Македонија
Поевтиното парно греење ќе ги врати исклучените и ќе донесе нови корисници

Секретарот на Град Скопје, Викторија Аврамовска Мадиќ, премиерот Зоран Заев и претставници од Владата денеска учествуваа на состанокот на Интересорската работна група за животна средина, што се одржа во Клубот на пратеници.
„Најголемата инвестиција на новата градска администрација во борбата против загадувањето е новоформираното градско претпријатие за дистрибуција на топлинска енергија и гас. ГЕС е подготвено идната сезона да ја почне со изменет пристап кон корисниците во кој приоритет ќе има бројот на приклучени претплатници и ширењето на мрежата, наспроти максимизирањето на профитот и рационализирањето на трошоците и инвестициите, како што е случај со сегашните дистрибутери на топлинска енергија”, рече секретарот на Град Скопје, Викторија Аврамовска Мадиќ.
Таа додаде дека ГЕС е подготвено идната сезона да ја почне со изменет пристап спрема корисниците, а приоритет ќе им биде да се зголеми бројот на приклучени претплатници и ширењето на мрежата, наспроти максимизирањето на профитот и рационализирањето на трошоците и инвестициите, како што е случајот со сегашните дистрибутери на топлинска енергија.
„Според пресметките на Градски енергетски системи, намалувањето на стапката на ДДВ од 18 на 5 проценти ќе овозможи намалување на трошокот на потрошувачите на топлинска енергија за 11%. Ова намалување на сметките за греење ќе иницира враќање на потенцијално околу 20 000 домаќинства и деловни субјекти назад во системот. Но, што е уште поважно, со воведувањето привилегирана стапка на ДДВ очекуваме и ширење на топлификациската мрежа и приклучување нови корисници кои во моментов користат други начини за затоплување”, нагласи таа.
Градот Скопје изминатите две години презема преку 25 нови мерки за намалување на загадувањето, кои во изминатава грејна сезона го ублажија интензитетот на аерозагадувањето, споредено со минатите години на рекордна загаденост. Во тие мерки спаѓаат ограничувањето на дотурот на стока, бесплатен јавен превоз на средношколците, субвенционирање во набавката на велосипеди и тротинети. Во тек е тендерската постапка за набавка на нови екоавтобуси. Исто така, Градот воспостави активен систем за борба со огнови на отворено преку 193 и со помош на Центарот за социјални грижи и полицијата нивниот број е значително намален. Зазеленете се рекордни 127.000 метри квадратни во сите делови на градот, вклучувајќи и нови паркови во самиот центар. Повторно рачносе мијат улиците, а инспекциските служби вршат интензивирани контроли. Се воведоа обуки за нови оџачари, а воедно се субвенционирааат и нивните услуги, додека старите субвенции за печки на пелети се дополнети со нови за инвертери.
Градот, исто така, пред почетокот на грејната сезона направи нови енергетски фасади на 13 училишни згради и постави прочистувачи за воздух во секоја училница.
Инспекцискиот надзор, зазеленувањето, загревањето на домовите и транспортот се четирите сегменти во кои Градот Скопје посветено работи како дел од активностите за борба против загадувањето на воздухот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Даниловски алармира: Глувците во Скопје шират ризик од болести, преминат е Рубиконот, потребна е итна интервенција

