Македонија
Пензионерите на протест побараа минималната пензија да биде 18.000 денари и линеарно покачување
Пензионерите од повеќе градови во државата, денес, по повод Меѓународниот ден на пензионерите – 20 Септември, излегоа на протест пред Владата.
Говорниците на протестот побараа за 3.500 денари линеарно покачување на сите пензиите, а најниската да не биде помала од 18 илјади денари или оставка на Владата.
На транспарентите пишуваше: „Имаме право на достоинствен живот“, „Линеарно покачување на пензиите“, „Оставка“.
Од Пензионерскиот синдикат претходно објавија дека во некои земји минималната пензија е поставена на 45 отсто од исплатена просечна нето-плата и се залагаат тоа да биде пракса и во нашата држава.
„Сметаме дека измената на член 37 од Законот за пензиското и инвалидското осигурување, во согласност со кој усогласувањето на пензиите се прави врз основа на движењето на индексот на трошоците на животот во висина од 50 % и порастот на просечно исплатената плата на сите вработени во висина од 50 % е добра основа за понатамошно усогласување на пензиите“, велат од Пензионерскиот синдикат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Муцунски: ВМРО-ДПМНЕ и коалицијата добиja трипати повеќе мандати од СДСМ и ДУИ заедно
Вчера победи Македонија, победи народот, победија и Македонци, Албанци, Турци, Срби, Роми, Бошњаци и Власи, победија граѓаните. Со над 280 илјади гласови разлика беше декласирана власта на СДСМ, затоа што на народот му беше доста од криминалот корупцијата, понижувањата, поделбите, притисоците, поразите и уцените, изјави потпретседателот на ВМРО-ДПМНЕ, Тимчо Муцунски.
Тој истакна дека вчера беше поразен и бојкотот на ДУИ, но беше упатен и јасен сигнал дека во Македонија мора да има одговорност за пљачкањето и осиромашувањето на граѓаните кое се случува изминатите години.
„ВМРО-ДПМНЕ и коалицијата доби трипати повеќе мандати од СДСМ, или ако сакате повеќе од ДУИ и СДСМ заедно на овие избори, со што народот јасно покажа дека овие две партии треба да завршат во опозиција. ВМРО-ДПМНЕ, согласно последните неофицијални податоци од ДИК освои 58 наспроти 18 мандати на СДСМ и 19 мандати на ДУИ. Јасна е волјата на граѓаните, покрај СДСМ, во опозиција треба да оди и ДУИ, да поминат низ една катарза, да има одговорност и да се реформираат, потоа да излезат пред судот на граѓаните“, рече Муцунски.
Во врска со претседателските избори, истакна дека разликата помеѓу победничката Гордана Силјановска Давкова и актуелниот претседател Пендаровски со околу 310 илјади гласови.
Со последните прсметки, ВМРО-ДПМНЕ на изборите освои 58 пратенички мандати, ДУИ-19, СДСМ-18, ВЛЕН-13, и Левица и ЗНАМ по шест.
Македонија
Тренчевска се повлече од партиската функција: „Нека настапат нови лица, неизвалкани од бремето на претходните функционери“
Се повлекувам од мојата функција како претседателка на Форумот на жените на СДСМ, функција што ја извршував чесно, достоинствено и во служба на граѓаните, објави на социјалните мрежи Јованка Тренчевска.
Како што додаде, од партиските структури се повлекува целосно одговорно и самосвесно, со сигурност дека не ја изневерила довербата што ѝ била дадена.
„Од денес во СДСМ нека настапат оние со квалитети, вистински знаења, лицата блиски до народот на кои им се верува. Нови лица, неизвалкани од бремето на претходните функционери. Јас верувам во моите социјалдемократи и знам дека промените ќе бидат на подобро!“, вели Тренчевска.
Како што рече, вчерашниот ден покажал дека живееме во демократска држава, каде што моќта е на народот, онака како што и треба да биде.
„Во нашиот мандат како Социјалдемократски сојуз на Македонија никој не оставивме сам, носевме мерки и закони што им помагаат на сите граѓани. Ги донесовме највисоките плати и пензии, се грижевме за најмладите и за лицата со попреченост. Чекори што не сакам да избледат со текот на времето! Од моето дејствување сфатив дека на граѓаните не им се потребни само добри закони, туку и силни реформи! Продолжувам цврсто напред. Нема да дозволам уназадувањe на социјалната работа и укинување на мерките што се од полза на граѓаните. Мене ме водат вредности во кои секој заслужува поддршка, можности и напредок и така ќе дејствувам од позиција на пратеник“, вели ексминитерката за труд и социјална политика.
Македонија
Деспотовски: Не ни требаат условени оставки во СДСМ, секој да почне од себе, без да ги чека другарите
Потребна е храброст кај партискиот врв за да се прифати реалноста на овој пораз, вели Јован Депостовски од СДСМ.
Тој укажува дека во партијата на е време за условени оставки кои ќе се ефектуираат доколку и другите си поднесат оставки.
„Секој да почне од себе без да го чека партискиот другар до него. Само така овој процес на промена нема де трае предолго а штетата нема да стане ненадоместлива“, вели Деспотовски.
Како што додава, на членството и поддржувачите потребен им е консолидиран, свесен и реформиран СДСМ.
„Вчеравечер пропуштивме огромна шанса да го направиме првиот чекор кој почнува со одговорност, со име и презиме,почнувајќи од врвот. По статутот, тоа ќе отвори веднаш простор за поширока анализа на причините за овој пораз. За одговор на прашањата: Каде исчезна онаа енергија од пред 7 години? Дали ветивме многу работи а малку исполнивме? Каде се стопи довербата и како се загуби сета онаа надеж кај луѓето? Признанието дека имаме огромен проблем е прв чекор за негово надминување“, пишува Деспотовски.
Засклучува дека за носење на брзи и квалитетни одлуки потребна е итна сериозна анализа, која не треба да се одолговлекува.
Претходно денес, оставки поднесоа потпретседателите на СДСМ, Фатмир Битиќи, и Перо Костадинов. Битиќи најави дека неговата оставка ќе биде целосно ефективна кога тоа ќе го сторат и останатите сопартијци кои го сочинуваат раководството на партијата.
По изборниот пораз, првиот човек на СДСМ, Димитар Ковачевски, синоќа повика на нови внатрешни избори на сите партиски тела, почнувајќи од раководството на СДСМ до претседателите на општинските организации.