Ако сè е по пропис, зошто шверцерски се тргна калдрмата и се гради бетонско здание од некогашната „Менада“, праша Ирена Попова од ВМРО-ДПМНЕ, која порача дека треба да бидат поднесени оставки поради случувањата во Старата скопска чаршија.

„Власта на шверцерски начин во ек во полициски час ја извади калдрмата од Старата скопска чаршија, без да ги праша скопјани, без да го праша еснафот, без да ги праша лицата што живеат во непосредна близина на Чаршијата, сама во стилот на авторитарна власт реши да руши во време на корона-криза“, рече Попова.

Опозицијата се сомнева дека Владата и локалната самоуправа кријат нешто, па оттука ВМРО-ДПМНЕ ги повикува надлежните на јавен увид да ги достават сите документи и јавноста да се увери дали се гради по планот.

„Воедно, додека корона-профитерот Шилегов најавува дека ќе го руши ‘Скопје 2014’, тука заедно со својата централна власт руши плочник, а целата Влада и инспекторот се неми пред градежната џунгла и здание што се гради кај некогашната ‘Менада’. И за ова Шилегов молчи, а молчи и Министерството за култура“, додаде Попова.

Како што рече таа, вонредната состојба и полицискиот час не смеат да се злоупотребуваат и да се практикува самоволие од страна на власта.