Македонија
Пендаровски: Односите меѓу Северна Македонија и Србија се одлични и без спорни точки

Односите меѓу Северна Македонија и Србија се одлични и без спорни точки, изјави претседателот Стево Пендаровски, по средбата со неговиот српски колега Александар Вучиќ, што се одржа во Белград.
Пендаровски рече дека неговата посета на Србија е уште една потврда за односите на добрососедство и меѓусебно разбирање меѓу двете земји, но и уште една можност, како што рече, заеднички да ги потенцираме важноста и посветеноста на градењето, одржувањето и унапредувањето на меѓусебниот дијалог, како меѓу нас, така и пошироко во нашиот регион.
„Нашите земји и народи ги поврзува долга историска и културна традиција, а ја споделуваме и визијата за заедничка иднина во големото европско семејство. Оттука, контактите на највисоко ниво меѓу нашите две земји имаат посебно значење и даваат силен сигнал и за понатамошен развој на пријателството и соработката на сите други нивоа“, рече Пендаровски.
Тој кажа дека со Вучиќ разговарале и за француската иницијатива за нова променета методологија во водењето на претпристапните преговори со ЕУ.
„Јас уште еднаш го истакнав ставот на мојата држава дека за нас не постои друга одржлива алтернатива, освен полноправно членство во Унијата на крајот од овој процес. Европската интеграција на Северна Македонија останува долгорочна определба, мотивација за трансформација на општеството и имплементирање на највисоките европски стандарди. Во овој контекст ме радува фактот што и од Скопје и од Белград упатуваме јасни пораки дека Европската Унија не треба да заборави на западниот Балкан, за кој перспективата за членство во ЕУ е единствена гаранција за стабилност, сигурност и просперитет и всушност е единствена одржлива опција. Европската интеграција на регионот е најдобриот начин што ќе овозможи демократска трансформација на нашите општества, просперитет и зајакната регионална соработка“, рече македонскиот претседател.
Тој на средбата со Вучиќ изразил очекување дека со помош на меѓународната заедница и посебно западните партнери ќе бидат создадени услови за сериозен напредок во дијалогот Белград-Приштина, па и, како што рекол, за конечно затворање на ова прашање.
„Решението што ќе го договорат Белград и Приштина мора да придонесува кон регионалната стабилност и безбедност и по наше мислење не смее да задира во суверенитетот на другите држави во регионот“, рече Пендаровски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Состојбата со пожарите е под контрола, ангажирани се и Армијата и полицијата, вели Мицкоски

Премиерот Христијан Мицкоски, одговарајќи на новинарско прашање во врска со состојбата со пожарите и тоа како државата се справува со ситуацијата, изјави дека е повикан ЕУ-механизмот за помош, но мобилизирани се сите капацитети во Македонија за справување со пожарите и состојбите сега се под контрола.
„Имаме од 30, па и повеќе пожари секој ден. Вчера беа над 50 пожари. За повеќето од нив постојат основани сомневања дека се подметнати или, пак, се случиле од негрижа. До сега можам да кажам дека во јули ја држиме работата целосно под контрола. Во функција се сите оперативни летала што ги имаат Дирекцијата за заштита и спасување, Армијата и полицијата. Во функција се и оние возила, специјални возила, условно да кажам, што ги подготвивме бидејќи знаевме што нè очекува вакво лето. Го активиравме и европскиот механизам, мислам дека е активиран уште пред неколку дена“, посочи Мицкоски.
Огнена стихија има насекаде во Европа, рече премиерот, потенцирајќи за медитеранскиот дел.
„Но имајте предвид дека ваков тип на огнена стихија има насекаде во Европа, зборувам во медитеранскиот дел. Во Грција има жртви, огромни пожари, цели населби се зафатени. Во Турција исто така има жртви и повредени, цели населби, цели градови. Албанија, Косово, Босна, Хрватска, Србија, до пред некој ден знам дека имаше речиси 240 на ден. Шпанија, Италија, Кипар исто така. Така што, во овој момент нема слободни воздухоплови кои би биле дел од тој ЕУ-механизам што би помогнал. Во моментот повеќе од 200 припадници на Армијата се на терен. Полициските службеници, практично полицајците, ги возат оние специјалните возила, БТР, „пинцгауери“ и „хермелини“. Се организираме, работата е под контрола. Пожари ќе има цело лето, ќе има и во август. Во овој момент немаме некаде огнена стихија што е надвор од контрола“, објасни тој.
Македонија
ДУИ: Владата веднаш да ја укине антиуставната и незаконска одлука што ги дискриминира општините и ја исклучува дијаспората

