Претседателот Стево Пендаровски, во рамките на официјалната посета на Полска, оствари средба со полскиот претседател Анджеј Дуда по што се одржа и заедничка прес-конференција, на која тој изрази благодарност за брзата ратификација на протоколот за членство во НАТО и постојаната поддршка од Полска за европските интеграции на земјава.

„Со претседателот Дуда имавме искрен и содржаен разговор, на кој констатиравме дека Република Северна Македонија и Република Полска одржуваат пријателски односи, со постојан политички дијалог, со растечка економска соработка и со обострана заложба за јакнење и унапредување на соработката во сите области од заемен интерес. Во фокусот на средбите со нашите полски домаќини беше и остварувањето и на нашата втора стратешка цел – членството во Европската Унија, во контекст на претстојните самити на Унијата – во март во Брисел и во мај во Загреб“, истакна македонскиот претседател по средбата.

Пендаровски рече дека искуството на земјите од вишеградската група е исклучително полезно во нашиот процес на евро-атлантска интеграција.

„Во таа насока сакам да истакнам дека т.н. скопска конференција како платформа за размена на полските искуства во интеграциите е ефективна за нас. Задоволни сме што го споделуваме искуството и знаењето со нашите полски партнери на досега одржаните седум состаноци“, нагласи тој.

Претседателот изрази благодарност и за помошта од Полска во справување со бегалската и мигрантската криза на нашата јужна граница.

„Заклучно со март оваа година, 1.000 полициски офицери од Полска во рамките на 34 ротации и контингенти беа и ќе бидат вклучени во европската помош на нашата полиција и армија за обезбедување на таа граница“, објасни Пендаровски.

Додаде дека на средбата со полскиот колега била искажана подготвеност за зголемување на соработката во економијата, науката и образованието, како и зголемување на соработката во областа на безбедноста и одбраната.

„Заеднички заклучивме дека отворени прашања меѓу нашите држави нема, а од особена важност се развојот и интензивирањето на економската соработка за која постојат големи потенцијали од двете страни. Воспоставувањето на директната авиолинија меѓу Скопје и Варшава, а во летниот период и чартер-летовите меѓу Охрид и други полски градови, претставува важен чекор кон подобрување и олеснување на контактите помеѓу бизнис-заедниците на двете страни, меѓутоа и зголемување на бројот на посетите од страна на полските туристи“, нагласи претседателот.