Македонија
Петкоска: Од дигитализација добивме само дојави за бомби и хакирани системи, Владата на СДС и ДУИ е неспособна

Министерот Алити, кој денес е тема за разрешување бидејќи стана жртва на пазарот, изјавува дека еден од клучните проблеми е и ќе продолжи да биде олеснувањето на услугите за граѓаните од страна на државните институции преку електронски пат. И како што ги олесна услугите, преку ноќ за 300 проценти се зголемија цените на катастарските услуги. Хакнат бил системот, ама дигиталните услуги биле лицето на модерната Влада, а од личните услуги можеле да изградат доверба кај граѓаните. Колку е модерна Владата и колкава е довербата кај граѓаните, ќе ви кажат денес докторите, една огромна нула, вели пратеничката на ВМРО-ДПМНЕ, Лидија Петкоска, на денешната собраниска седница.
Петкоска посочи дека од изјавите дека дигитализацијата е на висока агенда на Владата, единствено граѓаните добиле дојави за бомби и хакирани системи.
На 15 септември настапува Грковска, дигитализацијата е високо на агендата на Владата. До толку сме дигитализирани и ИТ-напреднати што секој ден имаме најави за бомби и хакирани системи. Пет дена по изјавата дека дигитализацијата е високо на владината агенда, Министерството за земјоделство една недела останува без електронски систем, а хакерите бараат пари за да го деблокираат. Доаѓа 21 септември, веб-страница на МОН е недостапна затоа што е хакирана, вели таа.
Колапс во „Пошта“, одете си, не знам кога да дојдете по пратката, системот е нападнат. Матичните лекари не може да препишат лек затоа што ФЗО го променил системот, па така хронично болните не може да добијат терапија на рецепт затоа што кога матичните пополнуваат, им се бара број на лекарски извештај, резултат од болни без терапија, преоптоварени матични лекари и специјалисти, додаде Петкоска.
Петкоска смета дека оваа влада прескапо ги чини граѓаните.
Кои црни реформи, што е асално во оваа држава па за да тече. Хакирани се сите системи, а државата ни е тотално хакирана. Македонските граѓани имаат чувство дека во Македонија не владее правото, туку владеат политичките елити на ДУИ поддржана од СДС, рече таа.
Оваа влада прескапо не чини, зошто желбата да се задржи власта е огромна, дури и по цена да се уништи државата. Ваква влада не може да ги решава проблемите, затоа што таа сама ги создава и затоа што таа самата е проблем, чие единствено решение се избори, заклучи Петкоска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Фото) Подготвена за отворање најголемата градинка во државата „Бамби“ во Чаир

Градоначалникот на Општина Чаир, Висар Ганиу, денеска го реализираше финалниот инспекциски надзор на новоизградениот објект на детската градинка „Бамби“, која претставува составен дел на детската установа „Фидани“ и ја претставува градинката со најголем капацитет на територијата на цела држава, информираат од Општината.
„Објектот е целосно опремен со современ инвентар и модерен ентериер, во целосна согласност со највисоките стандарди за предучилишни установи. Со капацитет од 350 деца и 22 функционални занимални, овој нов институционален објект обезбедува оптимални услови за ран детски развој, безбедност и благосостојба“, се наведува во соопштението.
Од Општината најавија дека по завршувањето на градежните активности и внатрешното уредување, во наредните денови се очекува да се организира и свеченото отворање на објектот, додека паралелно ќе се финализираат и последните естетски детали кои ќе ја збогатат надворешната и внатрешната визура на градинката.
Македонија
2.500 денари еднократна помош за пензионерите со ниски примања во општина Центар

Градоначалникот на Општина Центар Горан Герасимовски ги повикува сите пензионери со ниски примања да се пријават за еднократна финансиска помош од 2.500 денари, на јавниот повик што ќе биде објавен утре, 9 јули.
Право на пријавување имаат сите кои примаат старосна, семејна, инвалидска или социјална пензија, при што месечниот износ не смее да го надминува износот од 26.157 денари, односно просечната пензија исплатена во мај 2025 година.
„И годинава не ги забораваме пензионерите. Продолжуваме со поддршка за нашите највозрасни сограѓани. Оваа мерка е знак на нашата постојана грижа и солидарност“, изјави градоначалникот Горан Герасимовски.
Со барањето потребно е да се достави копија од лична карта, копија од трансакциска сметка и доказ за последната примена пензија, чек или потврда од банка за месец мај или јуни 2025 година (за старосна, семејна или инвалидска пензија). Корисниците на социјална пензија треба да достават потврда или решение од надлежниот Центар за социјална работа.
Барањето може да се подигне и поднесе во Архивата на Општина Центар, барака број 6, или да се преземе од веб-страницата на општината: www.centar.gov.mk. Документацијата се доставува секој работен ден, од 09:00 до 14:00 часот.
Повикот ќе трае до 18 јули или до исцрпување на предвидените средства, по принципот „прв дојден, прв услужен“.
За реализација на оваа мерка, Општина Центар обезбеди 5 милиони денари од буџетот за 2025 година.
Македонија
(Видео) СДСМ: Нов бран економско тонење, животниот стандард уништен

ВМРО-ДПМНЕ и Христијан Мицкоски ја туркаат државата во економски хаос – инфлацијата вртоглаво расте, животот станува се поскап, стандардот на граѓаните од ден во ден се влошува, обвини Јована Тренчевска, пратеничка на СДСМ.
Според неа, Македонија се наоѓа во нов, длабок бран на економска нестабилност.
„Последните податоци за раст на инфлацијата на годишно ниво од 4,5 % се резултат на погрешните економски политики на Владата, за што ги плаќаат граѓаните. Во секој сектор статистиката бележи раст – трошоците за храна и безалкохолни пијалаци во јуни 2025 споредено со јуни 2024 се зголемиле за 6,3 %, облека и обувки за скоро 3%, за 2% на годишно ниво се зголемле трошоците за сметки, за 3,2% трошоците за здравствена заштита се зголемени и така натаму… И ова не се само бројки – тоа е директен удар врз секое семејство, секој дом, секој граѓанин. Една година беше доволна да излезе на виделина неспособноста,неодговорноста и целосната негрижа на Владата на ВМРО ДПМНЕ за граѓаните“, рече таа.
Тренчевска рече дека Македонија и понатаму е на дното во Европа по стандард и дека просечниот македонски граѓанин има само 42% од животниот стандард на ЕУ, Србија и Црна Гора се пред нас.
„Минималната плата нема да се зголеми, просечната плата стагнира, но затоа функционерските плати се зголемуваат. Владата нема пари за повисоки плати за работници, но не се откажува од луксузот на скапи патувања, милиони потрошени на ПР и кампањи, и возење со приватни авиони. СДСМ и во најголемите кризи, ковид пандемијата и енергетската криза, ги зголеми и минималната и просечната плата, со правилни мерки го заштитивме стандардот на граѓаните. Обезбедивме тројно повисока социјална помош, раст на пензиите, милијарда евра поддршка за компаниите – тоа се мерки за реална помош и грижа за граѓаните и стопанството. Цела година континуирано предупредуваме на растечкиот тренд на инфлацијата и дека се потребни конкретни мерки. Сега повторно апелираме владата да преземе итни мерки за заштита на стандардот на граѓаните и да ги покачи платите на работниците“, рече Тренчевска.