Македонија
Пензионерите в година просечно ќе добијат по 10.000 денари

„Ако останевме на стариот модел од претходната влада, пензионерите ќе добиеја зголемување од 400 денари, а ние в година ќе даваме околу 10.000 денари повеќе или речиси 850 денари месечно“, премиерот Заев ги објасни пред претставниците на здруженијата на пензионерите мерките за поголеми пензии на средбата во Сојузот на пензионерите, на која учествуваше и министерот за здравство, Венко Филипче.
Премиерот Заев истакна дека покачувањето на пензиите е најавено уште во април оваа година кога стана јасно дека економските мерки даваат резултати и дека приходите растат, што овозможи буџетот за 2020 година да биде посветен на човечкиот капитал и на грижата за пензионерите.
„И тоа не е симболично покачување. Напротив. Од јануари во 2020 година просечната пензија со предвиденото покачување ќе изнесува околу 15.500 денари. Владата за 2020 година предвиде покачување од 700 денари и дополнително усогласување од речиси 200 денари, што значи дека пензиите ќе пораснат приближно 900 денари“, рече Заев.
Во своето обраќање пред пензионерите премиерот Заев соопшти дека во Владата се прават анализи за подобрување и осовременување на системот на пензионерските и домовите за возрасни лица со вклучување економски мерки, односно субвенции за инвестициите, кои ќе вклучат грижа и поволни услови за изградба на домови за пензионерите.
Затоа, централно место во буџетот за 2020 година е грижата за човечкиот капитал, за луѓето, а во тој дел, истакна Заев, влегува и грижата за здравјето и грижата за нашите граѓани во социјален ризик, на кои им ја зголемивме социјалната помош 300 отсто.
На мерките во здравството особено се задржа министерот Венко Филипче, кој ја издвои мерката за укинување на квотите за лекови, која веќе 2 месеца е во сила. Министерот истакна дека со укинувањето на квотите за лекови на рецепт граѓаните имаат достапни лекови во кој било период од месецот, повеќе не стравуваат дека ќе останат без потребната терапија и дека драстично за само еден месец се смени сликата за проблемот што се провлекуваше со децении.
„Мерката со укинувањето на квотите за лекови на рецепт требаше да се направи многу одамна. Посетивме повеќе аптеки во државата и секаде ни рекоа дека веќе е релаксирано. Нема метеж, секој може да добие лек кога сака. Ова е само дел од мерката за реформа во примарното здравство. Драстично за еден месец се смени сликата за еден многу сериозен проблем, кој се провлекува со децении“, потенцира министерот Филипче.
На средбата Филипче ги информира пензионерите дека вакцинацијата против сезонски грип е почната и сите лица над 65 години може бесплатно да се вакцинираат. Тој исто така ги потсети пензионерите дека во предлог-буџетот за 2020 година одвоени се средства за болничко лекување, без наплата на партиципација за пензионери со пензија пониска од просечната во Република Северна Македонија.
На средбата со пензионерите тој потенцира дека оваа Влада го зајакна македонскиот здравствен систем и воведе вистински мерки во интерес на пациентите и современи услови во болниците.
Во предлог-буџетот за 2020 година предвидени се 89 милиони денари за болничко лекување, без наплата на партиципација за пензионери со пензија пониска од просечната во Република Северна Македонија. Целта е обезбедување грижа во чувањето, следењето и унапредувањето на здравјето на пензионерите, како и заради обезбедување услови за лекување на пензионерите во болничките здравствени установи во целата држава, нагласија премиерот Заев и министерот за здравство, д-р Венко Филипче, на средбата во Сојузот на пензионерите.
Средбата ја отвори претседателката на Сојузот на пензионерите на Македонија, Станка Петрова, која поттикна некои од најважните прашања од интерес на пензионерите, на кои премиерот Заев и министерот Филипче одговорија дека се слушнати нивните потреби и дека Владата на Република Северна Македонија активно работи на мерки за нивно исполнување.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Јанев на заокружување на обуката „Истрага на местото на настанот“, насочена кон унапредување на истражните капацитети на полициските сили

Директорот на Бирото за јавна безбедност Александар Јанев присуствуваше на свеченоста за доделување на дипломите, што се одржа во Центарот за обука на полицијата во Идризово, заедно со помошник министерот за внатрешни работи и началник на Центарот за обука, Влатко Митковски, како и со амбасадорот на Италија во нашата земја, Н.Е. Паоло Палминтери.
Обуката беше реализирана од Вишиот институт за истражни техники на карабинерите на Италија, со организациска поддршка од Италијанската амбасада во Скопје.
Учесниците на курсот имаа можност да стекнат напредни знаења и практични вештини за истражување на место на настан, притоа следејќи современи европски и меѓународни стандарди.
“Посебна благодарност упатувам до италијанските експерти за нивниот професионален ангажман и пренесеното знаење и сакам да истакнам дека како институција, особено ја цениме оваа соработка што претставува значаен чекор кон унапредување на капацитетите на нашата полиција и поддршка на владеењето на правото”, истакна директорот Јанев, додавајќи дека ова е уште еден показател за успешната и стратешки ориентирана билатерална соработка со Италија во областа на безбедноста и претставува дел од заедничките напори за градење побезбедно и посилно општество.
Македонија
Николоски учествува на висок министерски форум во Истанбул

Вицепремиерот и министер за транспорт Александар Николоски денеска и утре учествува на Форум за министри за транспорт што се одржува во Истанбул.
Во планираната агенда е предвидено обраќање на вицепремиерот Николоски на панелот насловен ,, Иновативни можности и решенија за финансирање на транспортни коридори” .
На Форумот ,,Глобална Транспортна Поврзаност” предвидено е да се обрати претседателот на Турција, Реџеп Таип Ердоган, министерот за транспорт на Турција, Абдулкадир Уралоглу како и други министри од Европа и светот.
На настанот ќе земат учество и бројни министри како што се министерот за транспорт на Шпанија, на Албанија, на Саудиска Арабија, Сингапур, Црна Гора, Обединетите Арапски Емирати, како и многу други високи претставници од институции од областа на транспортот.
Македонија
Сиљановска-Давкова прими припаднички на Армијата кои успешно завршија обука во САД

Претседателката Гордана Сиљановска-Давкова ги прими капетанката Неда Волчева и поручничката Сара Тасевска кои успешно го завршија седуммесечниот курс „Maneuver Captain’s Career Course“во Џорџија, САД, организиран од американскиот тренинг центар „Fort Moore”.
На средбата на којашто присуствуваа началникот на Генералштабот на Армијата, генерал-мајор Сашко Лафчиски и американската амбасадорка Анџела Агелер, двете припаднички на Армијата ја запознаа претседателката со фазите, содржините и квалитетот на воено-образовната обука и ги споделија нивните натамошни планови, заложби и амбиции за кариерен напредок.
Препознавајќи во нив потенцијал за идни генерали, Сиљановска-Давкова им честиташе на Волчева и Тасевска за успешно завршената обука и изрази уверување дека стекнатите знаења, вештини и експертиза ќе ги применат во интерес на македонската армија.
Според неа, реализацијата на оваа програма претставува влог во македонско-американското партнерство и е посебно значајна за промоција на земјава како лојален и кредибилен сојузник во НАТО.
Признавајќи ги одличните резултати што ги постигнуваат жените, соговорниците се согласија дека нивното партиципирање во меѓународните обуки треба да биде редовна пракса.
Сиљановска-Давкова на средбата ја реафирмираше својата заложба за формирање на Регионален центар за извонредност за жени, мир и безбедност со седиште во Скопје, заради промоција на жените во безбедноста и одбраната во регионот.