Епидемиологот проф. д-р Драган Даниловски предупреди дека Скопје се соочува со закана за јавното здравје, повикувајќи на итна, координирана интервенција на сите надлежни институции.
Тој потсети дека неодамна дете било каснато од глушец во училишен двор во чија близина имало насобран отпад, што, според него, е „црвена линија што не смееше да се премине“. „Преминат е Рубиконот. Нема назад“, порача Даниловски.
Епидемиологот предупредува дека во услови на постојано натрупан отпад и недоволна дератизација, градот станува биолошки резервоар на зарази.
„Купиштата ѓубре создадоа идеални услови за развој и размножување на глувци и стаорци – познати преносители на сериозни заразни болести: лептоспироза, хантавирус, па дури и бубонска чума. Тие болести се пренесуваат преку урината, изметот, плунката и болвите на глодарите. Познато е дека стаорците се размножуваат според експоненцијална прогресија: во период од само 18 месеци еден пар може да даде повеќе од еден милион потомци. Тоа е биолошки факт. Експоненцијалниот модел претпоставува неограничени ресурси како храна, вода и простор. Таа претпоставка во Скопје е исполнета!“, напиша Даниловски.
Додава и дека историјата нè потсетува дека неконтролираното ширење на глодари може да има катастрофални последици. Во Средниот век, меѓу 1347 и 1352 година, како пример во таа насока, бубонската чума („црната смрт“) однесе од 75 до 200 милиони животи – речиси половина од населението на Европа.
Повика на најитна, координирана интервенција на сите надлежни институции – по потреба и со прогласување вонредна состојба на делови од територијата на градот. Првенствено заради дезинфекција, дезинсекција, дератизација и отстранување на ризикот по јавното здравје.
„Во медицината постои еден етички принцип – Primum non nocere („пред сè, не прави штета“). Тој принцип мора да важи и надвор од медицината: за сите професии и институции што имаат допир со граѓаните. Причините – организациски, политички или финансиски – стануваат ирелевантни кога се доведува во прашање здравјето и безбедноста на децата и граѓаните.“ нагласи тој.
Македонија
ВМРО-ДПМНЕ: Арсовска да каже која одлука за „Комунална хигиена“ не била изгласана од нашите советници

Советничката група на ВМРО-ДПМНЕ и Коалицијата реагираше на тврдењата на градоначалничката Данела Арсовска, која утрово на социјалните мрежи напиша дека одговорноста за состојбата со ѓубрето низ Скопје е кај кадрите на ВМРО-ДПМНЕ и ВЛЕН во Советот на Градот и управниот одбор на ЈП „Комунална хигиена“.
Од партијата велат дека сите одлуки предложени од Арсовска и поврзани со претпријатието биле усвоени од страна на советниците на ВМРО-ДПМНЕ, и ја обвинуваат градоначалничката дека „измислува“ криза за политичка корист.
„Советниците на ВМРО-ДПМНЕ и Коалицијата гласаа за сите одлуки предложени од страна на Арсовска, а кои беа поврзани со ‘Комунална хигиена’. Апелираме да каже која одлука врзана со тековното работење на претпријатието не е изгласана од советниците?“ стои во реакцијата.
Од партијата додаваат дека тезата на Арсовска дека проблемот е намерно создаден е „површна, неточна и нелогична“.
„Зошто ВМРО-ДПМНЕ во сред изборна кампања би го ставило Скопје во ѓубре, ако се знае дека товарот и негативата ќе одат на сметка на ВМРО-ДПМНЕ? Арсовска треба да одговори зошто не се собира ѓубрето и што се прави со парите кои граѓаните уредно ги плаќаат“, наведуваат од партијата.
Тие побараа да се испита и кривичната одговорност на надлежните за хаосот со сметот, оценувајќи дека зад него стои „тајна коалиција која четири години ја поддржуваше Арсовска“.
„Ова го прави некој што сака да наштети на ВМРО-ДПМНЕ во изборна кампања. Ќе дојде крајот на ова и ќе има одговорност“, се вели во реакцијата.
Во објавата претходно, Арсовска обвини дека Советот не презел мерки за нормално работење на претпријатието, ниту ги разрешил управниот и надзорниот одбор на „Комунална хигиена“ кое е составено од кадри на ВМРО-ДПМНЕ и Влен, и надлежно за носењето на сите одлуки поврзани со работата на претпријатието.
Македонија
Мециновиќ прифати дебата на Телма телевизија

Амар Мециновиќ, кандидатот за градоначалник на Град Скопје од редовите на Левица, утрово на социјалните мрежи сподели дека прифатил покана за дебата на телевизија Телма.
„Добро утро Скопје, дебата на Телма за следниот четврток.
Со задоволство ја прифаќам поканата на телевизијата Телма за учество во дебатата за главниот град со мојот противкандидат.
Во духот на демократијата и витешката борба, сметам дека сите дебати се добродојдени“, напиша тој на социјалните мрежи.