Македонија
Пендаровски: На полето на меѓуетничките односи, Македонија е најстабилна од независноста до денес

Вчеравечер, во рамки на изборниот караван, претседателскиот кандидат Стево Пендаровски беше со тетовци. Заблагодарувајќи им се за поддршката во изминатите 10 години, Пендаровски рече дека со масовна излезност мора да ја осигураме победата и иднината на земјата.
„Не постои ситуација во која сум се однесувал како да не сум претседател на сите. Сите сте биле еднакви на мене. Тетово е град на повеќе националности и вие тоа најдобро го знаете. Важно е да се почитуваме, да немаме конфликти и да не се сеат омраза и гнев. Македонија може да биде стабилна и просперитетна држава само и само ако сите овде, во оваа заедничка куќа се чувствуваме рамноправни, а не некој да биде газда, а друг да биде потстанар“, истакна Пендаровски.
Посочувајќи дека актуелната политичка структура направи две историски работи, односно државата стана членка на НАТО и ги почна преговорите со ЕУ, што е услов за брз економски развој, Пендаровски потенцираше дека во тој процес и со потпишувањето на Договорот од Преспа не беше одземено ниту „М“ од македонското.
„Нашата политичка структура комплетно го заштити македонскиот идентитет и јазик, со многу трпение и да не беше внатрешната блокада од опозицијата, ние за 4-5 години ќе ги завршевме преговорите и ќе влезевме во ЕУ. Опструкциите на нашата опозиција не сопнаа на патот кон Европа“, додаде Пендаровски.
Во оваа насока тој потсети и дека за сите важни прашања од македонската независност наваму, опозицијата беше против, како што сега е против иднината и иднината на државата. „Но никој веќе нема време за чекање и нема простор за нови договори. Сè освен поддршка за нас е ризик за иднината на нашата земја“ рече Пендаровски и ги повика тетовци на 24 април да покажат дека нашиот избор е европска Македонија.
На митингот во Тетово претседателскиот кандидат Стево Пендаровски доби поддршка и од австрискиот политичар Андреас Шидер, кој од 2019 година е европратеник и копретседавач со Мешовитиот парламентарен комитет МК – ЕУ. Во обраќањето пред тетовци, Шидер посочи дека Пендаровски е политичар со визија, политичар кој знае дека местото на оваа земја е во Европа и кој знае како да ја однесе таму.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски молчи пред криминалот на ВЛЕН, а ДУИ се недопрени од неговата власт, велат од СДСМ

Смешен е Мицкоски кога го обвинува СДСМ дека слугува на ДУИ, обидувајќи се на тој начин да го прикрие сопствениот срам. Мицкоски кој како опозициониер тврдеше дека кога ќе дојде на власт ќе расчистел со криминалот на ДУИ, прва работа што направи е да го пушти Артан Груби да избега. За една година власт, ниту еден функционер на ДУИ не е допрен, велат од СДСМ.
Во исто време, додаваат од опозициската партија, Мицкоски молчи и за криминалот на својот актуелен партнер Изет Меџити, криминал тежок 225 милиони евра.
„Молчи и го штити за дивоградбите во Чаир, молчи за злоупотребите на Гаши, молчи за скандалите на косовската граница, каде терористи, барани со потерници, слободно поминуваа. Флоскулите му се празни, а граѓаните гледаат и разбираат. Му порачуваме да молчи на оваа тема, затоа што за тој да го спаси својот коалициски партнер ги издаде челновите на ВМРО-ДПМНЕ и сите граѓани и нема да има ниеден кандидат за градоначалник во западна Македонија“.
Македонија
Арсовска до Меџити: Тоа е таа насмевка кога успеваш за криминал и перење 225 милиони евра црни пари да не ти постави ниту еден новинар прашање

„Тоа е таа насмевка кога успеваш за криминал и перење 225 милиони евра црни пари преку дивоградби да не ти постави ниту еден новинар прашање, а институцииве што “донесоа правда” да не смеат на независна територија Чаир да писнат, не пак да постапуваат“, напиша на социјалните мрежи, градоначалничката на Град Скопје, Данела Арсовска.
„Туку за друго ми е постов, сите веќе знаат дека сте криминалци. Бидејќи Министеров за животна средина и дивоградби, Изет Меџити делел пари за проекти за општините низ Македонија, сакав да прочитам да не дал за Скопје случајно да се реализира некој проект.
Овој се чини е Министер само на неговите другарчиња во Чаир или мене нешто не ми е јасно во постов“, додава Арсовска.
Македонија
Алијанса за Албанците: Владата и отвора врата на корупцијата со незаконскиот меморандум за гасификација на државата

Алијанса за Албанците остро ја осудува одлуката на Владата за потпишување на меморандум за соработка со „Казандџи Холдинг“, чие подружничко претпријатие, „АКСА Енерџи“, е предмет на истраги за корупција во Гана, велат од оваа партија.
Овој потег, како што нагчасуваат, претставува сериозно прекршување на Законот за енергетика и голем ризик за енергетската иднина и јавниот интерес на граѓаните на Република Северна Македонија.
„Наместо да спроведе транспарентна и конкурентна тендерска постапка, како што јасно е предвидено во членот 94 од Законот за енергетика, Владата одлучува да склучува договори на таен и сомнителен начин, без никаква длабинска анализа за економските, еколошките и општествените последици.
Оваа мрачна практика ги зголемува сомнежите дека партиските и личните интереси се ставаат над јавниот интерес, додека граѓаните ќе бидат тие што ќе ја платат цената за проект што е спротивен на стратешката насока на земјите од ЕУ. Додека земјите членки на Европската Унија се оддалечуваат од природниот гас, Владата гради нови дистрибутивни мрежи за енергенс што е поскап и поштетен за климата и за семејниот буџет“.
Според Алијанса за Албанците има неколку прашањата на кои Владата треба да одговори.
„Зошто се прекршува Законот за енергетика и се заобиколува законската постапка за избор на партнер? Дали е направена анализа за реалните потреби од гасификација и трошоците за граѓаните?
Дали постои стратегија за развој на енергетскиот сектор за наредните 20 години, како што е законска обврска? Какви гаранции му се дадени на странскиот инвеститор за да биде „убеден“ да инвестира 1 милијарда евра?“.
Според оваа партија, партнерството со компанија вмешана во меѓународни корупциски афери е аларм за организирана корупција на високо владино ниво и бара итна истрага од надлежните институции, вклучувајќи го Јавното обвинителство и Државната комисија за спречување на корупцијата.
Алијансата за Албанците бара итно поништување на меморандумот, враќање во законски рамки и отворање на јавна дебата за енергетската безбедност и долгорочната насока на енергетските политики во земјата.
„Ниту еден договор склучен зад затворени врати на Владата не може да биде во корист на граѓаните. Транспарентноста е првиот услов за одржлив развој и борба против корупцијата“.