Македонија
Петровска: НАТО е силна и моќна алијанса, која знае да одговори на предизвиците

Денеска, со обраќањето на министерката за одбрана, Славјанка Петровска, пред студентите на Државниот универзитет во Тетово продолжија серијата академиски дијалози, кои се организираат по повод годишнината од членството на Северна Македонија во алијансата и Денот на НАТО. На настанот учествуваше и министерот за економија, Крешник Бектеши, како и командантот на Командата за операции, бригадниот генерал Бесник Емини.
Пред студентите Петровска се осврна на повеќе теми поврзани со одбраната, местото и улогата на алијансата во зацврстувањето на безбедноста во евро-атлантската област, новите безбедносни предизвици во Европа, како и вложувањето, трансформацијата и модернизацијата на Армијата.
„НАТО е силна и моќна алијанса, која знае да одговори на предизвиците зашто знае навреме да се приспособи и да се промени. Алијансата минатата година на самитот во Мадрид го донесе новиот стратешки концепт, ги репозиционира своите политики врз база на своите вредности и на безбедносната реалност“, рече министерката Петровска. Додаде дека по 24 февруари 2022 година, ниту светот ниту алијансата не е иста, дека она што се случува во Украина е грубо кршење на меѓународното право и повреда на човековото право на живот и дека ниту една земја, без разлика дали е членка на НАТО или не, не може да остане имуна на тоа.
Во однос на позицијата на Северна Македонија, министерката Петровска истакна дека таа е принципиелна и добро позната, а тоа е дека ја поддржуваме одбраната на Украина и украинските граѓани и дека таа поддршка е и политичка и со донации од опрема.
Министерката се наврати и на значајноста од потпишувањето на преспанскиот договор.
„Ако во 2018 година не беше донесена политичката одлука да се потпише преспанскиот договор со Република Грција, верувајте дека денес, или особено минатата година кога почна руската инвазија врз Украина, јас како министерка за одбрана или кој и да беше министер за одбрана немаше да може со сигурност да им каже на граѓаните: Да, ние сме безбедни. Јас минатата година кога почна инвазијата и кога со разбирање многу новинари и граѓаните беа загрижени и се прашуваа дали сме безбедни, со смиреност и со леснотија одговорив – да, безбедни сме затоа што сме членка на НАТО. Тоа немаше да го одговорам ниту јас ниту кој и да беше на мое место ако навистина не бевме земја членка на алијансата“, истакна Петровска.
Министерката се осврна и на новите безбедносни предизвици, на кои, рече, ниту една земја денес не е имуна.
„Ако пред 20 и повеќе години заканите биле од конвенционален тип, денеска во 21 век зборуваме за поинаков тип неконвенционални хибридни закани, невидливи со голо око, но го чувствуваме нивното влијание. Северна Македонија беше и сè уште е цел на хибридни закани, кои имаат цел поткопување на институциите, создавање недоверба кај граѓаните во тие институции и обид да се претвори НАТО од успешна во неуспешна приказна кај нас. Наша задача како институции и граѓани е да бидеме гласни, да бидеме транспарентни, да отвораме дијалог со граѓанскиот сектор и со академската заедница и на тој начин да се справиме со дезинформациите“, рече министерката.
Во контекст на вложувањето во одбраната, Петровска истакна дека благодарение на мудрите политики одбранбениот буџет расте – тој денеска е 1,85 в% од БДП, а веќе в година е извесно дека буџетот ќе биде 2 % од БДП, што гарантира интензивен и непрекинат процес на модернизација на опремата и капацитетите на Армијата.
„Во распределбата на буџетот над 30 % се насочени кон модернизација сè со цел исполнување на НАТО-целите на способности. Но, најважно, ние ова не го правиме поради НАТО, туку, пред сè, за нашата национална одбрана зашто ако сме безбедни дома, тогаш може да придонесеме и кон колективната одбрана во НАТО“, рече министерката.
Министерот Бектеши нотира дека влезот во НАТО значи и отворање нов голем пазар за нашите компании и нивно вклучување во синџирот на набавки на алијансата, што придонесува за пораст на БДП, пораст на странските директни инвестиции, пад на невработеноста и развој на приватниот сектор.
„Гледано во последните 3 години од кога Северна Македонија е членка во НАТО, со исклучок на 2020 година поради ковид-состојбата, податоците покажуваат дека во 2022 година во однос на 2021 година во услови на енергетска криза имаме раст на бруто-инвестиции во БДП од 5,5в %, раст на вкупната трговија од 20,8 %, раст на странските инвестиции од 241 милион евра и истовремено пад на невработеноста од 1,2 %“, потенцира Бектеши.
Командантот на Командата за операции, генералот Емини, истакна дека од особена важност е да се приспособиме на новите безбедносни предизвици преку градење нови способности и дека современиот концепт на модернизација на Армијата е во корелација со новата безбедносна реалност.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски: Завршен првиот дел од санацијата на хидросистемот Ѓавато, кој повеќе од 4 години беше со пробиени цевки

