За ескдиректорот на затворот во Шуто Оризари, Филип Андов-Сокол, и за другите осомничени судот денес определи мерки на претпазливост по акцијата спроведена во затворот „Скопје“ во Шуто Оризари.

Мерки на претпаливост беа определени за десет лица поврзани со акцијата.

Мерките вклучуваат забрана за напуштање на живеалиштето, односно престојувалиштето, обврска на осомничените да се јавуваат повремено на определено службено лице во судот, привремено одземање патна или друга исправа за преминување на државната граница, забрана за приближување или воспоставување, односно одржување контакти или врски со определени лица – осомничените во оваа постапка, како и забрана за преземање определени работни активности, а кои се поврзани со кривичното дело.

Против овие решенија странките имаат право на жалба пред Кривичниот совет.

Според обвинението, петмина осуденици од затворот во Шуто Оризари незаконски биле привремено ослободувани по 8 до 10 часа, а тоа им го овзоможувал поранешниот директор Филип Андов, кој е осомничен заедно со уште девет лица во постапката на Обвинителството за гонење органзииран криминал и корупција. Тие се гонат за противзаконито ослободување лице лишено од слобода и за кривичното дело злоупотреба на службената положба и овластувањето.

Спроведувањето осуденици од затвор се врши единствено до суд, здравствена установа или друг орган. Но, тие доставувале молба до Андов, кој со факсимил или потпис одобрувал повремено да го напуштат затворот. Второосомничен е командирот на затворска полиција, кој изготувал наредба за нивен спровод, а понекогаш тоа го прваел и третоосомничениот затворски полицаец и личен возач на директорот.

„Заедно водиме: Младите се сила на Балканот“ е темата регионалната конференција која денеска ги собра младите од Западен Балкан во Скопје. Целта е младите од регионот да се обединат, да ги идентификуваат заедничките предизвици и да се залагаат за инклузивен дијалог, кој ќе им овозможи активно учество во донесувањето важни одлуки.

Ѓерѓ Мура, извршен директор на Фондот за Западен Балкан, во воведното обраќање изјави дека регионалната соработка е клучот за просперитетна иднина на Западен Балкан.

„Без разлика на секторот, било да се работи за спорт, култура или образование и младинското вклучување, нашиот напредок зависи од единството, разбирањето и заедничките можности. Во овој контекст младите имаат клучна улога“, рече Мура.

Даворин Трпески, декан на Природно-математички факултет, во поздравното обраќање истакна дека е радосен што конференција за млади од ваков ранг се одржува на овој факултет.

„Се обидуваме во нашето опкружување да ја наметнеме премисата дека вложувањето во младите е инвестиција за државата и затоа доколку се поддржуваме во нашите намери, можеме да ги направиме нашите земји поубави и попријатни места за нашите млади да останат тука“, рече Трпески.

Државниотт секретар во Министерството за здравство, Бесим Мемеди, изјави дека младите лекари се главна движечка сила на здравствениот систем. Заложба на Министерството за здравство е да овозможиме што е можно поповолни услови за развој на младите лекари и соодветно вреднување на нивниот труд. Покрај зголемувањето на платите, кои се значаен чекор за мотивација младите доктори да останат во државата, Министерството за здравство веќе активно работи и на процесот на вработување 300 + 300 млади специјализанти.

„Со овие чекори ја јакнеме здравствената заштита и испраќаме силна порака дека младите лекари се наш приоритет и иднината на здравствениот систем“, рече Мемеди.

На првата пленарна сесија беше истакнато дека во време на важни регионални политички и социјални промени младите на Балканот активно учествуваат во процесите на создавање подобра иднина.

Драгана Стојановиќ, извршна директорка на Центарот за граѓански политики и одржлив развој (ЦППОР), истакна дека во Србија се случува историски момент бидејќи студентите ја водат најголемата демонстрација во регионот од 1968 година.

„Младите во Србија, и покрај насилството и репресијата од властите, не подлегнуваат на заплашувања и продолжуваат да се борат за својата иднина. Ова не е само политичко прашање, туку егзистенцијално“, изјави Стојановиќ.

Филип Ивковски, претседател на Националниот младински совет на Македонија (НМСМ), рече дема треба да сме свесни дека голем дел од предизвиците со кои се соочуваат младите, како што се миграциите, младинскиот стандард, вработувањето, образованието и така натаму, се всушност предизвици на кои самите млади може да понудат решенија, само треба да им се даде можност да бидат слушнати.

Савче Ѓошева, студентска правобранителка, рече дека квалитетот во високото образование останува конзистентна приказна на чие подобрување треба да се работи.

