Македонскиот полициски синдикат преку соопштение реагира дека на социјалните мрежи и интернет-порталите се објавуваат невистинити фотографии и се пласираат лажни вести за вработените во МВР. Станува збор за фотографии во униформа и во цивилна облека, како и фотографии од цивилни и полициски возила за кои Синдикатот смета дека се насочени кон наводни злоупотреби во однос на професиналното работење и злоупотреби на материјално-технички средства и опрема на МВР.

Велат дека на овој начин се врши психички притисок над вработените во Министерството поради што може да настанат пропусти во работењето, а со тоа индиректно да биде загорзена безбедноста на државата, граѓаните и нивите имоти.

„Пример за ваквите рекации се последните објави на некои интернет-портали и на социјаните мрежи, каде што се објавуваат фотографии од цивилни возила за кои се тврди дека се во сопственост на МВР и лица што се вработени во МВР за кои тврди дека наводно ги управуваат тие возила и прават злоупотреба со нив. Како пример го посочуваме последното фотографирање возила во гаражите во комплексот ‘Џевахир’ кога во тек била акција на откривање и фаќање сторители на кривично дело, а со самото објавување фотографии во јавноста се загрозуваат животите на вработените во МВР и нивните семејства, како и дека се става во прашање успешноста на самата акција“, велат од Синдикатот.

Оттука, апелираат до новиот министер во МВР, Наќе Чулев, дополнителниот министер во МВР, Славјанка Петровска, заменик-министерот Агим Нухиу, директорот на БЈБ, Сашо Тасевски, и заменик-директорот на БЈБ, Бесим Деари, за секој одделен случај да поведат постапка со цел утврдување одговорност кој сликал и зошто ги објавил тие фотографии имајќи предвид дека станува збор за кривично дело неовластено снимање и злоупотреба на лични податоци.

Исто така, од Синдикатот го повикуваат раководството на МВР да ги провери објавите и доколку постои злоупотреба од страна на службени лица од МВР, да преземе соодветни мерки и активности во согласност со законските прописи и правните акти.

„Воедно, ги замолуваме граѓаните да не фотографираат возила за кои претпостапуваат дека се од МВР и дека наводно се злоупотребуваат затоа што е можно со нив да се врши службено дејство, кое би го прекинале и деконспирирале, а доколку кој било граѓанин на Република Северна Македонија има какво било сознание за злоупотреба од вработени во МВР, да го пријави до надлежните институции“, се наведува во соопштението на Полицискиот синдикат.