Демократската унија за интеграција изразува загриженост и револт поради како што истакнуваат, дискриминаторската одлука на Владата за намалување на бројот на советници, со што директно се оштетуваат општините во кои значителен дел од населението се Албанци.
Од партијата на Ахмети додаваат дека уште во првата недела од својот мандат, оваа Влада презела незаконска и неуставна акција, еднострано менувајќи ја методологијата за пресметка на процентот на населението преку исклучување на „нерезиденти“, што во пракса значи исклучување на дијаспората.
„Како резултат на тоа, процентот на Албанците во државата беше вештачки намален од 29,5%, според пописот од 2021 година, на 24,3% – процент што е дури и понизок од оној од пописот во 2002 година, кога Албанците сочинуваа 25,17% од населението.
Оваа намерна статистичка манипулација веднаш беше искористена во формулата на балансерот, со што Албанците беа намалени за 5,2%, а потоа и за деформирање на нивното претставување во повеќе од 20 општини преку намалување на бројот на советници во овие единици на локалната самоуправа. Оваа одлука претставува директно кршење на член 34 од Законот за локална самоуправа, каде јасно стои дека бројот на советници се определува врз основа на бројот на жители, а не врз основа на нивниот резидентен статус“.
Спорната одлука, велат од ДУИ, е спротивна и на Уставот на државата, како и на основните принципи на еднакво претставување и право на учество. „Поради тоа, ние инициравме постапка за оценка на уставноста, по што Уставниот суд донесе одлука во наша полза, констатирајќи дека институциите не смеат да ги игнорираат нерезидентните граѓани, бидејќи тоа е спротивно на духот на еднаквост и инклузивност што го гарантира Уставот.
Сепак, и покрај оваа јасна одлука на Уставниот суд, Владата сè уште нема преземено конкретни чекори за укинување на дискриминаторската одлука и за враќање на легитимното право на општините за пропорционално претставување. Обидите за вметнување на оваа дискриминација и во Законот за локална самоуправа пропаднаа поради отсуство на двојното мнозинство (Бадинтер), но политичката волја за наметнување на оваа неправда останува очигледна“.
ДУИ бара Владата веднаш да ја укине антиуставната и незаконската одлука, да го врати бројот на советници согласно реалните податоци од пописот и во согласност со одлуката на Уставниот суд и законот.
Сега е моментот, додаваат од оваа партија, кога може да се дејствува за да се спречат сериозни последици врз легитимноста на претстојните локални избори.
Според ДУИ, доколку Владата не ја коригира оваа неправда, тогаш одговорноста ќе падне врз сите оние кои, со своето молчење или соработка, го легитимираат институционалната дискриминација против граѓаните и исклучувањето на дијаспората од јавниот живот.
„Во спротивно, ние како политички субјект ќе бидеме принудени да ги искористиме сите правни и институционални средства за поништување на оваа одлука и за заштита на легитимните права на општините и на нашите граѓани“.
Македонија
Мицкоски за интерпелацијата на Коцевски: Јас не ги менувам ставовите преку ноќ

На еден ден пред расправата за интерпелацијата на државниот јавен обвинител Љупчо Коцевски, поднесена од партијата Левица, премиерот Христијан Мицкоски вели дека не го менува ставот ниту тој како човек ниту, пак, го менува ставот партијата ВМРО-ДПМНЕ. Мицкоски уште во март, по пожарот во Кочани, рече дека ќе им даде шанса и на Коцевски и на другите обвинители да работат и да сработат имајќи ја предвид чувствителноста на ситуацијата.
„Јавноста ќе види утре. Ние како политичка партија и јас како човек не ги менувам ставовите преку ноќ“, рече премиерот Мицкоски одговарајќи новинарски прашања по свеченото отворање базен во ООУ „Невена Георгиева-Дуња“ во Кисела Вода.
Интерпелацијата за Коцевски ја поднесе партијата Левица во јуни поради селективност во истрагата за пожарот во Кочани, политичко влијание во работата на Обвинителството, функционален хаос во Вишото јавно обвинителство Скопје и непостапување по службена должност за дивоградбите во Скопје.
Пратениците утре ќе расправаат за интерпелацијата на Коцевски во рамките ја 64. пленарна седница на Собранието.
Обвинителот Коцевски ги отфрли сите наводи во интерпелацијата и рече дека функцијата ја врши чесно и одговорно.