„Кој било студент да прашате, ќе ви посочи дека проблемите не се малку на број, но она што е најважно е дека сè уште сме далеку од бесплатно високо образование и модерен пристап кон наставата, став што го делат сите студентски организации. Потребни ни се национален консензус и силна волја од општествените актери за да се случи ваква реформа“, рече Ѓошева.

Стојан Пандов, член на Унијата на младите сили на ВМРО-ДПМНЕ, рече дека Владата е посветена на создавање подобри услови за младите преку модернизација на образованието, поттикнување на претприемачкиот дух и создавање нови можности за вработување.

Стефанија Кузмановска, потпретседателка на Социјалдемократската младина на Македонија, рече дека во свет на брзи промени, соочени со дострелите на науката и технолошкиот напредок, идниот интелектуален капацитет треба да се подготвува преку образование што ќе овозможи научна извонредност и вредносна ориентација.

Конференцијата преку пет работилници се фокусира на клучни области, како што се образованието, здравството, вработувањето, културата и климатските промени.

Марија Ѓорѓиевска, програмска асистентка во ХЕРА, рече дека достапно, доверливо и квалитетно здравство е клучно за јакнење на младите. Потребна е посебна превентивна програма за млади. Новите здравствени предизвици не се препознаеини.

Вероника Гијовска, членка на Студентското собрание при Природно-математички факултет, како млад истражувач посочи дека младите се свесни за климатските промени, но не се доволно запознаени со главните предизвикувачи и со политиките што ги регулираат.

На работилницата посветена на културата беше истакнато дека културата е моќен инструмент преку кој младите може да ги изразат своите идеи и да се борат за промени. „Преку уметноста ние им даваме можност на младите да се ангажираат и да бидат активни во создавањето подобро општество“, изјави Даниела Кортоци од Министерството за култура на Албанија.

Евгенија Јанакиевска од Институт „Прогрес“ рече дека младите заслужуваат фер можности, достоинствени плати и работни места што ќе им овозможат да го достигнат својот целосен потенцијал.

На крајот од конференцијата е предвидено усвојување декларација, која ќе служи како важна алатка за креаторите на политики и за лидерите на граѓанското општество да работат заедно со младите.

Конференцијата е дел од регионалниот проект „Зајакнување на младите за демократска и одржлива иднина на Западен Балкан“, поддржан од Фондот за Западен Балкан, а имплементиран од ХЕРА – Асоцијација за здравствена едукација и истражување – Северна Македонија, Центарот за популациски политики и одржлив развој – IPPF Србија, Организацијата за унапредување на квалитетот на образованието (ОРКА) – Косово и од Граѓанската отпорност – Албанија.

Претседателот на ЗЕЛС и градоначалник на Кисела Вода, Орце Ѓорѓиевски, денес беше дел од одбележувањето на Меѓународниот ден на ретките болести, во организација на Националната алијанса за ретки олести на Република Македонија. На настанот присуствуваа и директорот на Фондот за здравствено осигурување, Сашо Клековски, заменик-министерот за здравство, Јовица Андовски, претседателот на Комисијата за ретки болести, д-р Злате Стојановски, како и претседателката на Националната алијанса за ретки болести, Наташа Ангелковска.

„Денес, 28 февруари, се приклучуваме кон глобалната иницијатива за подигнување на свеста за лицата со ретки болести. Ова не е само симболичен ден, туку и потсетник на нашата заедничка одговорност да градиме инклузивно општество во кое секој има еднакви можности и пристап до потребната грижа.

Како градоначалник на општина Кисела Вода и претседател на ЗЕЛС сакам да изразам длабока почит кон сите семејства, медицински професионалци и здруженија, кои секојдневно се борат за подобри услови за живеење и пристап до здравствени услуги за овие лица. Нивната посветеност е клучна за создавање поголемо разбирање и прифаќање во општеството. Ние сме свесни за тоа колку е важно да се создадат политики што ќе ги подобрат условите за живеење на лицата со ретки болести, како и да се обезбеди пристап до неопходни лекови, терапии и поддршка. Преку нашите иницијативи и во соработка со други институции и здруженија, ќе продолжиме да работиме на зајакнување на правата на овие лица и да им обезбедиме пристап до сите услуги што им се потребни за достоинствен живот.

Во насока на поддршка, Општина Кисела Вода веќе трета година обезбедува канцелариски простории за здруженијата што се посветени на лицата со ретки болести. Овие простории, сместени во рамките на општинските објекти, овозможуваат полесен пристап до поддршка и директна соработка со институциите.

Ретките болести не смее да бидат невидливи. Да останеме солидарни и посветени на создавање општество што прифаќа, поддржува и обезбедува достоинствен живот за секого“, истакна претседателот на ЗЕЛС, Ѓорѓиевски,