Заврши првата фаза на санирање на хидросистемот Ѓавато. Бунарскиот дел е комплетно завршен, пуштена е водата и нема никаде протекување, објави премиерот, Христијан Мицкоски.
Тој додаде дека останува уште една интервенција на цевката за испуст и со тоа ќе бидат дуплирани количините вода кои ќе се влеваат во Дојранското езеро.
„Каква беше состојбата пред интервенцијата? Повеќе од четири години пробиени цевки на двата функционални бунари. Потрошени повеќе од половина милион евра за електрична енерија, а ефектот минимален или никаков. Два функционални од десет направени бунари. Негрижа и срам. Во втората фаза ќе обезбедиме најмалку уште две бунарски пумпи за зголемен капацитет и побрзо полнење на Дојранското езеро. Владата во втората фаза ќе го задолжи ФОД при ЕСМ (поранешно ЕЛЕМ) да ги репарира постојните потисни пумпи. Конечно во последната трета фаза ќе инсталираме сончеви панели со батерии за акумулирање на електричната енергија и сопствено производство на електрична енергија. Нема трошење милиони евра од буџетот за електрична енергија“, напиша Мицкоски.
Македонија
СДСМ ги објави имињата на уште 11 кандидати за градоначалници

Попладнево се одржа седница на Извршниот одбор на СДСМ. Членовите донесоа одлука со која е дадена согласност за кандидатури за градоначалници во уште 11 општини низ државата:
1. Бутел – Оливера Ливриниќ
2. Велес – Маја Хеско
3. Гевгелија – Миле Атанасов
4. Делчево – Дејан Глинџарски
5. Демир Капија – Лазар Петров
6. Конче – Благој Илиев
7. Кратово – Влатко Спировски
8. Кривогаштани – Игор Каравиловски
9. Македонски брод – Ивица Стојковски
10. Ранковце – Даниел Крстевски
11. Старо Нагоричане – Далибор Трајковски
„СДСМ јасно ја потврдува својата подготвеност да понуди силни, чесни, квалитетни и докажани кандидати за претстојните локални избори кои ќе работат во интерес на граѓаните и напредок на општините’“, соопштија од партијата.
Македонија
Гужва на границите: на Богородица и Табановце се чека по 40 минути

Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, информира АМСМ.
На ГП Богородица времето на чекање за влез е околу 40 минути, на ГП Дојран времето на чекање за влез е околу 20 минути, на ГП Табановце времето на чекање за излез е околу 30 минути, додека пак на останатите граничните премини од македонска страна нема подолги задржувања за влез и излез од државата.
Од денеска од 05:00 часот регионалниот пат Р-1106 Нова Брезница – Македонски Брод преку националниот парк Јасен ќе биде пуштен за сообраќај во термините од министерство за внатрешни работи. Се препорачува внимателно возење, почитување на сигнализацијата и прилагодување на брзината поради можни одрони на патот.