Александар Николоски, потпретседателот на ВМРО-ДПМНЕ, се обрати од денешниот народен митинг одржан во општина Росоман во рамки на изборната кампања ,,Вистинскиот избор! Твојот човек! Твоето место! За твојата иднина!“, за претстојните локални избори.

,,Промените во државата се случија минатата година, после големата победа на парламентарните и претседателските избори, и веќе една година и три месеци Македонија пулсира и живее со Владата предводена од ВМРО-ДПМНЕ. Во неколку општини вклучувајќи ја и општина Росоман, тие промени ќе се случат на овие локални избори“, истакна Николоски.

Тој се осврна и на поддршката која што Владата ја дава на локалните единици, а во случајот со општина Росоман кажа дека Владата предводена од ВМРО-ДПМНЕ, издвои 31,5 милиони денари, или околу 500 илјади евра за изградба на улици во Росоман, меѓутоа досегашниот градоначалник ја нема почнато постапката за истото.

,,Тоа ќе остане наследство за новиот градоначалник, кој што ова ќе го реализира и заеднички ќе работиме и на бројни други проекти кои што ќе ги реализираме во општината“, вели Николоски.

Николоски зборуваше и за експресниот пат, кој беше пуштен годинава, а истакна дека веќе се работи на два проекти, заедно со ЈП Државни патишта.

,,Успеaвме на почетокот на оваа година да го пуштиме и експресниот пат, првата фаза која што одеше од Градско до Дреново и втората од Дреново до Фариш. Тука е директорот на ЈП ,,Државни патишта“ и сакам да најавам дека со него веќе работиме на два проекти. Спојот со село Сирково, тоа сме го ветиле и тоа ќе го реализираме, и второто е проширување на спојот помеѓу Росоман и експресниот пат. Има еден спој, но тој треба да се прошири и да стане еден убав модерен пат, којшто го спојува Росоман со експресниот пат и на тој начин да се стига побрзо и до Скопје, но и до Прилеп, до Битола и Росоман да има многу поголема корист од самиот експресен пат, околу кој што може да се развие и цела индустриска зона“, кажа Николоски и додаде:

,,Тоа е нешто на што треба да размислуваме на следниот период, имајќи ја предвид одличната локација, одличната поврзаност и со автопатот, и можноста компаниите директно да се приклучат на експресен пат. Мислам дека треба сериозно да работиме со новиот градоначалник на формирање на една индустриска зона, каде што ќе можат компаниите да вложуваат, а сигурен сум дека интересот ќе биде голем“.

Кандидатот за градоначалник на општина Росоман, од редовите на ВМРО-ДПМНЕ, Ѓорѓи Крстевски, на денешниот митинг во рамките на изборната кампања под слоганот Вистинскиот избор! Твојот човек! Твоето место! За твојата иднина!, истакна дека време е за промени во Росоман за подобра иднина за да биде општина што се менува, што расте и се развива со реализација на бројни проекти како реконструкција на патиштата, на стадионот и проширување на сите локални патишта.

„Со поддршка на ВМРО-ДПМНЕ и со тимот на чесни, работливи луѓе започнуваме ново поглавје за Росоман. Во следниот мандат, заедно ќе го направиме она што многумина рекоа дека е невозможно. Ќе воведеме проект зелена општина Росоман. Нема да има повеќе дечиња на листата на чекање во детската градинка, ќе ги прошириме урбанистичките опфати на населените места и ќе изработиме нови урбанистички планови. Ќе ги реконструираме полските патишта во сите населени места, ќе воведеме бесплатни саеми за земјоделците од општина Росоман со посета на регионалните саеми во Нови Сад, Пловдив и Солун“, вели Крстевски.

Кандидатот за градоначалник на општина Росоман, Ѓорѓи Крстевски истакна дека ќе се реконструира стадионот, ќе се проектира нов локален пат од Росоман до Крушевица и многу други проекти во областа на образованието, спортот и културата.

„Ќе го реконструираме стадионот во Росоман, со пешачка патека и реквизити за најмалите. Проектирање и изведба на нов локален пат од Росоман до клучка Крушевица, проширување на сите локални патишта до населените места, финансиски стабилно и современо Јавно комунално претпријатие со нова зграда и зголемена плата за вработените. Модерно и современо образование. Поставување на надзорни камери и отворање на полициско одделение во соработка со МВР, модерен и атрактивен локален туризам, развој на спортот и културата, ова не се само зборови, ова е план. План што ќе го спроведеме со работа, чесност и одговорност“, рече Крстевски.

Александар Николоски, потпретседателот на ВМРО-ДПМНЕ, денес, се обрати од населеното место Тремник и истакна дека проектот за изградба и реконструкција нови улици во населеното место Тремник е дел од серија на проекти, со вкупна вредност од околу 16 и пол милиони евра, обезбедени преку соработка со Светска банка. Според него, Тремник ќе добие современа локална инфраструктура.

,,Секогаш е задоволство кога се почнуваат нови проекти. Ова е една серија на проекти за изградба и реконструкција на локални улици, која што ја правиме насекаде низ државата. Вкупно во соработка со Светската банка, алоциравме некаде над 14 милиони евра за локални улици коишто одеа во три повици, а во моментот имаме четвртиот и активен повик од дополнителни 2 и пол милиони евра, што значи дека вкупно некаде околу 16 и пол милиони евра инвестираме во локални улици и во реконструкција и во изградба“ кажа Николоски.

Николоски истакна дека проектот за изградба на нови улици во село Тремник успешно ќе се реализира и жителите на Тремник ќе добијат современи улици.

,,Овој повик заврши успешно и ми е драго што жителите на село Тремник, не само што ќе добијат нови улици, туку тоа ќе биде од врвни изведувачи и од врвен надзор. Тука изведувач е градежната компанија ,,Гранит“, а надзор е светски познатата компанија ,,Ептиса“. Заедно со Светска банка, овие три елементи, даваат една сигурност дека проектот ќе биде успешно завршен. Сакам да се заблагодарам на Марија, која што како секретар на Општина Неготино работеше на овој проект, го аплицираше во Министерството за транспорт, Министерството за транспорт во Светска банка и успеавме да ги добиеме средствата. А, сега како градоначалник, ќе има чест и да ја пресече овде лентата некаде за месец, до месец и половина, кога ќе се зaврши овој пат“, рече Николоски.

Според Николоски, ова е проект кој општината сама не би можела да го реализира, а додаде и дека ќе продолжи поддршката за општина Неготино и очекува уште поинтензивна работа по завршувањето на локалните избори.

,,Ќе продолжиме на овој начин да ги поддржуваме и останатите општини, а секако и општина Неготино. Само да кажам дека се работи за улици во должина од вкупно 930 метри, само во населеното место Тремник, и вкупната сума која што ќе се потроши е некаде околу 9 милиони денари. Средства кои што општината сама не би можела да си ги дозволи“, истакна Николоски и додаде:

,,Ќе продолжиме да ја поддржуваме општина Неготино и се надевам дека по завршувањето локалните избори и изборот за Марија на градоначалник, уште по интензивно ќе работиме на овие проекти“.