Четворица пациенти од оние кои по пожарот се лекуваат во странство се наоѓаат во критична состојба. Ваквата информација укажува на намалување на бројот на критични случаи, кои пред два дена беа шест, додека вчера критични беа пет лица.

Портпаролката на Владата, Љатифи Азизи, во најновиот извештај за состојбата на повредените од пожарот во кочанската дискотека, сподели и дека се очекува за две недели да се вратат во земјата половина од 116-те пациентите кои се лекуваат во странство.

Што се однесува до повредените кои се примени на македонските клиники, од болниците денес ќе бидат испишани 16 пациенти кои ќе го продолжат лекувањето во домашни услови.

Обезбеден е тим хирурзи кој ќе остане во Кочани за поддршка на пациентите кои се лекуваат дома, избегнувајќи ги нивните напорни патувања во клиниките. Истотака, штипската болница располага со четири хирурзи.

Од Владата велат дека здравствените установи се максимално посветени, а во меѓувреме, истрагата продолжува со целосна ангажираност.

Заменик-претседателот на Владата на Северна Македонија, задолжен за политики за добро владеење, Арбен Фетаи, оствари протоколарна средба со новоименуваниот амбасадор на Италија во Скопје, Паоло Палминтери.

За време на средбата, заменик-претседателот на Владата, Фетаи, му честиташе на амбасадорот Палминтери за новата функција и му посака успех во неговата дипломатска мисија. Тој ги оцени билатералните односи како одлични и изрази благодарност за постојаната поддршка на Италија за интеграцијата на Западен Балкан во Европската Унија.

Исто така, Фетаи му се заблагодари на италијанскиот амбасадор за драгоцената помош во лекувањето на повредените пациенти во трагедијата во Кочани.

Двајцата соговорници се согласија да го продлабочат меѓусебното партнерство, со посебен фокус на борбата против корупцијата, финансиските истраги и конфискацијата на нелегално стекнат имот.

Извршени се 116 вонредни надзори врз основа на Законот за угостителска дејност, пришто во делот на прекршочна санкција, решенија за привремена забрана им се изречени на 10 фирми – кафулиња и клубови, истакна портпаролката на Владата, Марија Митева.

Утврдено е дека 15 угостителски објекти од вкупно 23 коишто имаат активна лиценца не ги исполнуваат минимално технички услови. Кај нив ќе бидат изречени две мерки, прво решение за забрана за вршење на дејност, и второ предлог до Министерството за економија за одземање на лиценцата.

Кај шест правни субјекти кои немаат активна лиценца или им е истечена, а утврдено е дека во изминатиот период работеле, издадени се решенија за забрана за вршење на дејност.

Во однос на идните чекори, во координација со МВР, Државниот пазарен инспекторат почнува со инспекциски надзори во објектите за организирање на прослави и настани со посебен акцент на утврдување на минимално техничките услови.

„За жал бројките зборуваат сами за себе, но ја потврдуваат потребата од решително и одговорно дејствување. Посветени сме на транспарентност и секоја неправилност да се санкционира. Наша цел е да создадеме систем кој ќе им служи на граѓаните“, рече Митева.

Инспекциите се случуваат по пожарот во дискотеката во Кочани во којшто загинаа 59 лица, а која имала фалсификувана лиценца.