Министерството за социјална политика, демографија и млади, во соработка со Германското друштво за меѓународна соработка (ГИЗ), денеска официјално ја отвори првата Национална младинска летна школа за социјална инклузија.

Младинската летна школа ќе се одржува од 16-ти до 20-ти јуни во Маврово, а повикот за учество на истата беше наменет за млади од Северна Македонија кои се на возраст од 16 до 22 години.

Приближно 40 млади луѓе имаат можност да учествуваат во младинската летна школа која што претставува платформа за зајакнување на младите како агенти за промени. Учесниците, преку интерактивни методи на работа ќе имаат можност да се запознаат и дружат со врсници од целата земја и да се стекнат со нови вештини поврзани со личен развој, интерперсонални односи и тимска работа.

Како што беше наведено и во повикот, летната школа ќе се заснова на пристапот „Спорт за развој“, користејќи го спортот како педагошка алатка за промовирање на младинската едукација, инклузија и личен развој на учесниците.

На отворањето на младинската летна школа присуствуваше државниот секретар на министерството за социјална политика, демографија и млади, Фатмир Сабриу кој во своето обраќање нагласи дека социјалната инклузија не е само збор, туку дека тоа е животна мисија.

„Вашата енергија, креативност и желба за правичност се клучот за градење на општество каде секој ќе има еднакви шанси да се развива и да живее достојно. Оваа летна школа е ваш простор да ги развиете тие вештини, да се поврзете со луѓе кои го делат истиот ентузијазам и се надевам дека ќе ви донесе не само знаење, туку и инспирација, храброст и сила да продолжите понатаму, и покрај сите предизвици. Нека оваа енергија и заедништво што ќе ги изградите овде, ве водат низ цел живот,“ порача Сабриу.

Тој на присутните млади им посака многу успешни денови, фер плеј, искрени пријателства и безброј моменти со кои ќе се потврди дека се на вистинското место, со цел да го направат светот подобар!

„На нас останува да продолжиме да ве подржуваме и вложуваме во вас, затоа што само така ќе изградиме здрава, активна и самосвесна генерација – генерација која ќе го гради подоброто утре!“,рече Сабриу.

Утре времето ќе биде сончево и топло со мала до умерена локална облачност. Попладне во западните, претежно планински региони ќе има појава на нестабилност со пороен дожд и грмежи. Ќе дува слаб до умерен ветер од северен правец. Минималната температура ќе биде во интервал од 8 до 18, а максималната ќе достигне од 27 до 35 степени.

Во Скопје, сончево и топло со мала облачност и со слаб до умерен ветер од северен правец. Минималната температура ќе се спушти до 15, а максималната ќе достигне до 35 степени.

Во следните денови времето ќе биде сончево и топло со мала до умерена облачност. Во попладневните часови ќе има локална појава на нестабилност со пороен дожд, грмежи и засилен ветер, особено во четврток и во петок.

Претседателот на Собранието, Африм Гаши, оствари средба со Рашид Бин Саид Ал-Хајарин, новиот в.д. амбасадор на Државата Катар.

Претседателот Гаши му посака добредојде на новоназначениот в.д. амбасадор на Државата Катар во нашата држава и му посака успешна и плодна работа. Тој искажа големо задоволство од средбата и истакна дека очекува пријателството и соработката што постојат меѓу двете земји во иднина уште повеќе да се зајакнуваат и унапредуваат.

Гаши потенцираше дека како претседател на Собранието, особено ја цени значајната улога на парламентарната дипломатија, како суштински елемент во градењето мостови меѓу земјите и народите, особено во време на глобални предизвици.

„Парламентарната дипломатија е клучен механизам за продлабочување на билатералните односи и затоа е потребно да се реафирмира потребата од поблиска соработката меѓу Собранието на Република Северна Македонија и Советот на Шурата на Државата Катар, како и меѓу Групите за соработка меѓу двата Парламента“, рече Гаши.

Ал-Хајарин истакна дека во иднина акцентот на билатералните односи меѓу Република Северна Македонија и Државата Катар би требало да биде ставен на унапредување на економската соработка и трговските односи, што би ѝ помогнало на нашата држава економски да зајакне.

Соговорниците се согласија дека постои интерес од двете страни за интензивирање и унапредување на соработката во областа на образованието, културата, туризмот, транспортот, инфраструктурата, здравството, безбедноста, борбата против тероризмот и организираниот транснационален криминал.