Македонија
Перински во Гевгелија: Инфраструктурниот бум е она што ја издвојува оваа Влада од сите претходни

Денеска во Гевгелија, министерот за локална самоуправа, Златко Перински, заедно со премиерот, Христијан Мицкоски, градоначалникот, Андон Сарамандов и министерот за транспорт, Александар Николовски, присуствуваа на увид во градежните активности на три значајни инфраструктурни проекти.
Министерот Перински при посетата посочи дека овие три проекти, изградбата на западниот Булевар „Свети Климент Охридски“, изградбата на кружна крстосница на влезот во Гевгелија и мост над канал Рауљ како и проектот за реконструкција на дел од Булевар Гевгелија и надпатникот на ул. Железничка и железничка пруга, претставуваат инфраструктурни зафати од исклучителна важност за општината. Тој додаде дека со нив се решаваат реални и децениски наталожени предизвици на граѓаните, за кои долго време никој немал храброст ниту волја да ги реши.
„Ова е она што ја издвојува оваа Влада од сите претходни. Благодарение на заложбите и посветеноста на претседателот на Владата, Христијан Мицкоски, покажавме дека сме вистински и сериозен партнер на сите општини.“, дополни министерот.
Тој потенцираше дека успехот и динамиката на реализација на проектите зависи најмногу од првиот човек во општината. Според него градоначалникот на Гевгелија, Андон Сарамандов, со визија, посветеност и проактивен пристап ги води процесите и обезбедува проекти што оставаат видлива и долготрајна корист за општината.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Пренџов: Суштинска работа е во вторник, во девет наутро, Комисијата да биде во АНБ

Суштинска работа е, првиот работен ден од денес, вторник во девет наутро Комисијата да биде во АНБ, изјави Љупчо Пренџов, пратеник од Пратеничката група на ВМРО-ДПМНЕ и коалицијата „Твоја Македонија“.
„Во интерес на јавноста и на медиумите, сакам уште еднаш да апострофирам дека после нашиот повик за итна на седница на Комисијата за надзор на за работата на АНБ и АР, односно утврдување на датум за посета на агенцијата национална безбедност, сите политички чинители беа „за“. Второ, актуелниот претседател на Комисијата, г. Скендер Реџепи од Европскиот фронт на ДУИ, веднаш после мене имаше прес конференција на која што кажа дека тој нема да свика Комисија, дека нема ништо против да свика Комисијата претседателот на Собранието Гаши и тоа нема да биде прв пат. Зошто? Затоа што пред неколку месеци ние имавме седница на Комисијата, која што ја водеше, друг пратеник од опозицијата, а тоа е колешката Славјанка Петровска“, рече Пренџов.
Тој кажа дека императив, е на деветти, во девет часот наутро, Комисијата за надзор да биде во АНБ.
„Значи, првиот работен ден од денес, Комисијата да биде во АНБ со цело се запознае со сите списи и сите документи за оно што се случувало. Се друго, освен тоа, е изигрување на волјата на граѓаните и на јавниот интерес, бидејќи најбрзо посета во АНБ е дел од јавниот интерес. Дали кај има денес Комисија во 14, во 18 или во 22 часот, дали кај ја води Скендар Реџепи или госпоѓата Славјанка Петровска, е техничка работа. Суштинска работа е, првиот работен ден од денес, вторник во девет наутро Комисијата да биде во АНБ“, рече Пренџов.
Македонија
СДСМ: Мицкоски и Орце ќе продолжат со дивоградбите во Чаир и Скопје

ВМРО-ДПМНЕ и Христијан Мицкоски уште еднаш го покажаа вистинското лице, заштита на криминалот со дивоградбите во Чаир и урбаното дивеење, велат од СДСМ.
„Со изјавата дека нема да го следи примерот на албанскиот премиер Еди Рама и нема да руши дивоградби во Чаир, Мицкоски јавно призна дека нема намера да стави ред во хаосот со бесправната градба во Скопје туку и понатаму ќе ги штити.
Ова е истата матрица која веќе ја гледаме години наназад: Орце Ѓорѓиевски, Мицкоски и нивните градоначалници се дел од проблемот, а не од решението. Наместо да се справат со криминалните дивоградби, тие ги легализираат и охрабруваат, создавајќи уште поголем урбан хаос, уништувајќи паркови, јавни површини и го загрозуваат квалитетот на живот на граѓаните. СДСМ веќе предупреди: глас за Орце и ДПМНЕ е глас за претворање на Скопје во дивоградба.
Граѓаните на Скопје и на Македонија заслужуваат ред, закон и контрола над урбанистичкиот хаос, а не влада и градоначалници кои ги штитат криминалните структури. СДСМ ќе продолжи гласно да се спротивставува на урбаното дивеење, криминалот и дивоградбите што го уништуваат Скопје“, се додава во партиското соопштение.
Македонија
Кошта: На Северна Македонија да ѝ се гарантира дека нема да има нови барања, но договореното мора да се исполни

Претседателот на Европскиот совет, Антонио Кошта, изјави дека Република Северна Македонија треба да ги исполни преземените обврски за да може да напредува во процесот на преговори за членство во Европската унија.
На заедничкиот брифинг со бугарскиот премиер Росен Жељазков, Кошта изјави дека го разбира одреденото незадоволство кај Северна Македонија поради бројните чекори што веќе ги направила – промена на Уставот, знамето и името на државата – но нагласи дека „одобреното е одобрено, договореното е договорено и мора да се исполни“.
„Во исто време, многу е важно да се изгради доверба. И да и’ се гарантира на Северна Македонија дека она што го очекуваме и сакаме во моментов не е само нешто што го сакаме сега и очекуваме во иднина. Нема да бараме ништо повеќе да се прави подоцна. Ова е разумно. Исклучително е важно да се изгради доверба. Тоа е една од причините зошто ги повикуваме повеќето влади да работат на специфични прашања што можат да ја подобрат поврзаноста на двете страни“, рече Кошта, пренесе БНТ.
Додаде дека лично е многу вклучен во овој процес. Ги посетил и Бугарија и Северна Македонија, разговарал многу пати со премиерот, со претседателот Радев, со претседателот на Северна Македонија, со премиерот Мицкоски.
„Верувам дека по изборниот период, кој моментално е во Северна Македонија, можеме да разговараме и некако да постигнеме напредок во овој процес“, вели Кошта.
Жељазков повтори дека позицијата на Бугарија останува непроменета и дека Софија е доследна во своите ставови.
„Нашата позиција секогаш била принципиелна. Компромисното француско предлог-решение беше одобрено и од Советот и од бугарското Собрание. Нема промена на нашите принципи или пристап,“ нагласи тој.
Посочи дека Бугарија очекува почитување на договорот за добрососедство и вметнување на Бугарите во Уставот.
„Верувам дека жалбата до Уставниот суд на Република Северна Македонија на потпишаниот протокол кон Договорот за добрососедство, беше апсолутно неоправдана, експлицитно, и е дел од консензусот од 2022 година. Никогаш не сме барале аргументи во внатрешнополитичките дебати во Република Северна Македонија, но се надеваме дека говорот на омраза и почитувањето на правата на бугарското малцинство, вклучително и обврската да бидат вклучени во Уставот на Република Северна Македонија, ќе бидат исполнети, бидејќи тоа е предуслов за нивно продолжување по патот на полноправно членство“, додаде.