Полициски службеници го растурија карневалот во Вевчани, кој оваа година не беше официјално организиран од страна на Општината поради пандемијата на коронавирусот. Од Министерството за внатрешни работи соопштија дека полицијата интервенирала поради непочитувањето на мерките за спречување ширење на коронавирусот, односно забраната за групирање повеќе од четири лица.

Присутните ја дочекаа полицијата со пцости, а настана и турканица меѓу василичарите и полицајците.

Од МВР велат дека и покрај претходно постигнатиот договор на три одржани состаноци со лицата инволвирани за одржувањето на оваа манифестација да се почитуваат мерките и да нема групирање, денеска поголема група граѓани се собрале во Вевчани, без почитување на мерките, односно со недозволено групирање, поради што мораше да интервенира полицијата.

„По документирање на случајот, ќе бидат поднесени и соодветни пријави. Апелираме до сите граѓани заеднички да придонесеме за спречување на коронавирусот, односно за зачувување на здравјето како на жителите на Вевчани така и на сите граѓани“, велат од МВР.

Група вевчанци не се откажаа од традицијата и излегоа маскирани на карневалот, а имаше и публика што го следеше дефилето.

Општина Вечвани оваа година се откажа од организирање на традиционалниот карневал.

Градоначалникот Сашо Јанкоски вчера апелира да се почитуваат мерките и протоколите на Комисијата за заразни болести.

„Ние како Општина Вевчани се откажавме од организација на годинешните концерти, изложби и сите други активности за Вевчанскиот карневал 2021 сѐ со единствена цел да ве заштитиме вас, вашите фамилии и вашите најблиски од оваа пандемија“, напиша Јанкоски на „Фејсбук“.