите на Трубарево и околината по големиот пожар во фабриката за рециклирање пластика и електронски отпад. Министерот за здравство Азир Алиу вели дека за скринингот подготвиле прецизно утврден протокол.

„Скринингот го правиме затоа што сакаме како Министерство и како институции да бидеме сигурни дека граѓаните што се движат во тој регион немаат здравствени проблеми со дишните патишта. И тогаш некои од нив не сакаа да се евакуираат привремено надвор од тој простор, блиску до пожарот. По скринингот, в сабота и в недела, ако лекарите утврдат дека има потреба понатаму да се третираат нашите граѓани, тие ќе се третираат тука, на Клиниката за пулмологија. Идејата на скринингот е, прво, да бидеме сигурни дека  граѓаните од тој дел немаат таков тип на проблеми, а второ, ако имаат, навреме да се интервенира од наша страна. Тоа е надлежност на нашето Министерство и ние мора да се грижиме и навремено да спречиме ако има нешто кај оваа популација“, рече министерот Алиу.

Амбулантните возила со екипите од Пулмологија се поставени пред маркетот „Бренд“ и во близина на маркетот „Флорида“ во Трубарево. На преглед може да дојдат сите жители на Трубарево и околните населени места, особено оние што забележуваат тешкотии при дишењето или имаат симптоми на заболување на дишните патишта. Мобилните екипи во амбулантните возила ќе им направат комплетен клинички преглед, спирометрија, ЕКГ и други испитувања потребни за проверка на состојбата на дишните патишта.

Градоначалничката на Скопје, Данела Арсовска, со реакција по изјавата на премиерот Христијан Мицкоски дека чуствува одговорност што ја поддржал Арсовска и најави дека за сегашната состојба поради која градот е затрупан со ѓубре ќе има одговорнсот.

„Мицкоски, несреќо, јас завршувам со борбата во која твојот претседател на Советот на Град Скопје и твоите советници 4 години го блокираа и урнисаа градот: не гласаа за нови автобуси, не гласаа за бесплатен превоз, не дозволија да се набави нова механизација за да се чисти ѓубрето, не гласаа ништо во интерес на граѓаните за да биде задоволена твојата суета.

Ни за вработување нови пожарникари ни за нови противпожарни возила не им рече да гласаат“, пишува Арсовска во својата реакција.

Ако сакаше да има одговорност, требаше, додава таа, твоите советници да дадат оставка, за сега ти, заедно со нив, да не си директно одговорен за хаосот во Скопје.

„Еве сега и јас им се извинувам на граѓаните што сум мислела дека си чесен, професор и интелектуалец не знаејќи каков навистина си.

Администрација во Град Скопје јас не ја донесов, работев со луѓе што се професионални, вредни и го сакаат градот за разлика од вас, тоа се луѓе што вие и таквите како вас ги вработиле во изминатите 30 години.

И за крај, ти и твојата администрација имате одговорност затоа што:
– над 60 деца без вина ви настрадаа во Кочани и ништо не презедовте;
– ви изгоре половина држава за да си прави некој простор за фотоволтаици;
– ви изгоре отпад во Трубарево, екокатастрофа, пред очите на сите твои институции, кои не реагираат;
– убиства ви се случуваат пред очи секој ден;
– убиваат жени, кои тебе и твојот министер Тошковски во очај ве молеле за помош.

Арсовска дополнително прашува дали ќе има одговорност за над 150 небезбедни нелегални дивоградби висококатници, кои секој момент може да се срушат во Чаир.

Оди скриј се и молчи!

Отпадот ќе се исчисти за една недела бидејќи тебе ќе ти треба успешен градоначалник, фирмичките приватни ви се подготвени за акција, ама животите и здравјето на невините за кои си ти одговорен нема да ти ја исчистат совеста!

П. с. Луке, бргу смислувај нов постер за Мицкоски да дефокусира, да глуми жртва и да бега од новинарски прашања“, додава во напишаното Арсовска.