Македонија
Политичко надитрување за уставните измени

Повеќе чекори ја делат ДУИ од излегување од Владата. Тие соопштија дека нивните министри поднеле оставки – но со напомена дека се условени.
Иако ваква законска формулација не постои, сепак од ДУИ велат дека оставките не важат додека ВМРО-ДПМНЕ не гласа за уставните измени.
Во писмото што го објави вчера партискиот лидер Али Aхмети се наведува дека земјата е во критична фаза од европската иднина, а големите одлуки бараат политичка, национална и државна одговорност и жртви, со оглед на барањето на опозицијата дека би гласале за уставните измени доколку Демократската унија за интеграција излезе од Владата.
„Министрите и владините функционери од редовите на Демократската унија за интеграција поднесоа оставки од функциите што во моментот ги извршуваат! Оставките автоматски се ефективни во моментот кога опозицијата ќе гласа за уставните измени“, напиша Ахмети во писмото.
Од Владата има молк, па не се знае дали воопшто ги добиле најавените оставки. „Макфакс“ стапи во контакт и премиерот Димитар Ковачевски, кој досега нема коментар за најавеното условено повлекување на министрите од ДУИ.
Процедурата за оставките не е сложена и е кратка. Се доставуваат до премиерот, потоа премиерот ги прифаќа, но има случаи и кога ги одбива. Ако ги прифати, тогаш се поднесуваат до Собранието. Таму се констатираат и се избираат нови министри. Оставките ќе значат формирање нова влада, овој пат без ДУИ.
Министри и порано поднесувале оставки, но останале во фотелјите
Во минатото имало неколку примери кога премиер на влада одлучувал да не ги прифати оставките на министрите. Така, во 2009 година, по бродската несреќа, во која загинаа голем број бугарски државјани во Охридското Езеро, тогашниот премиер Никола Груевски не ја прифати оставката на ексминистерот за транспорт и врски, Миле Јанакиески, која беше поднесена од морални причини.
Лани премиерот Зоран Заев не ги прифати оставките на министерот за здравство, Венко Филипле, и на неговиот заеменик, Илир Хасани, по случајот со пожарот на тетовската модуларна болница, каде што загинаа 14 лица.
Овие оставки не беа условени, но не беа ниту неотповикливи.
Се памети случајот на министерот Антони Пешев, кој раководеше со Министерството за транспорт и врски, а поднесе неотповиклива оставка за авионската несреќа во 1993 година. Неотповикливо ја напушти премиерската функција и Хари Костов во 2004 година.
Понуди за оставки имало и други. Ексминистерот за внатрешни работи, Љубомир Фрчковски, само понуди оставка поради атенатот на Киро Глигоров, но не замина од функцијата.
Која е процедурата за излез на ДУИ од Владата?
Со оглед на тоа што се работи за т.н. условени оставки, најпрвин ќе се чека опозицијата да даде зелено светло за уставните измени.
Ако измените поминат, оставките на министрите и функционерите од ДУИ би стапиле во сила и партијата ќе ја напушти Владата.
Следен чекор, во согласност со барањето на ВМРО-ДПМНЕ, кое беше објавено по лидерската средба пред два месеца, би било формирање преодна влада, без ДУИ.
СДСМ го поздрави чекорот на ДУИ, ВМРО-ДПМНЕ повика на брзи избори
СДСМ, вчера, по најавените оставки, се обрати преку партиско соопштение коментирајќи дека ДУИ го ставила државниот пред партискиот интерес и покажала одговорност кон врвната стратешка цел – европската иднина на земјата и граѓаните.
Од партијата посочија дека се исполнети сите услови на Мицкоски и одговорноста е кај него.
Од друга страна, опозициската ВМРО-ДПМНЕ повика на брзи избори.
„Добро е што ДУИ по 20 години власт е подготвена да замине во опозиција, од каде што ќе може да одговара за криминалот и да ја докажува својата невиност. Откако ДУИ го направи првиот чекор, си поднесоа оставки, сега само тие да бидат неотповикливи и да одиме на брзи избори бидејќи сѐ друго е одолжување и играње играчки на грбот на државата и иднината на граѓаните“, се вели во коментарот на ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Утре облачно време, од петок дожд и заладување

Времето утре ќе биде променливо облачно со сончеви периоди. Попладне ќе има услови за изолирана појава на краткотраен дожд и ретки грмежи. Ќе дува слаб до умерен ветер од јужен правец, информира УХМР.
Минималната температура ќе биде во интервал од 8 до 16, а максималната ќе достигне од 25 до 30 степени.
Во Скопје, променливо облачно со сончеви периоди. Ќе дува слаб до умерен ветер од јужен правец. Минималната температура ќе се спушти до 15, а максималната ќе достигне до 30 степени.
Од петок до почетокот на следната седмица под влијание на серија влажни воздушни маси времето ќе биде претежно облачно и посвежо со повремени врнежи од дожд. Наместа врнежите ќе бидат пообилни (над 20 l/m²).
Во петок ќе има локална појава на нестабилност со пороен дожд, грмежи и засилен ветер. Дневната температура значително ќе опадне (од 10 до 13 степени) во однос на денешната.
Македонија
Утре авионска дезинсекција против ларви од комарци во Скопје

Градот Скопје ги известува граѓаните дека на 25.09.2025 година (четврток), во раните утрински часови ќе се изврши авионска дезинсекција на подрачјето на градот Скопје против ларви од комарци.
Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин.
Се известуваат пчеларите навреме да ги преземат потребните мерки за заштита на пчелите.
Македонија
(Видео) Велјановски: Секогаш кога ДУИ губи, прибегнуваат кон потпалување на меѓуетничките односи

Секогаш кога ДУИ губи, секогаш кога граѓаните ќе ги прочитаат нивните вистински коруптивни намери, тие прибегнуваат кон потпалување на меѓуетничките односи и загрозување на соживотот, кажа на прес-конференција Александар Велјановски, пратеник на ВМРО-ДПМНЕ.
ДУИ, вели тој, нема аргументи и политики, единствена политика им е деструктивноста и уништувањето на соживотот на граѓаните.
ВМРО-ДПМНЕ, како што рече, најостро ја осудува срамната и опасна изјава на поранешниот министер за економија Крешник Бектеши, дадена при промоција на кандидатот на ДУИ за градоначалник на Тетово, Бајрам Реџепи.
„Бектеши, без трошка одговорност, велича оружје и отворено ја оправдува војната од 2001 година, претставувајќи ја како политички капитал. Тоа е скандал од невидени размери и директен удар врз меѓуетничките односи во државата.
Ова е класичен говор на омраза кој ја враќа Македонија во најтешките времиња. Наместо за иднината, граѓаните некој повторно сака да слушаат етнички провокации и поттикнување на поделби.
Македонците се столбот на Тетово. Со векови наназад тие се дел од неговата историја, култура и идентитет. Со својот труд и љубов кон овој град го изградиле и го зачувале. На овие избори како и многу пати претходно, токму Македонците со својот единствен сплотен глас и својата волја ќе одлучат кој ќе биде татко на Тетово и каква иднина ќе има овој град.
Ја повикуваме СДС јавно и веднаш да ја осуди оваа изјава и да се огради од својот коалициски партнер. Време е да се оттргнат од зависноста кон ДУИ и да покажат барем минимална одговорност. Секое молчење е соучесништво. Но, бидејќи СДС со години е навикнат да биде нем и покорен партнер на ДУИ, секој нивен денешен молк значи само едно, дека станале партнери и во омразата“.
Апелира до сите политички партии, организации и институции, да го осудат овој чин како отворен говор на омраза. Во Македонија, како што нагласи, нема место за политичари кои својата кампања ја градат на закани, омраза и величање оружје.
„Нашата обврска е да ја изградиме Македонија како силна, праведна и европска држава. Земја на мир и стабилност, а не на поделби и закани. Народот очекува јасна позиција, а ние ќе продолжиме да ја браниме Македонија од сите што сакаат да ја претворат во заложник на криминални и етнички поделби“.